ໃນຕອນເຊົ້າວັນທີ 18 ກັນຍາ 2026 ນີ້ ຫ້ອງການ ອຸດສາຫະກຳ ແລະ ການຄ້າເມືອງ ໄຊຍະບູລີໄດ້ຈັດພິທີທຳລາຍ ຊີ້ນສ່ວນໝູ ແລະ ຜະລິດຕະພັນໝູທີ່ນໍາໃຊ້ເຂົ້າໃນການປຸງແຕ່ງອາຫານທີ່ຈໍາໜ່າຍຢູ່ບັນດາຕະຫຼາດພາຍໃນເມືອງໄຊຍະບູລີ; ເຊິ່ງຜ່ານການຕິດຕາມ, ກວດກາຕົວຈິງຂອງຄະນະສະເພາະກິດຂອງແຂວງ, ຂອງເມືອງ ແມ່ນໄດ້ກວດກາພົບເຫັນການຈໍາໜ່າຍອາຫານ ປະເພດ ສົ້ມຊີ້ນຄວາຍປະສົມໃສ່ໜັງໝູ ຈໍານວນ 1 ພາ ນໍ້າໜັກ 3 ກິໂລກຼາມ ແລະ ຄຽບໝູ ຈໍານວນ 291 ຖົງ ລວມມູນຄ່າທັງໝົດ 2,005,000 ກີບ, ສໍາລັບຊີ້ນສ່ວນ ແລະ ຜະລິດຕະພັນດັ່ງກ່າວສ່ວນໜຶ່ງແມ່ນໄດ້ນໍາເຂົ້າມາຈາກນະຄອນຫຼວງວຽງຈັນ ແລະ ອີກສ່ວນໜຶ່ງແມ່ນໄດ້ນໍາເຂົ້າມາຈາກປະເທດໄທ.
ພິທີດັ່ງກ່າວແມ່ນໄດ້ຈັດຂື້ນທີ່ຫ້ອງການອຸດສາຫະກຳ ແລະ ການຄ້າເມືອງ ໄຊຍະບູລີ, ໃຫ້ກຽດເຂົ້າຮ່ວມຂອງທ່ານ ນາງ ທອງສະມຸດ ອຸໄລສອນ ຮັກສາການຫົວໜ້າຫ້ອງການອຸດສາຫະກຳ ແລະ ການຄ້າເມືອງ, ມີຕາງໜ້າຈາກພະແນກກຳສິກຳ ແລະ ສີງແວດລ້ອມແຂວງ, ບັນດາທ່ານ ຫົວໜ້າ, ຮອງຫົວໜ້າໜ່ວຍງານພ້ອມດ້ວຍພະນັກງານພາຍໃນຫ້ອງການອຸດສາຫະກຳ ແລະ ການຄ້າເມືອງເຂົ້າຮ່ວມ.
ຂ່າວ-ພາບ: ສົມພົງ ສີສະຫັວດ
