ແຂວງບໍ່ແກ້ວ, ສປປ ລາວ – ເມື່ອເວລາປະມານ 07:00 ໂມງ, ວັນທີ 19 ສິງຫາ 2026, ເຈົ້າໜ້າທີ່ຕຳຫຼວດ ສປປ ລາວ ໄດ້ເຂົ້າປະຕິບັດການຈັບກຸມຜູ້ຕ້ອງສົງໄສຄະດີ ປຸ້ນຊິງຊັບຮ້ານຄຳພາຍໃນຫ້າງໂລຕັດຊຽງຂອງ, ຈັງຫວັດຊຽງຮາຍ ຫຼັງພົບເບາະແສວ່າຜູ້ຕ້ອງສົງໄສໄດ້ຫຼົບໜີຂ້າມໄປຍັງພື້ນທີ່ແຂວງບໍ່ແກ້ວ, ສປປ ລາວ.
ເຈົ້າໜ້າທີ່ພົບຜູ້ຕ້ອງສົງໄສພ້ອມກັບອາວຸດປືນ ຈຶ່ງໄດ້ປະສານກຳລັງທະຫານລາວເຂົ້າຮ່ວມອ້ອມລ້ອມ ກ່ອນຈະສາມາດຄວບຄຸມຕົວໄດ້ 2 ລາຍ.
ລາຍທຳອິດຄື: ທ້າວ ສົມຊາຍ ທິບພະວັນ, ອາຍຸ 32 ປີ, ອາໄສຢູ່ບ້ານຂອນແກ້ວ, ເມືອງຫ້ວຍຊາຍ, ແຂວງບໍ່ແກ້ວ ຖືກຄວບຄຸມຕົວໃນຂໍ້ຫາປົ້ນຊັບ.
ສ່ວນລາຍທີ 2 ຄື: ທ້າວ ອ້າຍ ວິໄລສຸກ, ອາຍຸ 31 ປີ, ອາຊີບຂັບເຮືອ, ອາໄສຢູ່ບ້ານໃຫມ່ຫ້ວຍຊາຍເໜືອ, ເມືອງຫ້ວຍຊາຍ, ແຂວງບໍ່ແກ້ວ ຖືກຄວບຄຸມຕົວໃນຂໍ້ຫາປົ້ນຊັບ ໂດຍເຈົ້າໜ້າທີ່ລະບຸວ່າເປັນຜູ້ມີສ່ວນກ່ຽວຂ້ອງໃນຖານະຜູ້ສົມຮູ້ຮ່ວມຄິດ.
ຂະນະນີ້, ເຈົ້າໜ້າທີ່ ສປປ ລາວ ຢູ່ລະຫວ່າງການສືບສວນ-ສອບສວນ ແລະ ຂະຫຍາຍຜົນເພີ່ມເຕີມ ໂດຍລາຍລະອຽດກ່ຽວກັບອາວຸດປືນ ແລະ ຊັບສິນຂອງກາງ, ໂດຍສະເພາະຄຳທີ່ກ່ຽວຂ້ອງກັບຄະດີ ແມ່ນຍັງບໍ່ທັນມີການເປີດເຜີຍຢ່າງເປັນທາງການ.
ກ່ອນໜ້ານີ້, ເມື່ອວັນທີ 4 ສິງຫາ 2026 ໄດ້ເກີດເຫດຄົນຮ້າຍໃຊ້ອາວຸດປືນບຸກຊິງຊັບຮ້ານຄຳພາຍໃນຫ້າງໂລຕັດຊຽງຂອງ, ຈັງຫວັດຊຽງຮາຍ ກ່ອນຫຼົບໜີອອກຈາກພື້ນທີ່ ແລະ ເຈົ້າໜ້າທີ່ໄດ້ເລ່ງຕິດຕາມຕົວມາດຳເນີນຄະດີ.
