ໃນລະຫວ່າງ ວັນທີ 8-9 ສິງຫາ 2026 ນີ້, ເຈົ້າໜ້າທີ່ສະເພາະກິດກະຊວງ ປກສ ໄດ້ລົງມ້າງກວາດລ້າງ ກຸ່ມແກ້ງເວບພະນັນອອນລາຍ ແລະ ສຊ້ໂກງທາງໂທລະຄົມ ຢູ່ເຂດເສດຖະກິດພິເສດບຶງທາດຫຼວງ ນະຄອນຫຼວງວຽງຈັນ, ໃນນີ້ໄດ້ເຂົ້າກວດຄົ້ນ ຕຶກອາຄານ 2, ຕຶກອາຄານ 10 ແລະ ຕຶກອາຄານ 11 ແລະ ຕຶກອານຄານ ບໍລິສັດ ເອັດສພີ ທະວີພາວເວີ້ ຈໍາກັດຜູ້ດຽວ, ສາມາດກັກຕົວຜູ້ຖືຫາ ກຸ່ມແກ້ງເວບພະນັນອອນລາຍ ແລະ ສໍ້ໂກງທາງໂທລະຄົມ ໄດ້ທັງໝົດ 261, ຍິງ 35 ຄົນ, ມີ 07 ສັນຊາດຄື: ສັນຊາດຈີນ ມີ 153 ຄົນ, ຍິງ 01 ຄົນ, ຫວຽດນາມ ມີ 61 ຄົນ, ຍິງ 16 ຄົນ; ໄທ ມີ 36 ຄົນ, ຍິງ 16 ຄົນ; ໄຕ້ຫວັນ ມີ 05 ຄົນ, ຍິງ 01 ຄົນ; ມາເລເຊຍ ມີ 02 ຄົນ; ເກົາຫຼີໃຕ້ ມີ 02 ຄົນ ແລະ ສັນຊາດ ມຽນມາ ມີ 02 ຄົນ, ຍິງ 01 ຄົນ, ພ້ອມເຄື່ອງຂອງກາງຫຼາຍລາຍການຄື: ຄອມພິວເຕີຕັ້ງໂຕະ ຈໍານວນ 404 ໜ່ວຍ; ຄອມພິວເຕີໂນດບຸກ ຈໍານວນ 86 ໜ່ວຍ; ໂທລະສັບມືຖື ຈໍານວນ 2355 ໜ່ວຍ.
ຜ່ານການສອບສວນຂອງເຈົ້າໜ້າທີ່ ໃຫ້ຮູ້ວ່າ: ຕຶກອາຄານດັ່ງກ່າວເປັນຂອງ ບໍລິສັດລາວທາດຫຼວງລົງທືນພັດທະນາຈໍາກັດ ຕັ້ງຢູ່ເຂດເສດຖະກິດພິເສດບຶງທາດຫຼວງ, ບ້ານໂພນທັນ, ເມືອງ ໄຊເສດຖາ, ນະຄອນຫຼວງວຽງຈັນ, ປັດຈຸບັນ, ເຈົ້າໜ້າທີ່ກໍາລັງດໍາເນີນການສືບສວນ-ສອບສວນ ເພື່ອຫາຫົວໂປ່ໂຕການ ແລະ ຜູ້ຮ່ວມຂະບວນການມາດໍາເນີນຄະດີຕາມລະບຽບກົດໝາຍ.
ໃນໂອກາດນີ້, ເຈົ້າໜ້າທີ່ຂໍສະແດງຄວາມຂອບໃຈຕໍ່ພໍ່ແມ່ປະຊາຊົນ ພົນລະເມືອງດີ ທີ່ໄດ້ແຈ້ງຂໍ້ມູນທີ່ເປັນປະໂຫຍດໃຫ້ເຈົ້າໜ້າທີ່ຈົນນຳໄປສູ່ການບຸກມ້າງຂະບວນການດັ່ງກ່າວໄດ້ຢ່າງຕໍ່ເນື່ອງ ແລະ ຂໍຮຽກຮ້ອງມາຍັງພໍ່ແມ່ປະຊາຊົນ ຈົ່ງພ້ອມກັນມີສະຕິໃນການໃຊ້ສື່ສັງຄົມອອນລາຍ ຢ່າຕົກເປັນເຫຍື່ອຂອງກຸ່ມແກ້ງເວບພະນັນອອນລາຍ ແລະ ສໍ້ໂກງທາງໂທລະຄົທ ພ້ອມທັງຢຸດຫຼິ້ນການພະນັນທຸກຮູບແບບ ໂດຍສະເພາະພະນັນອອນລາຍ ພ້ອມນັ້ນ ຖ້າຫາກທ່ານພົບເຫັນບຸກຄົນ, ກຸ່ມຄົນ ແລະ ສະຖານທີ່ ທີ່ສົງໄສເຄື່ອນໄຫວກະຜິດຕໍ່ກົດໝາຍ ໃຫ້ຮີບຮ້ອນແຈ້ງຕໍ່ເຈົ້າໜ້າທີ່ໂດຍດ່ວນ ຫຼື ແຈ້ງເຂົ້າສາຍດ່ວນ 1533 ໄດ້ຕະຫຼອດເວລາ.
( ຂ່າວ-ພາບ: ກົມສື່ມວນຊົນ ປກສ
