ຫ້ອງການສາທາລະນະສຸກ ເມືອງພຽງ ແຂວງໄຊຍະບູລີ ໄດ້ເປີດຂະບວນການອະນາໄມເພື່ອປ້ອງກັນພະຍາດໄຂ້ຍຸງລາຍ ປະຈໍາປີ 2026 ຂຶ້ນໃນວັນທີ 30 ເມສາຜ່ານມາ ຢູ່ທີ່ຫ້ອງປະຊຸມບ້ານ ເມືອງພຽງ ໂດຍການເຂົ້າຮ່ວມຂອງທ່ານ ບຸນທະວີ ຊົງເຮີ ຮອງປະທານຄະນະກຳມະການປົກຄອງເມືອງ ຜູ້ຊີ້ນຳວຽກງານວັດທະນະທຳສັງຄົມ, ມີອົງການປົກຄອງບ້ານອ້ອມຂ້າງເຂດເມືອງພຽງ, ພະນັກງານແພດໝໍ, ພ້ອມດ້ວບປະຊາຊົນພາຍໃນບ້ານເມືອງພຽງເຂົ້າຮ່ວມ.
ໃນພິທີ ໄດ້ຜ່ານບົດສະຫຼູບການເຄື່ອນ ໄຫວ ແລະ ຄວບຄຸມຕ້ານການລະບາດພະຍາດໄຂ້ຍຸງລາຍ ຊຶ່ງໃນໄລຍະຜ່ານມາຫ້ອງການສາທາລະນະສຸກເມືອງແມ່ນໄດ້ປະຕິບັດຕາມທິດຂອງກະຊວງສາທາລະນະສຸກທີ່ວ່າ: ຖືເອົາວຽກງານອະນາໄມກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍ ຖືເອົາການປິ່ນປົວ ແລະ ສະໜອງການບໍລິການສຸຂະພາບຢ່າງທົ່ວເຖີງ, ມີຄຸນນະພາບ, ຍຸດຕິທຳ ແລະ ສະເໝີພາບເປັນສຳຄັນ. ເອົາໃຈໃສ່ຕໍ່ກັບວຽກງານກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍ, ກັນ ແລະ ຄວບຄຸມການລະບາດຂອງພະຍາດໄຂ້ຍຸງລາຍ ໂດຍຖືເປັນບູລິມະສິດທີ່ສໍາຄັນ ຊຶ່ງໄດ້ຄວບຄຸມພາຫະນຳເຊື້ອເປັນຕົ້ນແມ່ນໄດ້ສ້າງຂະບວນການອະນາໄມທໍາລາຍແຫຼ່ງເພາະພັນຍຸງລາຍເພື່ອກໍາຈັດຕົວອ່ອນ, ຂ້າຕົວແກ່ ດ້ວຍການພົ່ນຢາ, ເຝົ້າລະວັງການລະບາດພະຍາດດ້ວຍການຕິດຕາມການທໍາລາຍໜອນນໍ້າຍຸງລາຍຢູ່ແຕ່ລະເຂດທຸກໆ 8 ຄໍ່າ ແລະ 15 ຄໍ່າ, ຖ້າບ້ານໃດເກີດການລະບາດ ແມ່ນເຮັດອານາໄມ ອາທິດລະຄັ້ງ ແລະ ປຸກລະດົມທຸກພາກສ່ວນທີ່ກ່ຽວຂ້ອງໃຫ້ມີສ່ວນຮ່ວມໃນການເຝົ້າລະວັງ, ກັນ ແລະ ສະກັດກັ້ນບໍ່ໃຫ້ມີການແຜ່ລະບາດແບບລາມກວ້າງ, ພ້ອມທັງມີແຜນການ ແລະ ມາດຕະການຢ່າງລະອຽດ, ເອົາໃຈໃສ່ປ້ອງກັນພະຍາດໄຂ້ຍຸງລາຍ ດ້ວຍການປະຕິບັດຫຼັກການ 5 ປໍ ຄື: ປໍປິດ (ປິດຝາພາສະນະທີ່ມີນ້ຳໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂ່ໃສ່), ປໍປ່ຽນ (ປ່ຽນນ້ຳ ແລະ ຜັດພາຊະນະເຊັ່ນ: ເຕົ້າດອກໄມ້, ນ້ຳຮອງຕີນຕູ້, ຖ້ານໂຕ່ງນ້ຳທາງຫຼັງຕູ້ເຢັນ), ປໍປ່ອຍ (ປ່ອຍປາຫາງນົກຍຸງເພື່ອກິນໜອນນ້ຳ), ປໍປັບປຸງສຸຂະອະນາໄມ (ບໍ່ໃຫ້ມີນ້ຳຄ້າງຂັງໃນກະໂປະ, ກະປ໊ອງ, ຮາງລີນ, ຢາງຕີນລົດເກົ່າ, ໃນແຕ່ລະຄອບຄົວໃຫ້ມີການກວດກາ ແລະ ກໍາຈັດແຫຼ່ງແຜ່ພັນຂອງຍຸງລາຍອາທິດລະ 1 ຄັ້ງໃນຂອບເຂດທີ່ຢູ່ອາໄສຂອງຕົນເອງ), ປໍປະຕິບັດ (ປະຕິບັດເປັນປະຈຳທຸກໆອາທິດ ແລະ ຖ້າເປັນໄຂ້ໃຫ້ໄປປິ່ນປົວຢູ່ໂຮງໝໍໃກ້ບ້ານທ່ານ),
ໂອກາດນີ້, ທ່ານ ບຸນທະວີ ຊົງເຮີ ໄດ້ກ່າວເປີດຂະບວນການອະນາໄມເພື່ອປ້ອງກັນພະຍາດໄຂ້ຍຸງລາຍ ປະຈໍາປີ 2026 ຢ່າງເປັນທາງການ.
(ຂ່າວ: ວົງສະຫວັນ ສຸທິໂວຫານ)
