ໂດຍອີງຕາມບົດບັນທຶກຄວາມເຂົ້າໃຈ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ຣາຊະອານາຈັກໄທ ວ່າດ້ວຍການຮ່ວມມືຕ້ານການຄ້າມະນຸດ (POA).
ໃນອາທິດຜ່ານມາ ທີ່ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ ສູນກາງສະຫະພັນແມ່ຍິງລາວ ໄດ້ຈັດພິທີມອບ-ຮັບ ຜູ້ຖືກເຄາະຮ້າຍຈາກການຄ້າມະນຸດ ທີ່ສົ່ງກັບຢ່າງເປັນທາງການ ຈາກຣາຊະອານາຈັກໄທ ຈໍານວນ 5 ຄົນ (ເປັນຍິງທັງຫມົດ) ຊຶ່ງພວກກ່ຽວຢູ່ພາຍໃຕ້ການຄຸ້ມຄອງ ຂອງສະຖານຄຸ້ມຄອງສະຫວັດດີພາບຜູ້ຖືກເຄາະຮ້າຍຈາກການຄ້າມະນຸດ ບ້ານ ນາລີສະຫວັດ ແຂວງ ນະຄອນສິທໍາມະລາດ ເພື່ອນໍາມາມອບໃຫ້ກອງເລຂາຄະນະກໍາມະການຕ້ານການຄ້າ ມະນຸດລະດັບຊາດ, ກະຊວງປ້ອງກັນຄວາມສະຫງົບ ແລະ ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ, ສູນກາງສະຫະພັນແມ່ຍິງລາວ.
ສໍາລັບການມອບ-ຮັບຜູ້ຖືກເຄາະຮ້າຍ ຈຳນວນ 5 ຄົນໃນຄັ້ງນີ້ ແມ່ນມອບໂດຍທ່ານ ນາງ ພັດທະຣິຍາ ຈິຣາພອນ ຕາງຫນ້າຈາກ ກອງຕໍ່ຕ້ານການຄ້າມະນຸດ, ກະຊວງການພັດທະນາສັງຄົມ ແລະ ຄວາມຫມັ້ນຄົງຂອງມະນຸດ ຣາຊະອານາຈັກໄທ ພ້ອມດ້ວຍຄະນະ ແລະ ຮັບໂດຍ ທ່ານ ນາງ ແກ້ວອຸດອນ ທິບວັນທອງ ຫົວໜ້າພະແນກປົກປ້ອງ, ສູນໃຫ້ຄຳປຶກສາ ແລະ ປົກປ້ອງແມ່ຍິງ-ເດັກນ້ອຍ, ສູນກາງສະພັນແມ່ຍິງລາວ ຕາງຫນ້າກອງເລຂາຄະນະກໍາມະການຕ້ານການຄ້າມະນຸດລະດັບຊາດ ພ້ອມດ້ວຍຄະນະ; ຫຼັງຈາກມອບ-ຮັບແລ້ວ ຈຶ່ງໄດ້ນຳພາຜູ້ຖືກເຄາະຮ້າຍຈາກການຄ້າມະນຸດ ເຂົ້າພັກເຊົາຢູ່ທີ່ສູນໃຫ້ຄຳປຶກສາ ແລະ ປົກປ້ອງແມ່ຍິງ – ເດັກນ້ອຍ ສູນກາງສະຫະພັນແມ່ຍິງລາວ ເພື່ອໃຫ້ການຊ່ວຍເຫຼືອທາງດ້ານຕ່າງໆ ແລະ ສົ່ງກັບຄືນສູ່ຄອບຄົວ ແລະ ສັງຄົມ.
ຂ່າວ: ນັນທະວຸດ ພັນທະວົງ
