ເອີລິງ ຮາແລນ ກອງໜ້າຄົນເກັ່ງຈາກສະໂມສອນ ແມນເຊັດເຕີ ຊິຕີ ສ້າງຜົນງານໄດ້ຢ່າງໂດດເດັ່ນ ດ້ວຍການເໝົາຄົນດຽວ 2 ປະຕູ ຊ່ວຍໃຫ້ທີມຊາດນອກແວ ໄລ່ຖະຫຼົ່ມ ທີມຊາດອີຣັກ ໄປແບບຂາດລອຍ 4-1 ປະຕູ ເກັບ 3 ຄະແນນໃນນັດທຳອິດ ພ້ອມທັງຂຶ້ນນຳຂອງກຸ່ມ I ໃນການແຂ່ງຂັນເຕະບານໂລກ 2026 ຮອບແບ່ງກຸ່ມ ໃນວັນທີ 16 ມິຖຸນາ 2026 ຕາມເວລາທ້ອງຖິ່ນ ຫຼື ກົງກັບເວລາ 5:00 ໂມງ ວັນທີ 17 ມິຖຸນາ ຕາມເວລາໃນ ສປປ ລາວ ທີ່ສະໜາມຈິວເລັດ ສະເຕດ້ຽມ ສະຫະລັດອາເມຣິກາ.
ເກມການແຂ່ງຂັນ ເປັນນອກແວ ທີ່ໄດ້ປະຕູຂຶ້ນນຳໄປກ່ອນຈາກລູກຍິງຂອງ ເອີລິງ ຮາແລນ ໃນນາທີທີ 29. ແຕ່ທາງ ອີຣັກ ກໍມາໄດ້ປະຕູຕີສະເໝີເປັນ 1-1 ຈາກ ອາຍແມນ ຮຸດເຊນ ໃນນາທີທີ 39. ແນວໃດກໍຕາມ, ກ່ອນຈະຈົບເຄິ່ງເວລາທຳອິດພຽງ 2 ນາທີ ຮາແລນ ຄົນເດີມກໍມາ ຍິງປະຕູທີສອງຂອງຕົນເອງໃນນາທີທີ 43 ຊ່ວຍໃຫ້ ນອກແວ ຂຶ້ນນຳອີກຄັ້ງເປັນ 2-1.
ເຂົ້າສູ່ເຄິ່ງເວລາທີ 2, ນອກແວ ຍັງຄອງເກມໄດ້ເໜືອກວ່າ ແລະ ມາໄດ້ປະຕູຈາກ ເລໂອ ອອດຕິກາດ ໃນນາທີທີ 76. ໃນໄລຍະທ້າຍເກມ ກອງຫຼັງຂອງອີຣັກ ສະກັດບານພາດເຂົ້າປະຕູຕົນເອງ (Own Goal) ເຮັດໃຫ້ຈົບເກມ ນອກແວ ເອົາຊະນະ ອີຣັກ ໄປດ້ວຍສະກໍ້ 4-1.
