ໂຄສົກກະຊວງການຕ່າງປະເທດອີຣານຢືນຢັນວ່າ MOU ລະຫວ່າງອີຣານກັບສະຫະລັດ ສຳເລັດສົມບູນຢ່າງເປັນທາງການແລ້ວ ຫຼັງຈາກທັງສອງຝ່າຍລົງລາຍເຊັນແບບດິຈິຕອລໄປແລ້ວ ແລະ ຈະບໍ່ມີພິທີລົງລາຍເຊັນເກີດຂຶ້ນທີ່ປະເທດສະວິດເຊີແລນ
ໃນວັນທີ 18 ມິຖຸນາ 2569 ສະຖານີວິທະຍຸ ແລະໂທລະພາບ IRIB ຂອງລັດຖະບານອີຣານລາຍງານວ່າ ທ່ານເອສມາອິລ ບາກາອີ ໂຄສົກກະຊວງການຕ່າງປະເທດອີຣານກ່າວວ່າ ບົດບັນທຶກຄວາມເຂົ້າໃຈ (MOU) ລະຫວ່າງອີຣານ ແລະ ສະຫະລັດອາເມຣິກາ ໄດ້ “ສຳເລັດສົມບູນຢ່າງເປັນທາງການແລ້ວ” ຫຼັງຈາກທັງສອງຝ່າຍລົງລາຍເຊັນໃນຮູບແບບດິຈິຕອລ
ທ່ານບາກາອີກ່າວວ່າ ມີການຕົກລົງກັນວ່າບົດບັນທຶກຄວາມເຂົ້າໃຈລະຫວ່າງອີຣານ ແລະ ສະຫະລັດ ຈະລົງລາຍເຊັນໃນຮູບແບບດິຈິຕອລ ພ້ອມລະບຸເພີ່ມວ່າ ເຖິງວ່າຈະມີແຜນການໃຫ້ຄະນະຜູ້ເຈລະຈາເດີນທາງໄປຍັງນະຄອນເຈນີວາ ແຕ່ຈະບໍ່ມີພິທີລົງລາຍເຊັນໃດໆເກີດຂຶ້ນໃນສະວິດເຊີແລນ ຫຼັງຈາກກ່ອນໜ້ານີ້ມີລາຍງານວ່າພິທີລົງລາຍເຊັນຢ່າງເປັນທາງການຈະຈັດຂຶ້ນໃນວັນສຸກກໍຕາມ
ທ່ານບາກາອີກ່າວວ່າ ໃນຂະນະນີ້ບົດບັນທຶກຄວາມເຂົ້າໃຈລະຫວ່າງອີຣານ ແລະ ສະຫະລັດ ສຳເລັດສົມບູນຢ່າງເປັນທາງການແລ້ວ ເນື່ອງຈາກທັງສອງຝ່າຍໄດ້ລົງລາຍເຊັນເປັນທີ່ຮຽບຮ້ອຍ ແລະ ເຕືອນວ່າ ການລະເມີດບົດບັນທຶກຄວາມເຂົ້າໃຈນີ້ຈະ “ມີລາຄາທີ່ຕ້ອງຈ່າຍສູງຂຶ້ນ” ເມື່ອມັນໄດ້ຮັບການລົງລາຍເຊັນໂດຍປະທານາທິບໍດີຂອງທັງສອງປະເທດ
ທ່ານບາກາອີກ່າວອີກວ່າ ບັນຫາຕ່າງໆໃນ MOU ສະບັບນີ້ ລ້ວນແລ້ວແຕ່ເປັນເລື່ອງທີ່ເຄີຍຖືກຍົກຂຶ້ນມາປຶກສາຫາລືກັນມາກ່ອນແລ້ວບໍ່ຫຼາຍກໍ່ໜ້ອຍ ແລະ ບົດບັນທຶກຄວາມເຂົ້າໃຈສະບັບນີ້ເນັ້ນຍ້ຳວ່າ ການເຈລະຈາໃນກອບເວລາ 60 ມື້ຂ້າງໜ້າ ຈະມຸ່ງເນັ້ນໄປທີ່ບັນຫາທາງນິວເຄຼຍ ແລະ ການຜ່ອນຜັນມາດຕະການຄວ່ຳບາດເທົ່ານັ້ນ
IRIB ອ້າງຄຳເວົ້າຂອງບາກາອີວ່າ ການຕັດສິນໃຈທີ່ສະຫຼາດຂອງສາທາລະນະລັດອິສລາມຄື ການບໍ່ເຈລະຈາໃນບັນຫານິວເຄຼຍໃນຂັ້ນຕອນປັດຈຸບັນນີ້ ພວກເຮົາໄດ້ຕັດສິນໃຈຮ່ວມກັນວ່າ ຄວນຈະມຸ່ງເນັ້ນໄປທີ່ການຢຸດສົງຄາມເປັນອັນດັບທຳອິດ ແລະ ພວກເຮົາກໍ່ໄດ້ເຮັດສິ່ງນັ້ນສຳເລັດລຸລ່ວງແລ້ວ
ທ່ານບາກາອີບອກອີກວ່າ MOU ສະບັບນີ້ໄດ້ຮັບການລົງລາຍເຊັນທັງສະບັບພາສາອັງກິດ ແລະ ພາສາຟາຣຊີ (ພາສາເປີເຊຍ) ຕາມຄວາມຕ້ອງການຂອງຝ່າຍອີຣານ ເພື່ອຄວາມໂປ່ງໃສ
IRIB ອ້າງຄຳເວົ້າຂອງລາວວ່າ ນີ້ສະແດງໃຫ້ເຫັນເຖິງລະດັບຄວາມໂປ່ງໃສຂັ້ນສູງສຸດໃນການສື່ສານຕໍ່ສາທາລະນະຂອງພວກເຮົາ ຖ້າເນື້ອຄວາມມີຢູ່ພຽງແຕ່ພາສາອັງກິດ ກໍ່ອາດຈະເກີດການແປຄວາມໝາຍຕາມອັດຕະວິໄສ ຫຼື ເກີດການແປທີ່ຄາດເຄື່ອນແຕກຕ່າງກັນອອກໄປໄດ້
ທ່ານບາກາອີກ່າວວ່າ ເນື້ອຄວາມໃນພາສາຟາຣຊີມີຄວາມຖືກຕ້ອງຕົງກັນກັບສະບັບພາສາອັງກິດ ແລະ ທາງອີຣານຖືວ່າເອກກະສານສະບັບນີ້ “ມີຜົນຜູກພັນ ແລະ ມີຄວາມຖືກຕ້ອງສົມບູນຢ່າງເຕັມທີ່”
ສ່ວນທາງດ້ານ ໂດໂນລ໌ ທຣັມ ປະທານາທິບໍດີສະຫະລັດ ກັບ ເຈດີ ແວນສ໌ ຮອງປະທານາທິບໍດີ ຕ່າງໄດ້ລົງລາຍເຊັນ MOU ສະບັບນີ້ຜ່ານລະບົບດິຈິຕອລໄປແລ້ວໃນອາທິດນີ້ ຂະນະທີ່ທ່ານໂມຮັມມັດ ບາເກີ ກາລິບາຟ ປະທານສະພາແຫ່ງຊາດອີຣານ ກໍ່ໄດ້ລົງລາຍເຊັນໃນເອກກະສານດັ່ງກ່າວຜ່ານລະບົບດິຈິຕອລໃນນາມຂອງຝ່າຍອີຣານໄປແລ້ວໃນຊ່ວງຕົ້ນອາທິດທີ່ຜ່ານມາ
ທີ່ມາ: cnn
