ການພົວພັນຮ່ວມມືລະຫວ່າງ ສປປ ລາວ ແລະ ສປ ຈີນ ຍັງຄົງໄດ້ຮັບການເສີມຂະຫຍາຍຢ່າງຕໍ່ເນື່ອງ. ຫຼ້າສຸດ ກະຊວງການຕ່າງປະເທດ ແຫ່ງ ສປປ ລາວ ແລະ ສະຖານເອກອັກຄະລັດຖະທູດ ສປ ຈີນ ປະຈຳ ສປປ ລາວ ໄດ້ຈັດພິທີລົງນາມສັນຍາໂຄງການພາຍໃຕ້ກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ ງວດທີ 9 ປະຈຳປີ 2026 ຢ່າງເປັນທາງການ ໃນວັນທີ 16 ມິຖຸນາ 2026 ໂດຍມີຜູ້ຕາງໜ້າຈາກພາກສ່ວນທີ່ກ່ຽວຂ້ອງເຂົ້າຮ່ວມ.
ສຳລັບການຊ່ວຍເຫຼືອພາຍໃຕ້ກອງທຶນໃນປີ 2026 ນີ້ ມີຕົວເລກ ແລະ ຂໍ້ມູນສຳຄັນທີ່ໜ້າສົນໃຈດັ່ງນີ້: ສປປ ລາວ ໄດ້ຮັບອະນຸມັດທັງໝົດ 7 ໂຄງການ ລວມມູນຄ່າເຖິງ 3,310,000 ໂດລາສະຫະລັດ, ທຶນດັ່ງກ່າວຈະຖືກນຳໄປສຸມໃສ່ພັດທະນາໃນຂົງເຂດຊັບພະຍາກອນມະນຸດ, ກະສິກຳ, ຊັບພະຍາກອນນ້ຳ, ສາທາລະນະສຸກ ແລະ ວຽກງານລຶບລ້າງຄວາມທຸກຍາກ, ນັບແຕ່ເລີ່ມຈັດຕັ້ງປະຕິບັດກອງທຶນດັ່ງກ່າວໃນປີ 2017 ເປັນຕົ້ນມາ, ສປປ ລາວ ໄດ້ຮັບທຶນສະໜັບສະໜູນແລ້ວເຖິງ 100 ໂຄງການ ຄິດເປັນມູນຄ່າລວມຫຼາຍກວ່າ 26 ລ້ານໂດລາສະຫະລັດ.
ການລົງນາມໃນຄັ້ງນີ້ ບໍ່ພຽງແຕ່ເປັນການຮັດແໜ້ນສາຍພົວພັນມິດຕະພາບທີ່ດີງາມລະຫວ່າງ ລາວ-ຈີນ ເທົ່ານັ້ນ, ແຕ່ຍັງເປັນກຳລັງແຮງສຳຄັນໃນການຊ່ວຍຂັບເຄື່ອນເສດຖະກິດ-ສັງຄົມຂອງ ສປປ ລາວ ໃຫ້ຂະຫຍາຍຕົວຢ່າງເປັນຮູບປະທຳ ທ່າມກາງສິ່ງທ້າທາຍຂອງສະພາບການໂລກໃນປັດຈຸບັນ ເພື່ອກ້າວໄປສູ່ເປົ້າໝາຍການພັດທະນາແບບຍືນຍົງຮ່ວມກັນ.
ທີ່ມາ: ກະຊວງການຕ່າງປະເທດ ສປປ ລາວ
