ສໍານັກຂ່າວສົດໄທລາຍງານ ວັນທີ 17 ເມສາ 2026 ນີ້ວ່າ: ເຈົ້າໜ້າທີ່ຕຳຫລວດສອບສວນກາງ (CIB) ຮ່ວມກັບ ສຳນັກງານຄະນະກຳມະການອາຫານ ແລະ ຢາ (ອຢ) ເປີດປະຕິບັດການ “Take Down” ເພື່ອມ້າງເຄືອຂ່າຍຜະລິດສິນຄ້າປອມລາຍໃຫຍ່ ປະເພດແປ້ງນົວ ແລະ ຜົງປຸງລົດ ຫລັງພົບສິນຄ້າວາງຈຳໜ່າຍ ໃນເຂດຕະຫລາດບາງແຄ ແລະ ເຂດໜອງແຂມ ກຸງເທບມະຫານະຄອນ ປະເທດໄທ.
ການຈັບກຸມໃນຄັ້ງນີ້ ມາຈາກການຂະຫຍາຍຜົນ ພາຍຫລັງເຈົ້າໜ້າທີ່ໄດ້ເຂົ້າຈັບກຸມຜູ້ຄ້າຂາຍລາຍຍ່ອຍຢູ່ ຈັງຫວັດໄຊຍະພູມ ກ່ອນຈະໃຊ້ເວລາສືບສວນດົນກວ່າ 3 ເດືອນ ຈົນພົບແຫລ່ງຜະລິດຫລັກ ແລະ ໄດ້ນຳໝາຍຄົ້ນເຂົ້າກວດສອບທັງໝົດ 3 ຈຸດ.
ຕໍ່ມາ, ເຈົ້າໜ້າທີ່ໄດ້ຕິດຕາມພຶດຕິກຳຂອງເຄືອຂ່າຍດັ່ງກ່າວ ຈົນພົບລົດກະບະຕ້ອງສົງໄສຂົນສົ່ງສິນຄ້າປອມອອກຈາກພື້ນທີ່, ກ່ອນຈະສະກັດຈັບໄດ້ຢູ່ປ້ຳນ້ຳມັນແຫ່ງໜຶ່ງ ໃນເມືອງສາມໂຄກ, ຈັງຫວັດປະທຸມທານີ ພ້ອມຂອງກາງເປັນແປ້ງນົວ ແລະ ຜົງປຸງລົດຊາດປອມຈຳນວນຫລາຍ ແລະ ໄດ້ຈັບກຸມຜູ້ຕ້ອງຫາໄດ້ທັນທີ.
ຈາກການກວດຄົ້ນເພີ່ມເຕີມ, ພົບຂອງກາງລວມກວ່າ 24,000 ຫໍ່, ມູນຄ່າຄວາມເສຍຫາຍເກືອບ 2 ລ້ານບາດ ໂດຍຂະບວນການດັ່ງກ່າວໄດ້ລັກລອບຜະລິດ ແລະ ຈຳໜ່າຍມາເປັນເວລາດົນກວ່າ 2 ປີ ກ່ອນຈະຖືກຈັບກຸມໃນທີ່ສຸດ.
ເບື້ອງຕົ້ນ, ເຈົ້າໜ້າທີ່ພວມຢູ່ໃນຂັ້ນຕອນດຳເນີນຄະດີຕາມກົດໝາຍ ພ້ອມທັງຂະຫຍາຍຜົນຕິດຕາມຜູ້ຮ່ວມຂະບວນການທີ່ກ່ຽວຂ້ອງມາລົງໂທດຕໍ່ໄປ.
