ປກສ ແຂວງວຽງຈັນ ລາຍງານວ່າ: ວັນທີ 12 ສິງຫາ 2026, ເຈົ້າໜ້າທີ່ຕຳຫຼວດວິຊາສະເພາະ ກອງບັນຊາການ ປກສ ແຂວງວຽງຈັນ ສົມທົບກັບເຈົ້າໜ້າທີ່ ປກສ ເມືອງວັງວຽງ ເຂົ້້າກວດກາເປົ້າໝາຍຄົນຕ່າງປະເທດ ທີ່ເຂົ້າມາເຊົ່າຢູ່ໂຮງແຮມ ເພື່ອເປັນບ່ອນເຄື່ອນໄຫວກໍ່ອາຊະຍາກຳທາງລະບົບອິນເຕີເນັດ ຢູ່ໂຮງແຮມ 2 ຈຸດ ຂອງເມືອງວັງວຽງ ແຂວງວຽງຈັນ.
ຜ່ານການກວດກາຕົວຈິງ ພົບເຫັນຄົນຕ່າງປະເທດທີ່ເປັນເປົ້າໝາຍສົງໄສ ທັງໝົດ 78 ຄົນ, ຍິງ 5 ຄົນ, ມີ 02 ສັນຊາດ ຄື: ສັນຊາດຈີນ ຈຳນວນ 77 ຄົນ ແລະ ສັນຊາດມາເລເຊຍ 1 ຄົນ, ໃນຈຳນວນ 78 ຄົນ ແມ່ນບໍ່ຖືໜັງສືຜ່ານແດນ (PASSPORT), ກວດພົບເຄື່ອງມືອີເລັກໂຕນິກ ມີໂທລະສັບມືຖືຈໍານວນ 170 ໜ່ວຍ, ຄອມພິວເຕີໂນດບຸກ 41 ໜ່ວຍ, ໄອແພັດ 7 ໜ່ວຍ, ຄອມພິວເຕີຕັ້ງໂຕະ ຈຳນວນ 1 ໜ່ວຍ, ກ໋ອງຄວາມຈຳ ຄອມພິວເຕີ ແມັກມິນິ ຈຳນວນ 58 ກ໋ອງ ທີ່ນຳໃຊ້ເຂົ້າໃນການເຄື່ອນໄຫວກະທຳຜິດ.
ເຈົ້າໜ້າທີ່ວິຊາສະເພາະ ຈຶ່ງໄດ້ກັກຕົວພວກກ່ຽວ ພ້ອມດ້ວຍ ເຄື່ອງຂອງກາງ ເພື່ອໄປດຳເນີນການສືບສວນ-ສອບສວນ ຕາມລະບຽບກົດໝາຍ.
ພາຍຫຼັງສົມທົບກັນກວດກາສໍາເລັດ ໃນວັນທີ 17 ສິງຫາ 2026, ເຈົ້້າໜ້າທີ່ຕຳຫຼວດກອງບັນຊາການ ປກສ ແຂວງວຽງຈັນ ໄດ້ນຳຕົວພວກຕ້ອງຫາ ຈຳນວນ 78 ຄົນ ໄປຢູ່ສູນຫຼັກ 62 ເພື່ອສືບຕໍ່ດໍາເນີນຄະດີຕໍ່ພວກກ່ຽວ ຕາມລະບຽບກົດໝາຍໃນຂັ້ນຕໍ່ໄດ້.
ຂ່າວ: ປກສ ແຂວງວຽງຈັນ
