ຮ່ອງຄວາມກົດດັນອາກາດຕໍ່າ ຫຼື ຮ່ອງຝົນ ຍັງພາດຜ່ານພາກເໜືອຂອງປະເທດລາວ, ສົມທົບກັບກະແສລົມຕາເວັນຕົກ – ຕາເວັນຕົກສຽງໃຕ້ພັດປົກຄຸມ, ຢ່າງຈະເຮັດໃຫ້ມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍ ຫາ ປານກາງຢູ່ ໃນແຕ່ລະພາກ ແລະ ຈະມີຝົນຕົກໜັກຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ ພາກກາງ ແລະ ພາກໃຕ້.
ດັ່ງນັ້ນ, ຂໍແຈ້ງເຕືອນເຖິງປະຊາຊົນບັນດາເຜົ່າ, ອົງການປົກຄອງ ແລະ ອົງການຈັດຕັ້ງທຸກພາກສ່ວນ, ຈົ່ງມີສະຕິລະມັດລະວັງຕໍ່ສະພາບຝົນຕົກໃນລະດັບປານກາງ ຫາ ຕົກໜັກຕິດຕໍ່ກັນຫຼາຍວັນ ທີ່ຈະເຮັດໃຫ້ມີນ້ຳຖ້ວມຊຸ, ດິນເຈື່ອນ ແລະ ນ້ຳຖ້ວມອັ່ງໃນຕົວເມືອງ. ຂໍໃຫ້ຕິດຕາມຂ່າວພະຍາກອນອາກາດຈາກ ກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.
ຜົນກະທົບໂດຍສັງເຂບໃນແຕ່ລະ ລະດັບຄວາມຮຸນແຮງຂອງຝົນ
- ຝົນຕົກເລັກນ້ອຍ (Light Rain): ປະລິມານນ້ຳຝົນ (ໃນ 24 ຊົ່ວໂມງ) ໃນລະຫວ່າງ 0.1 – 10.0 ມມ
- ເປັນຝົນທີ່ຕົກກະຈາຍ, ບໍ່ສົ່ງຜົນກະທົບຕໍ່ການດຳລົງຊີວິດປະຈຳວັນ ຫຼື ວຽກງານກະສິກຳ.
- ຝົນຕົກປານກາງ (Moderate Rain): ປະລິມານນ້ຳຝົນ (ໃນ 24 ຊົ່ວໂມງ) ໃນລະຫວ່າງ 10.1 – 50.0 ມມ
- ສາມາດເຮັດໃຫ້ເກີດມີນ້ຳຂັງໃນບາງຈຸດທີ່ມີລະບົບລະບາຍນ້ຳບໍ່ດີ, ແຕ່ໂດຍທົ່ວໄປແມ່ນມີປະໂຫຍດຕໍ່ ຜົນຜະລິດການກະເສດ.
- ຝົນຕົກໜັກ (Heavy Rain): ປະລິມານນ້ຳຝົນ (ໃນ 24 ຊົ່ວໂມງ) ໃນລະຫວ່າງ 50.1 – 90.0 ມມ
- ເລີ່ມມີຄວາມສ່ຽງຕໍ່ການເກີດນ້ຳຖ້ວມຂັງ, ດິນເຊາະເຈື່ອນໃນເຂດພູດອຍ, ແລະ ຫ້ວຍຮ່ອງຕ່າງໆອາດ ຈະມີລະດັບນ້ຳເພີ່ມຂຶ້ນຢ່າງໄວວາ. ຜູ້ຂັບຂີ່ຄວນເພີ່ມຄວາມລະມັດລະວັງ.
- ຝົນຕົກໜັກຫຼາຍ (Very Heavy Rain): ປະລິມານນ້ຳຝົນ (ໃນ 24 ຊົ່ວໂມງ) ຫຼາຍກວ່າ 90.0 ມມ ຂຶ້ນໄປ
- ມີຄວາມສ່ຽງສູງທີ່ຈະເກີດໄພພິບັດ ເຊັ່ນ: ນ້ຳປ່າໄຫຼຫຼາກ, ນ້ຳຖ້ວມສຸກເສີນ, ດິນເຈື່ອນຢ່າງຮຸນແຮງ. ອາດສົ່ງຜົນກະທົບຕໍ່ເສັ້ນທາງຄົມມະນາຄົມ, ທີ່ຢູ່ອາໄສ ແລະ ຕາມຊັບສິນຂອງປະຊາຊົນ. ຄວນຕິດຕາມ ການແຈ້ງເຕືອນຈາກພາກສ່ວນກ່ຽວຂ້ອງຢ່າງໃກ້ຊິດ.
ໝາຍເຫດ: ການປະເມີນຄວາມສ່ຽງຂອງໄພພິບັດບໍ່ໄດ້ຂຶ້ນກັບປະລິມານນ້ຳຝົນພຽງຢ່າງດຽວ ແຕ່ຍັງຂຶ້ນກັບສະພາບພູມ ສັນຖານ, ຄວາມອີ່ມຕົວຂອງດິນ, ແລະ ລະບົບການຈັດການນ້ຳໃນແຕ່ລະທ້ອງຖິ່ນນັ້ນໆ.
