ເກົາຫຼີໃຕ້ ເຜີຍ “ເຣນບອມ” (Rain Bomb) ຝົນຕົກໜັກຢູ່ ເມືອງ ຄໍເຈ ສູງເຖິງ 813 ມມ. ດິນເຈື່ອນທັບຄົນເສຍຊີວິດ 1 ຄົນ, ເມືອງກາຍເປັນອຳມະພາດ.
ເມືອງ ຄໍເຈ, ແຂວງ ຄຍອງຊັງໃຕ້ ຂອງເກົາຫຼີໃຕ້ ປະເຊີນກັບຝົນຕົກໜັກຢ່າງຮຸນແຮງ ຫຼື “ເຣນບອມ” (Rain Bomb) ຕິດຕໍ່ກັນ 3 ວັນ ຕັ້ງແຕ່ວັນທີ 15–17 ສິງຫາ ໂດຍວັດປະລິມານຝົນຕົກສະສົມໄດ້ສູງເຖິງ 813 ມິນລີແມັດ ເຮັດໃຫ້ເກີດນ້ຳຖ້ວມໜັກ, ນ້ຳລົ້ມຝັ່ງ ແລະ ດິນເຈື່ອນຫຼາຍຈຸດ.
ໃນຊ່ວງເຊົ້າມືດຂອງວັນທີ 17 ສິງຫາ ໄດ້ເກີດເຫດດິນເຈື່ອນຢູ່ເຂດ ອົກໂພດົງ ພັງທັບອາພາດເມັ້ນຊັ້ນ 1, ເຈົ້າໜ້າທີ່ໄດ້ຊ່ວຍເຫຼືອຜູ້ປະສົບໄພອອກມາໄດ້ 2 ຄົນ ແຕ່ 1 ຄົນມີພາວະຫົວໃຈຢຸດເຕັ້ນ ແລະ ເສຍຊີວິດໃນເວລາຕໍ່ມາ.
ຝົນຕົກໜັກຍັງເຮັດໃຫ້ປະຊາຊົນປະມານ 20 ຄົນຕິດຢູ່ໃນພື້ນທີ່ ແລະ ອີກປະມານ 100 ຄົນຕ້ອງໄດ້ຍົກຍ້າຍອອກຈາກພື້ນທີ່. ຂະນະທີ່ທາງເມືອງ ຄໍເຈ ໄດ້ສັ່ງປິດເສັ້ນທາງ 27 ຈຸດ ແລະ ລະງັບການບໍລິການລົດປະຈຳທາງ ຫຼັງຈາກຖະໜົນຫຼາຍສາຍຖືກນ້ຳ ແລະ ຂີ້ຕົມທ່ວມຂັງ.
ລັດຖະບານເກົາຫຼີໃຕ້ ໄດ້ເປີດສູນບັນຊາການຮັບມືກັບໄພພິບັດລະດັບ 1 ຫຼັງຈາກມີລາຍງານຄວາມເສຍຫາຍຈາກຝົນຕົກທົ່ວປະເທດ 603 ກໍລະນີ, ໃນຈຳນວນ 555 ກໍລະນີ ແມ່ນຢູ່ໃນແຂວງ ຄຍອງຊັງໃຕ້ ພ້ອມທັງຈຳກັດການເຂົ້າ-ອອກພື້ນທີ່ອຸທິຍານ ແລະ ເສັ້ນທາງແຄມນ້ຳຫຼາຍຮ້ອຍແຫ່ງ.
ກົມອຸຕຸນິຍົມວິທະຍາ ໄດ້ແຈ້ງເຕືອນວ່າ ຝົນຍັງຈະຕົກໜັກຢ່າງຕໍ່ເນື່ອງຢູ່ເຂດຊາຍຝັ່ງທາງໃຕ້ ໂດຍອາດມີຝົນຕົກ 20–30 ມິນລີແມັດຕໍ່ຊົ່ວໂມງ. ເຖິງວ່າຝົນຈະເຊົາຕົກແລ້ວ ກໍຍັງຕ້ອງເຝົ້າລະວັງດິນເຈື່ອນ ແລະ ພື້ນທີ່ໂຄ້ງຊັນພັງທະລາຍ ເນື່ອງຈາກດິນໄດ້ອຸ້ມນ້ຳໄວ້ເຕັມທີ່ແລ້ວ.
ທີ່ມາ:World Forum
