ໂຄສະນາອົບຮົມ ເມືອງເຊໂປນ ແຂວງສະຫວັນນະເຂດ ລາຍງານວ່າ: ວັນທີ 19 ມິຖຸນາ 2026 ເຈົ້າໜ້າທີ່ວິຊາສະເພາະ ປກສ ເມືອງເຊໂປນ ໄດ້ລົງສົມທົບຂອງເຈົ້າໜ້າທີ່ ປກສ ແຂວງສະຫວັນນະເຂດ, ເຈົ້າໜ້າທີ່ທະຫານແຂວງ, ທະຫານຊາຍແດນ 320, ປກສ ກຸ່ມບ້ານແດນສະຫວັນ ແລະ ອໍານາດການປົກຄອງບ້ານຫ້ວຍສານເຂົ້າຮ່ວມກວດຄົ້ນສະຖານທີ່ບໍລິສັດພອນປະເສີດ ຣີສອດຈໍາກັດ ຕັ້ງຢູ່ບ້ານຫ້ວຍສານ ເມືອງເຊໂປນ ແຂວງສະຫວັນນະເຂດ.
ຜ່ານການກວດກາສະຖານທີ່ຕົວຈິງເຫັນວ່າ ສະຖານທີ່ດັ່ງກ່າວແມ່ນມີການຫລິ້ນການພະນັນຕີໄກ່, ຫລິ້ນໄພ້ ແລະ ໝາກກະລ໋ອກ (ການຫລີ້ນການພະນັນທີ່ຕ້ອງຫ້າມ) ແລະ ມີຄົນຈໍານວນຫລວງຫລາຍເປັນຊາວຕ່າງປະເທດ (ຫວຽດນາມ). ດັ່ງນັ້ນ, ຈຶ່ງໄດ້ກັກຕົວພວກກ່ຽວ ແລະ ອາຍັດວັດຖຸເຄື່ອງຂອງກາງເຊິ່ງມີລາຍລະອຽດດັ່ງນີ້:
– ກັກຕົວຄົນຊາວຫວຽດນາມໄດ້ທັງໝົດ 161 ຄົນ, ຍິງ 9 ຄົນ,
– ໜັງສືເດີນທາງ (ພາດສະປອດ) 49 ຫົວ,
– ໂທລະສັບມືຖື 69 ໜ່ວຍ,
– ເງິນສະກຸນຫວຽດນາມ 2,133,000,000ດົງ (ສອງຕື້ໜຶ່ງຮ້ອຍສາມສິບສາມລ້ານດົງ),
– ຕູ້ເຊັບຂະໜາດ 50X80 ຊັງຕີແມັດ 2 ໜ່ວຍ,
– ຕູ້ເຊັບຂະໜາດ 30X45 ຊັງຕິແມັດ 1 ໜ່ວຍ,
– ໂນ້ດບຸກຍີ່ຫໍ້ເດວສີປອນ, ດໍາ, ຂາວ 5 ໜ່ວຍ,
– ຈັກນັບເງີນສີປອນດໍາ 1 ໜ່ວຍ,
– ຕູ້ບໍລິຈາກເງີນ 1 ໜ່ວຍ,
– ກ່ອງເຊີບເວີ້ກ້ອງວົງຈອນປິດຂະໜາດ 17X17 ຊັງຕິແມັດສີດໍາ 1 ໜ່ວຍ, ກ່ອງເຊີບເວີບກ້ອງວົງຈອນປິດຂະໜາດ 20X25 ຊັງຕິແມັດສີດໍາ 3 ໜ່ວຍ, ແຜນຢາງໄຮໂລຂະໜາດ 40X40 ຊັງຕິແມັດ 7 ແຜ່ນ, ໄພ້ເຈ້ຍ 8 ກັບ.
ສໍາລັບເຄື່ອງຂອງກາງທີ່ໄດ້ອາຍັດ ແລະ ຄົນຫວຽດນາມທີ່ກັກຕົວໄດ້ນັ້ນ ທາງເຈົ້າໜ້າທີ່ ປກສ ແຂວງຈະດໍາເນີນຕາມຂັ້ນຕອນຂອງກົດໝາຍ ສ່ວນສະຖານທີ່ແມ່ນໄດ້ສ້າງບົດບັນທຶກມອບຄືນໃຫ້ຜູ້ຕ່າງໜ້າເຈົ້າຂອງບໍລິສັດພອນປະເສີດເປັນຜູ້ປົກປັກຮັກສາ.
