ໃນວັນທີ 26 ມິຖຸນານີ້, ທີ່ເດີ່ນສະໜາມຫຼວງແຂວງໄຊຍະບູລີ ໄດ້ຈັດພິທີສະເຫຼີມສະຫຼອງວັນສາກົນຕ້ານຢາເສບຕິດ ຄົບຮອບ 39 ປີ ເປັນກຽດເຂົ້າຮ່ວມຂອງທ່ານ ອາເມ ຊົງເຍ້ຽເລັ່ງ ກໍາມະການປະຈໍາພັກແຂວງ ຮອງປະທານຄະນະກໍາມະການປົກຄອງແຂວງ, ມີການນໍາແຂວງ, ເມືອງ, ຫົວໜ້າ, ຮອງຫົວໜ້າພະແນກ, ແຂກຖືກເຊີນ ພ້ອມດ້ວຍຊາວໜຸ່ມ-ເຍົາວະຊົນເຂົ້າຮ່ວມ.
ໃນພິທີ, ທ່ານ ອາເມ ຊົງເຍ້ຽເລັ່ງ ກ່າວວ່າ: ປີຜ່ານມາ, ອົງການປົກຄອງແຂວງ ກໍຄືກຳລັງປ້ອງກັນຄວາມສະຫງົບ (ປກສ) ແຂວງ-ເມືອງ, ການຈັດຕັ້ງທຸກຂັ້ນ ໄດ້ຖືເອົາການສະກັດກັ້ນ ແລະ ແກ້ໄຂບັນຫາຢາເສບຕິດເປັນວຽກງານບຸລິມະສິດໜຶ່ງທີ່ສໍາຄັນ ໂດຍໄດ້ລົງໂຄສະນາເຜີຍແຜ່ແນວທາງນະໂຍບາຍ, ລະບຽບກົດໝາຍ ແລະ ມະຕິ, ຄໍາສັ່ງຂອງພັກ-ລັດກ່ຽວກັບບັນຫາຢາເສບຕິດ ເປັນຕົ້ນ ໄດ້ເອົາໃຈໃສ່ສຶກສາອົບຮົມໃຫ້ປະຊາຊົນບັນດາເຜົ່າໃນເປົ້າໝາຍທີ່ມີຄວາມສ່ຽງ ຮັບຮູ້ເຖິງຜົນຮ້າຍຂອງຢາເສບຕິດໄດ້ 254 ຄັ້ງ, ມີຜູ້ເຂົ້າຮ່ວມ 31,522 ຄົນ ຍິງ 14,595 ຄົນ, ເອົາໃຈໃສ່ສ້າງບ້ານ, ສະຖາບັນການສຶກສາໃຫ້ປອດຢາເສບຕິດ.
ທົ່ວແຂວງມີໂຮງຮຽນປອດຢາເສບຕິດ 88 ແຫ່ງ, ບ້ານປອດຢາເສບຕິດ 258 ບ້ານ, ໄດ້ສ້າງເງື່ອນໄຂໃຫ້ປະຊາ ຊົນຫັນໄປປະກອບອາຊີບອື່ນທີ່ໝັ້ນຄົງ ໃນໂຄງການປູກພືດທົດແທນການປູກຝິ່ນ, ໄດ້ຮັບຜູ້ຖືກເຄາະຮ້າຍຈາກຢາເສບຕິດເຂົ້າບຳບັດ, ປິ່ນປົວຢູ່ບັນດາສູນ, ໂຮງໝໍຊຸມຊົນ ແລະ ຄ້າຍດັດສ້າງບັນດາເມືອງຈໍານວນ 704 ຄົນ ຍິງ 33 ຄົນ, ບຳບັດປິ່ນປົວດີສົ່ງໃຫ້ຄອບຄົວສຶກສາອົບຮົມ 443 ຄົນ ຍິງ 24 ຄົນ, ພວມສືບຕໍ່ບຳບັດ, ປິ່ນປົວ 261 ຄົນ ຍິງ 9 ຄົນ, ໄດ້ຕັ້ງໜ້າປະຕິບັດມາດຕະການດ້ານກົດໝາຍຕໍ່ຜູ້ກະທໍາຜິດໃນການຄ້າ-ຂາຍ, ຂົນສົ່ງຢາເສບຕິດ. ໃນປີ 2025 