ລັດຖະບານທະຫານມຽນມາ ປະກາດຫຼຸດໂທດໃຫ້ນັກໂທດທົ່ວປະເທດລົງ 1 ໃນ 6 ໃນໂອກາດວັນພັກລັດຖະການ ສົ່ງຜົນໃຫ້ “ອອງຊານ ຊູຈີ” ໄດ້ຮັບການຫຼຸດຜ່ອນໂທດເພີ່ມເຕີມເປັນຄັ້ງທີສອງໃນຮອບ 1 ເດືອນ ທ່າມກາງຄວາມກັງວົນດ້ານສຸຂະພາບ
ພົນເອກອາວຸໂສ ມິນ ອ່ອງ ຫຼາຍ ຜູ້ນຳການລັດຖະປະຫານທີ່ຫາກໍສາບານຕົນຮັບຕຳແໜ່ງປະທານາທິບໍດີມຽນມາ ອອກປະກາດຫຼຸດໂທດໃຫ້ນັກໂທດທຸກຄົນທົ່ວປະເທດລົງ 1 ໃນ 6 ໃນວັນນີ້ (30 ເມ.ສ.) ໂດຍມາດຕະການດັ່ງກ່າວຄອບຄຸມເຖິງ ນາງອອງຊານ ຊູຈີ ອະດີດຜູ້ນຳລັດຖະບານພົນລະເຮືອນທີ່ຖືກຄຸມຂັງຢູ່ດ້ວຍ
ແຫຼ່ງຂ່າວລະດັບສູງຈາກພັກສັນນິບາດແຫ່ງຊາດເພື່ອປະຊາທິປະໄຕ (NLD) ເປີດເຜີຍກັບສຳນັກຂ່າວ AFP ໂດຍຂໍສະຫງວນນາມວ່າ ເຖິງວ່າຈະມີການປະກາດຫຼຸດໂທດຄັ້ງຫຼ້າສຸດ ແຕ່ເນື່ອງຈາກກະບວນການຍຸຕິທຳຂອງມຽນມາຂາດຄວາມໂປ່ງໃສ ຈຶ່ງຍາກທີ່ຈະລະບຸໄດ້ວ່າປັດຈຸບັນ ນາງຊູຈີ ອາຍຸ 80 ປີ ຍັງເຫຼືອໄລຍະໂທດຈິງອີກຫຼາຍປີ
ແຫຼ່ງຂ່າວລະບຸວ່າ “ພວກເຮົາຮູ້ພຽງວ່ານາງຈະໄດ້ຮັບການຫຼຸດໂທດ 1 ໃນ 6 ຈາກສ່ວນທີ່ເຫຼືອ ແຕ່ພວກເຮົາບໍ່ຮູ້ແນ່ຊັດວ່ານາງເຫຼືອໂທດຈຳຄຸກອີກຈັກປີ”
ຍ້ອນຄືນໄປໃນປີ 2023 ນາງຊູຈີເຄີຍໄດ້ຮັບການອະໄພໂທດໃນບາງຂໍ້ຫາ ເຮັດໃຫ້ໂທດຈຳຄຸກລວມກວ່າ 30 ປີ ຖືກຫຼຸດເຫຼືອ 27 ປີ ແລະ ເມື່ອຕົ້ນເດືອນທີ່ຜ່ານມາ ພົນເອກອາວຸໂສ ມິນ ອ່ອງ ຫຼາຍ ກໍໄດ້ອອກຄຳສັ່ງຫຼຸດໂທດໃນລັກສະນະດຽວກັນນີ້ມາແລ້ວຄັ້ງໜຶ່ງ ຫຼັງຮັບຕຳແໜ່ງປະທານາທິບໍດີ ລວມທັງມີການອະໄພໂທດໃຫ້ ທ່ານ ວິນ ມິນ ອະດີດປະທານາທິບໍດີ ແລະ ຄົນໃກ້ຊິດຂອງນາງຊູຈີດ້ວຍ
ນັກສັງເກດການດ້ານປະຊາທິປະໄຕວິເຄາະວ່າ ການປະກາດຫຼຸດໂທດແບບຫວ່ານແຫຄັ້ງນີ້ ເປັນພຽງຄວາມພະຍາຍາມ “ປັບພາບລັກສະນ໌” ຂອງລັດຖະບານທະຫານມຽນມາ ຫຼັງຈາກທີ່ ພົນເອກອາວຸໂສ ມິນ ອ່ອງ ຫຼາຍ ພະຍາຍາມປ່ຽນຜ່ານຕົນເອງຈາກຜູ້ນຳທະຫານມາເປັນປະທານາທິບໍດີພົນລະເຮືອນ ຜ່ານການເລືອກຕັ້ງທີ່ຖືກວິຈານວ່າມີການຄວບຄຸມຢ່າງເຂັ້ມງວດ ແລະ ກີດກັນພັກ NLD ອອກຈາກການເມືອງ
ນອກຈາກນີ້ ການຜ່ອນຜັນມາດຕະການຄຸມຂັງບາງສ່ວນຍັງຖືກມອງວ່າເປັນ “ການສ້າງພາບ” ໃນຂະນະທີ່ກອງທັບມຽນມາຍັງຄົງປະເຊີນກັບການຕໍ່ຕ້ານຢ່າງຮຸນແຮງຈົນກາຍເປັນສົງຄາມກາງເມືອງທົ່ວປະເທດ ນັບຕັ້ງແຕ່ການລັດຖະປະຫານໃນປີ 2564
ປັດຈຸບັນ ນາງອອງຊານ ຊູຈີ ຍັງຄົງຖືກຄຸມຂັງ ໂດຍຖືກຕັດຂາດຈາກການສື່ສານກັບໂລກພາຍນອກເກືອບທັງໝົດ ທ່າມກາງລາຍງານຂ່າວຈາກຄອບຄົວຂອງນາງທີ່ສະແດງຄວາມກັງວົນຢ່າງຕໍ່ເນື່ອງກ່ຽວກັບສຸຂະພາບທີ່ຊົງໂຊ ໃນຂະນະທີ່ກຸ່ມສິດທິມະນຸດຢືນຢັນວ່າ ຂໍ້ຫາທັງໝົດທີ່ນາງໄດ້ຮັບນັ້ນ ເປັນການ “ຈັດສ້າງ” ເພື່ອກັນນາງອອກຈາກການເມືອງຢ່າງຖາວອນ.
