ໃນລະຫວ່າງວັນທີ 23-25 ມິຖຸນານີ້, ອົງການກາແດງແຫ່ງຊາດລາວ ໄດ້ຈັດຊຸດຝຶກອົບຮົມ ພາຍໃຕ້ຫົວຂໍ້ “ການປະເມີນຄວາມຕ້ອງການສຸກເສີນ ແລະ ການຊ່ວຍເຫຼືອດ້ວຍເງິນສົດ (Emergency Needs Assessment and Cash Assistance Training)” ໃຫ້ແກ່ພະນັກງານກາແດງ ຈາກ 6 ເມືອງເປົ້າໝາຍ ໃນ 4 ແຂວງ ເພື່ອແນໃສ່ເສີມສ້າງຄວາມເຂັ້ມແຂງ ແລະ ຍົກລະດັບຂີດຄວາມສາມາດໃນການກຽມຄວາມພ້ອມ ແລະ ຕອບໂຕ້ຕໍ່ໄພພິບັດຢ່າງມີປະສິດທິພາບ. ກິດຈະກຳດັ່ງກ່າວໄດ້ຈັດຂຶ້ນທີ່ແຂວງບໍລິຄຳໄຊ, ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ຄຳລາວັນ ຈັນທະລາວັນ ກຳມະການສູນກາງພັກ ປະທານອົງການກາແດງແຫ່ງຊາດລາວ; ມີບັນດາຫົວໜ້າ-ຮອງຫົວໜ້າຫ້ອງການ, ວິທະຍາກອນຈາກອົງການກາແດງແຫ່ງຊາດລາວ ແລະ ອົງການກາແດງສະວິດ ປະຈຳ ສປປ ລາວ, ພ້ອມດ້ວຍນັກສຳມະນາກອນຈາກອົງການກາແດງແຂວງ ແລະ ເມືອງເປົ້າໝາຍເຂົ້າຮ່ວມ, ພາຍໃຕ້ການສະໜັບສະໜູນງົບປະມານຈາກອົງການກາແດງສະວິດ (Swiss Red Cross).
ຈຸດປະສົງສຳຄັນຂອງການຝຶກອົບຮົມໃນຄັ້ງນີ້ ແມ່ນເພື່ອເພີ່ມພູນຄວາມຮູ້, ທັກສະ ແລະ ຂີດຄວາມສາມາດ ໃຫ້ແກ່ພະນັກງານອົງການກາແດງ ຈາກ 6 ເມືອງເປົ້າໝາຍ ໃນ 4 ແຂວງ ປະກອບມີ: ຊຽງຂວາງ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ ໃນການປະເມີນຄວາມເສຍຫາຍ ແລະ ຄວາມຕ້ອງການຮີບດ່ວນຂອງຜູ້ປະສົບໄພ ເພື່ອນຳຂໍ້ມູນທີ່ໄດ້ມາວິເຄາະ ແລະ ວາງແຜນການຊ່ວຍເຫຼືອໃຫ້ຖືກຈຸດ ແລະ ທັນເວລາ.
ຕະຫຼອດໄລຍະເວລາ 3 ວັນ, ຜູ້ເຂົ້າຮ່ວມໄດ້ຮຽນຮູ້ຫຼັກການ, ຂັ້ນຕອນ ແລະ ເຄື່ອງມືສຳຄັນໃນການປະເມີນສະຖານະການສຸກເສີນ, ການເກັບກຳຂໍ້ມູນພາກສະໜາມ, ການວິເຄາະຂໍ້ມູນ ແລະ ການຈັດລຳດັບຄວາມຈຳເປັນໃນການຊ່ວຍເຫຼືອ. ພ້ອມກັນນັ້ນ, ຍັງໄດ້ຮຽນຮູ້ກ່ຽວກັບກົນໄກການຊ່ວຍເຫຼືອດ້ວຍເງິນສົດ (Cash Assistance) ຊຶ່ງເປັນຮູບແບບການຊ່ວຍເຫຼືອດ້ານມະນຸດສະທຳທີ່ທັນສະໄໝ, ໂປ່ງໃສ ແລະ ມີປະສິດທິພາບ ທີ່ຊ່ວຍໃຫ້ຜູ້ປະສົບໄພສາມາດເຂົ້າເຖິງປັດໄຈຈຳເປັນຕາມຄວາມຕ້ອງການຕົວຈິງໄດ້ຢ່າງວ່ອງໄວ ແລະ ເໝາະສົມ.
ໃນໂອກາດເຄື່ອນໄຫວວຽກງານດັ່ງກ່າວ, ພາຍຫຼັງພິທີເປີດການຝຶກອົບຮົມ, ທ່ານປະທານອົງການກາແດງແຫ່ງຊາດລາວ ພ້ອມດ້ວຍຄະນະ ຍັງໄດ້ລົງພື້ນທີ່ມອບເຄື່ອງອຸປະໂພກ-ບໍລິໂພກ ແລະ ສິ່ງຂອງບັນເທົາທຸກ ເພື່ອຊ່ວຍເຫຼືອ ແລະ ໃຫ້ກຳລັງໃຈແກ່ປະຊາຊົນຜູ້ປະສົບຄວາມຫຍຸ້ງຍາກ ຈຳນວນທັງໝົດ 150 ຄອບຄົວ ໃນ 3 ເມືອງເປົ້າໝາຍ ຄື: ເມືອງຄູນຄຳ ແຂວງຄຳມ່ວນ, ເມືອງໄຊຈຳພອນ ແລະ ເມືອງວຽງທອງ ແຂວງບໍລິຄຳໄຊ (ເມືອງລະ 50 ຄອບຄົວ) ລວມມູນຄ່າເຄື່ອງທັງໝົດ 3 ຮ້ອຍລ້ານກວ່າກີບ.
ການຈັດກິດຈະກຳຄູ່ຂະໜານໃນຄັ້ງນີ້ ນອກຈາກຈະເປັນການຍົກລະດັບສັກກະຍະພາບຂອງພະນັກງານກາແດງໃນລະດັບທ້ອງຖິ່ນໃຫ້ມີຄວາມພ້ອມຮັບມືກັບສະຖານະການສຸກເສີນແລ້ວ, ຍັງເປັນການສະທ້ອນໃຫ້ເຫັນເຖິງຄວາມມຸ່ງໝັ້ນ ແລະ ເອົາໃຈໃສ່ຂອງອົງການກາແດງແຫ່ງຊາດລາວ ໃນການຕອບສະໜອງຕໍ່ໄພພິບັດຢ່າງທັນການ, ພ້ອມທັງສືບຕໍ່ປະຕິບັດພາລະກິດດ້ານມະນຸດສະທຳ ເພື່ອບັນເທົາຄວາມທຸກຍາກ ແລະ ຍົກລະດັບຄຸນນະພາບຊີວິດຂອງປະຊາຊົນລາວໃຫ້ດີຂຶ້ນເລື້ອຍໆ.
(ຂ່າວ: ກາແດງແຫ່ງຊາດ)
