ຂປລ. ແຫລ່ງຂ່າວຈາກ ແຂວງສາລະວັນ ໃຫ້ຮູ້ວ່າ: ເນື່ອງຈາກຝົນຕົກຫລາຍວັນຕິດຕໍ່ກັນ ເຮັດໃຫ້ນຳ້ເຊໂດນມີປະລິມານນ້ຳເພີ່ມຂຶ້ນ, ມາຮອດວັນທີ19 ສິງຫາ 2026 ເຮັດມີນໍ້າລົ້ນຝັ່ງໄຫລຖ້ວມເສັ້ນທາງເຂດບ້ານນາເຫລັກ, ໂພນບົກ, ວັດກາງ ແລະ ບ້ານເຕົ້າປູນ ເມືອງ ແລະ ແຂວງສາລະວັນ.
ສະຖານະການນ້ຳຖ້ວມຢູ່ພາກໃຕ້ເລີ່ມໜ້າເປັນຫ່ວງ! ປັດຈຸບັນ ລະດັບນ້ຳຂອງ ແລະ ນ້ຳເຊໂດນ ຢູ່ທີ່ນະຄອນປາກເຊ, ແຂວງຈຳປາສັກ ແມ່ນສືບຕໍ່ເພີ່ມສູງຂຶ້ນຢ່າງຕໍ່ເນື່ອງ ໂດຍໃນວັນທີ 19 ສິງຫາ 2026, ລະດັບນ້ຳຂອງທີ່ແທກໄດ້ຢູ່ ນະຄອນປາກເຊ ແມ່ນສູງເຖິງ 11.52 ແມັດ, ເຊິ່ງໄດ້ ກາຍລະດັບເຕືອນໄພ (11.00 ແມັດ) ເປັນທີ່ຮຽບຮ້ອຍແລ້ວ (ລະດັບອັນຕະລາຍແມ່ນ 12.00 ແມັດ) ແລະ ກົມອຸຕຸນິຍົມ ແລະ ອຸທົກກະສາດ ຄາດກະລາວ່ານ້ຳຍັງມີແນວໂນ້ມຈະສືບຕໍ່ເພີ່ມຂຶ້ນຕື່ມອີກ
ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງເຕືອນສະພາບອາກາດ ໃນໄລຍະວັນທີ 19 – 20 ສິງຫາ 2026 ເນື່ອງຈາກຮ່ອງຄວາມກົດດັນອາກາດຕໍ່າ ຍັງສືບຕໍ່ພາດຜ່ານຢູ່ເຂດພາກເໜືອ ແລະ ພາກກາງຂອງລາວ, ສົມທົບກັບລົມມໍລະສຸມຕາເວັນຕົກສ່ຽງໃຕ້ທີ່ພັດປົກຄຸມ
ລັກສະນະອາກາດດັ່ງກ່າວ ຈະເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍ ຫາ ປານກາງຢູ່ທົ່ວໄປ ແລະ ຈະມີ ຝົນຕົກໜັກ ຫາ ໜັກຫຼາຍ ຢູ່ບາງທ້ອງຖິ່ນ ພ້ອມມີລົມພັດແຮງ ໃນເຂດ 13 ແຂວງ 54 ເມືອງ ສ່ຽງໄພ
ສະນັ້ນ, ແຈ້ງເຕື່ອນເຖິງພໍ່ແມ່ປະຊາຊົນທີ່ມີຄວາມສ່ຽງໃນພື້ນທີ່ຕໍ່າ ໃຫ້ມີຄວາມກຽມພ້ອມລະມັດລະວັງ ຕໍ່ສະພາບນໍ້າທີ່ອາດຈະເພີ່ມຂຶ້ນ ພ້ອມທັງເກັບມ້ຽນເຄື່ອງໃຊ້ທີ່ຈຳເປັນໄປໄວ້ທີ່ສູງ ແລະ ປອດໄພ.
