ວັນທີ 11 ສິງຫາ 2026 ລັດວິສາຫະກິດໄຟຟ້າລາວ ໄດ້ຈັດກອງປະຊຸມສະຫລຸບການດໍາເນີນທຸລະກິດປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026, ໂດຍການເປັນປະທານຂອງ ທ່ານ ຈັນສະແຫວງ ບຸນຍົງ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ມີປະທານສະພາບໍລິຫານ ລັດວິສາຫະກິດໄຟຟ້າລາວ, ຫົວໜ້າກົມ ຮອງກົມ ຮອງຜູ້ອໍານວຍການໃຫຍ່ ໄຟຟ້າລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ອາຄົມເດດ ວົງໄຊ ປະທານສະພາບໍລິຫານ ລັດວິສາຫະກິດໄຟຟ້າລາວ ໄດ້ລາຍງານຫຍໍ້ ຜົນການຈັດຕັ້ງປະຕິບັດການດໍາເນີນທຸລະກິດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026 ວ່າ: ດ້ານວຽກງານວິຊາສະເພາະ ໃນ 6 ເດືອນຕົ້ນປີ 2026 ວຽກງານການຄຸ້ມຄອງລະບົບສົ່ງ ລະບົບຈໍາໜ່າຍ ແລະ ການຜະລິດ ໃນປັດຈຸບັນແຫລ່ງຜະລິດທັງໝົດມີ 110 ແຫ່ງ ລວມກໍາລັງຕິດຕັ້ງ 5,075 MW, ມີ 86 ສະຖານີໄຟຟ້າແຮງສູງ ລວມກໍາລັງຕິດຕັ້ງ ທັງໝົດ 9,236 MVA ມີລະບົບສາຍສົ່ງແຮງສູງ ແລະ ຕາຂ່າຍແຮງກາງ, ແຮງຕໍ່າ ລວມກັນທັງໝົດ 76,474 km/ວົງຈອນ ແລະ ມີໝໍ້ນັບໄຟໃນການຄຸ້ມຄອງ ທັງໝົດ 1,860,889 ໜ່ວຍ.
– ເຂື່ອນໄຟຟ້ານໍ້າຕົກທີ່ ໄຟຟ້າລາວ ຄຸ້ມຄອງ 3 ເຂື່ອນຄື: ເຂື່ອນໄຟຟ້າ ນໍ້າງື່ມ 4; ເຂື່ອນໄຟຟ້ານໍ້າເປີນ 1 ແລະ ເຂື່ອນໄຟຟ້ານໍ້າກາບ ລວມກໍາລັງຕິດຕັ້ງທັງໝົດ 279 MW ແລະ ມີ 2 ເຂື່ອນທີ່ກໍາລັງກໍ່ສ້າງຄື: ໂຄງການກໍ່ສ້າງເຂື່ອນໄຟຟ້າ ນໍ້າງື່ມ 3 ມີກໍາລັງຕິດຕັ້ງທັງໝົດ 480 MW ແລະ ໂຄງການກໍ່ສ້າງເຂື່ອນໄຟຟ້າ ນໍ້າຫີນບູນ ມີກໍາລັງຕິດຕັ້ງ 30 MW,
– ລັດວິສາຫະກິດໄຟຟ້າລາວ ເລັ່ງ ຈັດຕັ້ງປະຕິບັດ 4 ໂຄງການສາຍສົ່ງ-ສະຖານີ ຄື: ໂຄງການ 500/230 kV ອ້ອມນະຄອນຫລວງວຽງຈັນ ຄື, ໂຄງການ ວຽງແກ້ວ-ໂຄກສະອາດ, ນາຊາຍທອງ-ວຽງແກ້ວ ແລະ ໂຄກສະອາດ-ດົງໂພສີ ໃຫ້ສໍາເລັດໃນທ້າຍປີ 2026 ເພື່ອຮອງຮັບພະລັງງານໄຟຟ້າຈາກແຫຼ່ງຜະລິດທີ່ມາຈາກພາກເໜືອ ຫາ ນະຄອນຫລວງວຽງຈັນ.
– ການຊື້-ຂາຍ ພະລັງງານໄຟຟ້າ ໃນ 6 ເດືອນຕົ້ນປີສາມາດປະຕິບັດໄດ້ 9,089 GWh ສາມາດມອບພັນທະໃຫ້ ລັດຖະບານໄດ້ 832 ຕື້ກີບ
