ໃນວັນທີ 18 ກັນຍາ 2026 ວ່າ: ຜູ້ນຳຈີນ ແລະ ສະຫະລັດ ມີກຳນົດພົບປະກັນໃນວັນທີ 24 ກັນຍາ ທີ່ນະຄອນຫຼວງວໍຊິງຕັນ ສະຫະລັດອາເມລິກາ. ໂດຍ ທ່ານ ໂດນັລ ທຣຳ ປະທານາທິບໍດີສະຫະລັດ ຈະເດີນທາງໄປຕ້ອນຮັບ ທ່ານ ສີ ຈິ້ນຜິງ ດ້ວຍຕົນເອງ ທີ່ສະໜາມບິນຖານທັບຮ່ວມ ແອນດຣູສ (Joint Base Andrews) ກ່ອນທີ່ທ່ານ ສີ ຈິ້ນຜິງ ຈະເດີນທາງໄປຍັງທຳນຽບຂາວ.
ແຫຼ່ງຂ່າວລະບຸວ່າ ບັນດາບໍລິສັດທີ່ກຳລັງຢູ່ໃນລາຍຊື່ພິຈາລະນາອາດຮ່ວມເດີນທາງກັບ ທ່ານ ສີ ຈິ້ນຜິງ ປະກອບມີ BYD, CATL ແລະ Xiaomi ລວມເຖິງບໍລິສັດອື່ນໆ ທີ່ກຳລັງປະເຊີນກັບການກວດສອບດ້ານລະບຽບການຈາກສະຫະລັດ. ແນວໃດກໍຕາມ, ລາຍຊື່ຄະນະຜູ້ບໍລິຫານທຸລະກິດດັ່ງກ່າວ ຍັງບໍ່ໄດ້ຮັບການຢືນຢັນຢ່າງເປັນທາງການ.
ການທີ່ ທ່ານ ສີ ຈິ້ນຜິງ ເດີນທາງພ້ອມຄະນະນັກທຸລະກິດຈີນ ຖືເປັນການເຄື່ອນໄຫວທີ່ບໍ່ຄ່ອຍເກີດຂຶ້ນ. ໂດຍຄັ້ງລ່າສຸດທີ່ ທ່ານ ສີ ຈິ້ນຜິງ ເດີນທາງຢ້ຽມຢາມສະຫະລັດພ້ອມຄະນະຜູ້ບໍລິຫານຈາກພາກທຸລະກິດຂະໜາດໃຫຍ່ ແມ່ນໃນປີ 2015 ເຊິ່ງໃນເວລານັ້ນມີຜູ້ບໍລິຫານຈາກ Alibaba, Tencent ແລະ ບັນດາທະນາຄານຈີນ ຮ່ວມຄະນະ.
ການພົບປະລະຫວ່າງ ທ່ານ ສີ ຈິ້ນຜິງ ແລະ ທ່ານ ໂດນັລ ທຣຳ ໃນວັນທີ 24 ກັນຍາທີ່ຈະມາເຖິງນີ້ ຈະເປັນການພົບປະກັນຄັ້ງທີ 2 ຂອງທັງສອງຜູ້ນຳໃນປີນີ້. ໂດຍຄາດວ່າ ປະເດັນສຳຄັນທີ່ຈະຫາລືກັນ ຈະຄອບຄຸມທັງດ້ານການຄ້າ, ບັນຫາໄຕ້ຫວັນ, ສົງຄາມອີຣານ ແລະ ຫາລືທາງດ້ານປັນຍາປະດິດ (AI).
ໃນຂະນະດຽວກັນ ສປ ຈີນ ແລະ ສະຫະລັດ ຍັງຄົງປຶກສາຫາລືກັນໃນປະເດັນການຄ້າ ແລະ ການລົງທຶນ ລວມເຖິງການສົ່ງອອກແຮ່ຫາຍາກຂອງຈີນ ແລະ ການຜ່ອນຄາຍຂໍ້ຈຳກັດດ້ານການຄ້າ ກ່ອນການປະຊຸມສຸດຍອດທີ່ທຳນຽບຂາວ.
ການຫາລືຄັ້ງນີ້ ຈຶ່ງອາດສະທ້ອນໃຫ້ເຫັນເຖິງຄວາມພະຍາຍາມຂອງທັງສອງປະເທດ ໃນການສ້າງຊ່ອງທາງສື່ສານກ່ຽວກັບຄວາມສ່ຽງຈາກ AI ຄວບຄູ່ໄປກັບການເຈລະຈາເພື່ອຫຼຸດຜ່ອນຄວາມຕຶງຄຽດດ້ານການຄ້າ ແລະ ກະກຽມຄວາມພ້ອມສຳລັບການພົບປະລະຫວ່າງຜູ້ນຳສະຫະລັດ ແລະ ຈີນ ໃນອາທິດນີ້.
ຂ່າວ: Reuters
