ອີງຕາມແຈ້ງການຂອງຫ້ອງການກະສິກຳ ແລະ ສິ່ງແວດລ້ອມ ເມືອງລະຄອນເພັງ ລົງເມື່ອວັນທີ 16 ກັນຍາ 2026 ກ່ຽວກັບ ແຈ້ງການເຝົ້າລະວັງ ຄວບຄຸມປ້ອງກັນ ການແຜ່ລະບາດພະຍາດ ອະຫິວາໝູອາຟຣິກາ
ຫ້ອງການກະສິກຳ ແລະ ສິ່ງແວດລ້ອມເມືອງລະຄອນເພັງ ຂໍຖືເປັນກຽດແຈ້ງມາຍັງທ່ານຊາບວ່າ: ພະຍາດອະຫິວາ ໝູອາຟຣິກາ (ASF) ໄດ້ມີການລະບາດຢູ່ບາງບ້ານ ຂອງບາງເມືອງ, ຂອງແຂວງໄຊຍະບູລີ ເລີ້ມແຕ່ກາງເດືອນ ມິຖຸນາ 2026 ເປັນຕົ້ນມາ ແລະ ໄດ້ມີການລະບາດແຜ່ລາມ ກວມເອົາ 30 ບ້ານ ຂອງ 06 ເມືອງ ຂອງແຂວງໄຊຍະບູລີ.
ເພື່ອຮັບປະກັນບໍ່ໃຫ້ພະຍາດດັ່ງກ່າວແຜ່ລາມ ເຂົ້າມາພາຍໃນເມືອງລະຄອນເພັງ ໃຫ້ໜ່ວຍງານລ້ຽງສັດ ແລະ ການປະມົງ ກໍ່ຄືຄະນະຮັບຜິດຊອບສະເພາະຕາມຂໍ້ຕົກລົງ ເອົາໃຈໃສ່ ຜັນຂະຫຍາຍ ແຈ້ງການສະບັບນີ້ ໃຫ້ລົງເຖິງຄອບຄົວລ້ຽງໝູພັນຊີ້ນພາຍໃນເມືອງ ພາກສ່ວນທີ່ກ່ຽວຂ້ອງ ໃຫ້ພ້ອມກັນຈັດຕັ້ງປະຕິບັດ ຢ່າງເຂັ້ມງວດ ລະອຽດດັ່ງນີ້:
1. ຫ້າມນໍາເຂົ້າອາຫານ ປະເພດໝູແຊ່ງແຂງ, ຊີ້ນສ່ວນໝູເຂົ້າມາໃນເມືອງລະຄອນເພັງໂດຍເດັດຂາດ.
2. ລົງສ້າງບົດບັນທຶກ ແລະ ກວດກາ ເຂັ້ມງວດ ຊຸກຍູ້ຜູ້ປະກອບການຂ້າສັດຂາຍ-ຊີ້ນໃນທ້ອງຕະຫຼາດນັດ.
3. ຫ້າມຊື້ໝູເປັນໂຕນໍາເຂົ້າມາລ້ຽງ, ມາຂາຍລົງຕະຫຼາດ ແລະ ນໍາໃຊ້ໃນງານຕ່າງໆ ຕາມປະເພນີເດັດຂາດ.
4. ບໍ່ໃຫ້ຜູ້ປະກອບການຄອບຄົວລ້ຽງໝູ ນໍາເອົາໝູເຂົ້າມາລ້ຽງໃນຟາມ ຫຼື ໃນຄອບຄົວອີກ ເພື່ອບໍ່ໃຫ້ມີຄວາມສ່ຽງຕໍ່ການລົງທຶນ.
5. ໃຫ້ໜ່ວຍງານລ້ຽງສັດເຮັດຂໍ້ຕົກລົງ ຂອງຫ້ອງການກະສິກຳ ແລະ ສິ່ງແວດລ້ອມເມືອງ ແຕ່ງຕັ້ງຄະນະຮັບຜິດຊອບວຽກງານດັ່ງກ່າວສະເພາະ ເພື່ອເປັນບ່ອນອີກໃນການຈັດຕັ້ງປະຕິບັດ ການພົວພັນພາກສ່ວນທີ່ ກ່ຽວຂ້ອງ ເພື່ອຮ່ວມມືກັນຄວບຄຸມຢ່າງເຂັ້ມງວດ.
