ວັນທີ 22 ກັນຍາ 2026 ນີ້ ພະແນກກະສິກໍາ ແລະ ສິ່ງແວດລ້ອມ ນະຄອນຫຼວງວຽງຈັນ ໄດ້ຈັດພິທີທໍາລາຍຜະລິດຕະພັນສິນຄ້າສັດ ແລະ ການປະມົງ ທີ່ນໍາເຂົ້າບໍ່ຖືກຕ້ອງຕາມລະບຽບກົດໝາຍຢູ່ທີ່ ດ່ານກັກກັນສັດດົງໂພສີ. ເຂົ້າຮ່ວມພິທີມີ ທ່ານ ແສງເພັດ ຈັນທະເສນ ຫົວໜ້າຂະແຫນງລ້ຽງສັດ ແລະ ການປະມົງ ພະແນກກະສິກໍາ ແລະ ສິ່ງແວດລ້ອມ ນະຄອນຫຼວງວຽງຈັນ ພ້ອມດ້ວຍ ພາກສ່ວນກ່ຽວຂ້ອງເຂົ້າຮ່ວມ.
ສໍາລັບຜະລິດຕະພັນດັ່ງກ່າວ ແມ່ນເຈົ້າໜ້າທີ່ສັດຕະວະແພດ ຮ່ວມກັບ ເຈົ້າໜ້າທີ່ພາສີ ແລະ ຕໍາຫຼວດກວດກາຄົນເຂົ້າ-ອອກເມືອງ ປະຈຳດ່ານສາກົນຂົວມິດຕະພາບລາວ-ໄທ 1 ກວດກາພົບເຫັນຢູ່ເທີງລົດຕູ້ໝາຍເລກທະບຽນ ກຮ 0663 ນະຄອນຫຼວງວຽງຈັນ. ໃນວັນທີ 21 ກັນຍາ 2026. ຜ່ານການກວດກາຕົວຈິງພົບເຫັນປະເພດ:
• ເຄື່ອງໃນໄກ່: ຈໍານວນ 240 ກິໂລກຣາມ.
• ໄສ້ກອກໝູສົ້ມ: ຈໍານວນ 100 ກິໂລກຣາມ.
• ຍໍ່ຂາວງົວ-ຄວາຍ: ຈຳນວນ 80 ກິໂລກຣາມ.
• ຊີ້ນໄກ່ບົດ: ຈຳນວນ 20 ກິໂລກຣາມ.
ລວມນໍ້າໜັກທັງໝົດ: 440 ກິໂລກຣາມ.
ຜ່ານການກວດກາເອກະສານຕົວຈິງເຫັນວ່າ ເອກະສານນໍາເຂົ້າບໍ່ຖືກຕ້ອງ ແລະ ຄົບຖ້ວນ ສະນັ້ນ ເຈົ້າໜ້າທີ່ສັດຕະວະແພດ ຈຶ່ງໄດ້ຍຶດໄວ້ ແລະ ນຳມາຈັດພິທີທໍາລາຍຖິ້ມໃນຄັ້ງນີ້.
