ຫ້ອງການວັດທະນະທຳ ແລະ ການທ່ອງທ່ຽວ ເມືອງໂຂງ ໄດ້ອອກໜັງສືແຈ້ງການ ສະບັບເລກທີ 018/ວທ.ມຂ, ລົງວັນທີ 15 ມິຖຸນາ 2026 ເຖິງບັນດາຫົວໜ່ວຍທຸລະກິດ, ຜູ້ປະກອບການຮ້ານກິນດື່ມ ແລະ ຮ້ານບັນເທີງ ພາຍໃນເມືອງໂຂງທຸກແຫ່ງ ໃຫ້ປິດການບໍລິການຊົ່ວຄາວ ໃນລະຫວ່າງວັນທີ 17 ຫາ 19 ມິຖຸນາ 2026 ນີ້.
ການອອກມາດຕະການໃນຄັ້ງນີ້ ແມ່ນເພື່ອຮັບປະກັນເຮັດໃຫ້ຂະບວນການສອບເສັງຈົບຊັ້ນມັດທະຍົມສຶກສາຕອນປາຍ (ມ.7) ປະຈຳສົກຮຽນ 2025-2026 ດຳເນີນໄປຢ່າງມີຄວາມສະຫງົບ.
ພ້ອມກັນນັ້ນ, ທາງຫ້ອງການວັດທະນະທຳ ແລະ ການທ່ອງທ່ຽວ ເມືອງໂຂງ ຍັງໄດ້ເນັ້ນໜັກມາດຕະການຢ່າງເດັດຂາດ ໂດຍໄດ້ມອບໝາຍໃຫ້ຄະນະກຳມະການສະເພາະກິດຂັ້ນເມືອງ ລົງຕິດຕາມ ແລະ ກວດກາຢ່າງໃກ້ຊິດ.
ໃນກໍລະນີທີ່ພົບເຫັນຫົວໜ່ວຍທຸລະກິດໃດໜຶ່ງ ຝ່າຝືນ ຫຼື ລະເມີດແຈ້ງການສະບັບນີ້ ຈະຖືກດຳເນີນມາດຕະການຢ່າງເຂັ້ມງວດ ຄື:
ຖືກປະຕິບັດມາດຕະການສຶກສາອົບຮົມ ແລະ ກ່າວເຕືອນ.
ປັບໄໝຕາມລະບຽບການ ເປັນເງິນ 5,000,000 ກີບ (ຫ້າລ້ານກີບ).
ຖືກສັ່ງປິດກິດຈະການບໍລິການຊົ່ວຄາວ ໄປຈົນກວ່າຈະສິ້ນສຸດລະດູການສອບເສັງ.
ດັ່ງນັ້ນ, ຈຶ່ງຂໍຮຽກຮ້ອງມາຍັງຜູ້ປະກອບການທຸລະກິດຮ້ານກິນດື່ມ ແລະ ຮ້ານບັນເທີງທຸກແຫ່ງ ພາຍໃນເມືອງໂຂງ ຈົ່ງພ້ອມກັນເປັນເຈົ້າການ ແລະ ຕື່ນຕົວເຂົ້າຮ່ວມຈັດຕັ້ງປະຕິບັດແຈ້ງການສະບັບນີ້ຢ່າງເຂັ້ມງວດ ແລະ ເປັນເອກະພາບກັນ ເພື່ອຮ່ວມກັນສ້າງບັນຍາກາດທີ່ດີໃຫ້ແກ່ນັກຮຽນສອບເສັງໃນຄັ້ງນີ້.
