ຂ່າວຕ່າງປະເທດລາຍງານໃນວັນທີ 27 ເມສາ ຜ່ານມາວ່າ: ກະຊວງພະລັງງານຟີລິບປິນໄດ້ເປີດເຜີຍວ່າ, ຟີລິບປິນໄດ້ເພີ່ມປະລິມານຄັງສຳຮອງນໍ້າມັນກາຊວນ ປະມານ 178.33 ລ້ານລິດ ເພື່ອຊ່ວຍເສີມສ້າງການສະໜອງພາຍໃນປະເທດໃຫ້ແຂງແຮງຂຶ້ນ, ໃນຂະນະດຽວກັນເຈົ້າໜ້າທີ່ກຳລັງພະຍາຍາມຢ່າງໜັກເພື່ອຮັບມືກັບຄວາມຜັນຜວນຂອງຕະຫຼາດນໍ້າມັນໂລກ ແລະ ຄວາມເຄັ່ງຕຶງໃນຕາເວັນອອກກາງ.
ທ່ານ ຊາຣອນ ກາຣິນ ລັດຖະມົນຕີວ່າການກະຊວງພະລັງງານຂອງ ຟີລິບປິນ ໄດ້ກ່າວເນັ້ນໜັກວ່າ: ການນຳເຂົ້ານໍ້າມັນທັນເວລາແມ່ນມີຄວາມສຳຄັນຕໍ່ການຮັກສາຄັງສຳຮອງນໍ້າມັນເຊື້ອໄຟ ແລະ ຮັບປະກັນການດຳເນີນງານຢ່າງຕໍ່ເນື່ອງຂອງຂະແໜງການທີ່ສຳຄັນເຊັ່ນ: ການຂົນສົ່ງ, ໂລຈິສຕິກ, ການຜະລິດໄຟຟ້າ, ກະສິກຳ ແລະ ອຸດສາຫະກຳ.
ທ່ານ ກາຣິນ ກ່າວວ່າ: ທ່າມກາງຄວາມຂັດແຍ້ງໃນຕາເວັນອອກກາງ, ລັດຖະບານມີຄວາມມຸ່ງໝັ້ນທີ່ຈະເຮັດວຽກເພື່ອຮັບປະກັນວ່າຟີລິບປິນມີຄວາມພ້ອມ, ມີການສະໜອງທີ່ພຽງພໍ ແລະ ສາມາດຕອບສະໜອງໄດ້ຢ່າງວ່ອງໄວຕໍ່ເຫດການທີ່ອາດຈະສົ່ງຜົນກະທົບຕໍ່ຄວາມພ້ອມຂອງນໍ້າມັນເຊື້ອໄຟ ແລະ ສະຖຽນລະພາບຂອງຕະຫຼາດ.
