ພາບປະກອບຂ່າວ
ສຳນັກຂ່າວໂຣເຕີ/ຊີເອັນບີຊີ (Reuters/CNBC) ລາຍງານວ່າ: ລາຄາທອງຄຳໄດ້ພຸ່ງສູງຂຶ້ນໃນວັນພຸດ (5 ສິງຫາ 2026) ໂດຍໄດ້ຮັບແຮງໜູນຈາກການອ່ອນຄ່າຂອງໂດລາສະຫະລັດ ແລະ ອັດຕາຜົນຕອບແທນພັນທະບັດລັດຖະບານສະຫະລັດທີ່ຫຼຸດລົງ ໃນຂະນະທີ່ຕະຫຼາດກຳລັງເຝົ້າຕິດຕາມສະພາບການຢູ່ຕາເວັນອອກກາງ ແລະ ການເຈລະຈາເປີດຊ່ອງແຄບຮໍມຸຊ (Hormuz) ເພື່ອຊອກຫາຮູບແບບສັນຍານໃໝ່ກ່ຽວກັບແນວໂນ້ມອັດຕາເງິນເຟີ້ ແລະ ອັດຕາດອກເບ້ຍ.
ລາຄາທອງຄຳສະປອດ (Spot Gold) ພຸ່ງຂຶ້ນ 4.3% ສູ່ລະດັບ 4,252.74 ໂດລາຕໍ່ອອນສ໌ ໂດຍໃນຊ່ວງກ່ອນໜ້າຂອງເຊັດຊັນ ລາຄາທອງຄຳແທ່ງໄດ້ແຕະລະດັບສູງສຸດນັບຕັ້ງແຕ່ຊ່ວງວັນທີ 22 ມີຖຸນາ.
ສ່ວນສັນຍາຊື້ຂາຍທອງຄຳລ່ວງໜ້າຂອງສະຫະລັດ (U.S. Gold Futures) ໄດ້ປັບໂຕຂຶ້ນ 3.7% ສູ່ລະດັບ 4,305.20 ໂດລາ.
“ການຫຼຸດລົງຂອງຜົນຕອບແທນພັນທະບັດສອງວັນຕິດຕໍ່ກັນ ແລະ ການອ່ອນຄ່າຂອງໂດລາຕະຫຼອດອາທິດທີ່ຜ່ານມາ ເບິ່ງຄືວ່າຈະຊ່ວຍເປີດທາງ ແລະ ເພີ່ມໂອກາດໃຫ້ທອງຄຳ ພ້ອມທັງໂລຫະເງິນພຸ່ງສູງຂຶ້ນຕໍ່ໄດ້” ໄທ ຫວ່ອງ (Tai Wong) ນັກເທຣດໂລຫະລາຍອິດສະຫຼະກ່າວ.
ເງິນໂດລາສະຫະລັດຢູ່ໃກ້ລະດັບຕ່ຳສຸດໃນຮອບສາມເດືອນເມື່ອທຽບກັບສະກຸນເງິນເຢນຂອງຍີ່ປຸ່ນ ສົ່ງຜົນໃຫ້ທອງຄຳທີ່ຊື້ຂາຍດ້ວຍເງິນໂດລາມີລາຄາຖືກລົງສຳລັບຜູ້ຊື້ໃນຕ່າງປະເທດ ໃນຂະນະທີ່ອັດຕາຜົນຕອບແທນພັນທະບັດລັດຖະບານສະຫະລັດອາຍຸ 10 ປີ ເຄື່ອນໄຫວຢູ່ໃກ້ລະດັບຕ່ຳສຸດໃນຮອບໜຶ່ງອາທິດ.
ຂ່າວ: (Reuters/CNBC)