ທົ່ວແຂວງສາມາດມ້າງລາຍຄະດີໄດ້ 169 ເລື່ອງ, ມີຜູ້ຖືກຫາ 222 ຄົນ ຍິງ 19 ຄົນ, ຍຶດຢາເສບຕິດປະເພດຢາບ້າໄດ້ 27,128,467 ເມັດ, ເຮໂລອິນ 42 ກຣາມ, ຄໍລາເຈັນ 16 ກິໂລກຣາມ. ໃນປີ 2026 ສານປະຊາຊົນແຂວງຕັດສິນຄະດີຢາເສບຕິດໃຊ້ໄດ້ຢ່າງເດັດຂາດມີ 209 ເລື່ອງ, ມີນັກໂທດ 258 ຄົນ ຍິງ 22 ຄົນ. ໃນນີ້ໂທດປະຫານຊີວິດ 1 ຄົນ, ໂທດຕະຫຼອດຊີວິດ 5 ຄົນ, ຢາເສບຕິດປະເພດຕ່າງໆ ທີ່ສານຕັດສິນແລ້ວມີຢາບ້າ 279,434 ເມັດ, ນໍ້າໜັກ 28,258,4 ກຣາມ, ຢາໄອມີນໍ້າໜັກ 149 ກິໂລກຣາມ, ຢາເຄຕາມິນ 12,2 ກຣາມ, ຄໍລະເຈັນຈໍານວນ 92,9 ກຣາມ.
ປັດຈຸບັນການຜະລິດ, ການຄ້າ-ຂາຍ, ການຂົນສົ່ງຢາເສບຕິດ ແລະ ສານເຄມີໄດ້ກາຍເປັນຂະບວນການຂ້າມຊາດ ເຖິງແມ່ນວ່າຫຼາຍປະເທດຢູ່ໃນໂລກ ໄດ້ເພີ່ມທະວີມາດຕະການ ແລະ ມີຄວາມພະຍາຍາມໃນການສະກັດກັ້ນ ແລະ ແກ້ໄຂຢ່າງຕໍ່ເນື່ອງ. ສໍາລັບຢູ່ແຂວງໄຊຍະບູລີ ການເສບ, ການຄ້າຂາຍຢາເສບຕິດປະເພດຢາບ້າ ແລະ ນໍາໃຊ້ສານເສບຕິດປະເພດຕ່າງໆ ເປັນຕົ້ນ ຢາສູບໄຟຟ້າ, ກາເຟຄໍລາເຈັນ, ນໍ້າກະທ້ອມໄດ້ລະບາດແຜ່ລາມຢູ່ຫຼາຍທ້ອງຖິ່ນ, ໃນສະຖານທີ່ຊຸມຊົນ, ຮ້ານບັນເທີງຊຶ່ງມີນັກທຸລະກິດຈໍານວນໜຶ່ງ, ນັກຮຽນ, ນັກສຶກສາ, ຊາວໜຸ່ມ, ກຳມະ ກອນ, ກຸ່ມຄົນຫວ່າງງານຈໍານວນບໍ່ໜ້ອຍທີ່ຕົກເປັນທາດຂອງຢາເສບຕິດ ກໍໃຫ້ເກີດມີສິ່ງຫຍໍ້ທໍ້ຕ່າງໆ ພາຍໃນຄອບຄົວ ແລະ ຊຸມຊົນເຊັ່ນ: ລັກຊັບ, ຄາດຕະກຳ, ຫຼິ້ນກິນຟູມເຟືອຍ, ອາລະວາດຄອບຄົວ, ລະເມີດກົດຈະລາຈອນພາໃຫ້ເກີດອຸບັດເຫດຕາມທ້ອງຖະໜົນ ແລະ ບັນຫາຫຍໍ້ທໍ້ອື່ນໆ ທີ່ສ້າງຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍໃນສັງຄົມ. ຈາກນັ້ນ, ຜູ້ເຂົ້າຮ່ວມໄດ້ພ້ອມກັນຈູດ ແລະ ທໍາລາຍຢາເສບຕິດ.
ຂ່າວ+ພາບ: ຄໍາໝັ້ນ
