ສະຖານີວິທະຍຸແລະໂທລະພາບເມືອງໂຂງ ລາຍງານວ່າ: ວັນທີ 12 ສິງຫາ 2026 ກອງຈະລາຈອນ ພະແນກຕຳຫລວດ ກອງບັນຊາການ ປກສ ເມືອງໂຂງ ແຂວງຈຳປາສັກ ໄດ້ສຶກສາອົບຮົມກຸ່ມໄວໜຸ່ມ ທີ່ມີພຶດຕິກຳຂັບຂີ່ລົດສ່ຽງອຸປະຕິເຫດ ດັດແປງສະພາບເຕັກນິກລົດ ແລະ ຂັບຂີ່ລົດສົ່ງສຽງດັງກວນເມືອງ ຈຳນວນ 13 ຄົນ, ຍິງ 1 ຄົນ. ໂດຍການເຂົ້າຮ່ວມຂອງ ພັນຕີ ກິດຕິພັນ ພົມມາລາ ຮອງພະແນກຕຳຫລວດ ຮັບຜິດຊອບກອງຈາລະຈອນ ກອງບັນຊາການ ປກສ ເມືອງໂຂງ ແລະ ພາກສ່ວນກ່ຽວຂ້ອງ.
ພັນຕີ ກິດຕິພັນ ພົມມາລາ ໄດ້ໂອ້ລົມ ແລະ ເນັ້ນໃຫ້ເຫັນເຖິງບັນຫາທີ່ມັກເກີດຂຶ້ນໃນສັງຄົມປັດຈຸບັນ ເຊິ່ງມີຜົນກະທົບໂດຍກົງຕໍ່ເດັກນ້ອຍ ແລະ ໄວໜຸ່ມ ທີ່ຮູ້ເທົ່າບໍ່ເຖິງການ. ຍ້ອນຄວາມຄືກຄະນອງ ແລະ ຢາກລອງສິ່ງໃໝ່ໆ ເຮັດໃຫ້ມີພຶດຕິກຳທີ່ທ້າທາຍຕໍ່ລະບຽບການສັນຈອນຕາມທ້ອງຖະໜົນ ແລະ ຜິດກົດໝາຍບ້ານເມືອງ ເປັນຕົ້ນ: ການດັດແປງສະພາບລົດ ປ່ຽນທໍ່ໃຫ້ສົ່ງສຽງດັງ, ປ່ຽນຕີນຍາງເດີມມາເປັນຍາງນ້ອຍ, ຕັ້ງເປັນກຸ່ມຂີ່ລົດໄວ ແລະ ໃຊ້ສຽງດັງໃນເວລາກາງຄືນ.
ການສຶກສາອົບຮົມໃນຄັ້ງນີ້, ເຈົ້າໜ້າທີ່ໄດ້ເຜີຍແຜ່ເອກະສານຕ່າງໆ ທີ່ພົວພັນກັບລະບຽບການສັນຈອນ ທີ່ນອນຢູ່ໃນກົດໝາຍປ້ອງກັນຄວາມສະຫງົບ ເພື່ອໃຫ້ໄວໜຸ່ມ ແລະ ຜູ້ປົກຄອງໄດ້ຮັບຮູ້, ເຂົ້າໃຈ ແລະ ເຊື່ອມຊຶມ ເພື່ອເຄົາລົບກົດໝາຍ ພ້ອມທັງນຳໄປເປັນທິດທາງໃນການສຶກສາອົບຮົມລູກຫຼານໃຫ້ກາຍ ເປັນຄົນດີຂອງຄອບຄົວ ແລະ ສັງຄົມ. ຫຼັງຈາກນັ້ນ, ເຈົ້າໜ້າທີ່ໄດ້ເຮັດບົດບັນທຶກ, ກ່າວຕັກເຕືອນ ພ້ອມທັງມອບ-ຮັບ ກຸ່ມໄວໜຸ່ມດັ່ງກ່າວໃຫ້ກັບຜູ້ປົກຄອງ ແລະ ອຳນາດການປົກຄອງທ້ອງຖິ່ນ ເພື່ອຕິດຕາມ ແລະ ສຶກສາອົບຮົມຕໍ່ໄປ.
