ວັນທີ 23 ກັນຍາ (2026) ສຳນັກຂ່າວ NHK ລາຍງານວ່າ: ພາຍຸໄຕ້ຝຸ່ນຕູ້ເຈວຽນ (Dujuan) ໄດ້ເຄື່ອນຕົວອອກຫ່າງຈາກຍີ່ປຸ່ນແລ້ວ ຫຼັງຈາກພັດຖະຫຼົ່ມພາກຄັນໂຕ ແລະໝູ່ເກາະຕ່າງໆໃນເຂດກຸງໂຕກຽວ ສົ່ງຜົນໃຫ້ເກີດຝົນຕົກໜັກເປັນປະຫວັດການ, ເກີດນ້ຳຖ້ວມ ແລະດິນເຈື່ອນໃນຫຼາຍພື້ນທີ່. ຂະນະດຽວກັນ ເຈົ້າໜ້າທີ່ອຸຕຸນິຍົມວິທະຍາຍັງຄົງເຕືອນປະຊາຊົນໃຫ້ເຝົ້າລະວັງອັນຕະລາຍຢ່າງໃກ້ຊິດ.
ໃນຊ່ວງເຊົ້າວັນອັງຄານທີ່ຜ່ານມາ ເກີດນ້ຳຖ້ວມໃນເຂດຊຸມຊົນແຫ່ງໜຶ່ງຂອງເມືອງຊາກຸຣະ ແຂວງຊິບະ. ຂະນະທີ່ເມືອງໂຢໂກສຸກະ ແຂວງຄານາງາວະ ລາຍງານວ່າ ເກີດດິນເຈື່ອນຫຼາຍຈຸດ. ສ່ວນທີ່ເມືອງມິອຸຣະ ແຂວງຄານາງາວະ ມີດິນໂຄນຖະຫຼົ່ມໃສ່ອາຄານອາພາດເມັນ 2 ຊັ້ນ ເຮັດໃຫ້ຍິງອາຍຸ 20 ປີຄົນໜຶ່ງສູນຫາຍ ແລະຍັງບໍ່ຮູ້ຊະຕາກຳ. ສ່ວນເຮືອນອີກຫຼັງໜຶ່ງ ທີ່ຢູ່ຫ່າງຈາກຈຸດເກີດເຫດປະມານ 2 ກິໂລແມັດ ກໍມີລາຍງານວ່າ ຍິງອາຍຸ 30 ປີອີກຄົນໜຶ່ງສູນຫາຍ.
ຂະນະດຽວກັນ ເຈົ້າໜ້າທີ່ທ້ອງຖິ່ນໃນແຂວງຊິບະ ລາຍງານວ່າ ເກີດດິນເຈື່ອນຫຼາຍຈຸດ ສົ່ງຜົນໃຫ້ມີຜູ້ເສຍຊີວິດແລ້ວ 5 ຄົນ ແລະສູນຫາຍອີກ 2 ຄົນ. ຄາດວ່າຜູ້ສູນຫາຍອາດຕິດຢູ່ພາຍໃນເຮືອນທີ່ພັງຖະຫຼົ່ມລົງມາ.
ເມື່ອລວມກັບຜູ້ເສຍຊີວິດຈາກເຫດການໃນພື້ນທີ່ອື່ນໆ ເຮັດໃຫ້ຍອດຜູ້ເສຍຊີວິດຈາກອິດທິພົນຂອງພາຍຸໄຕ້ຝຸ່ນຕູ້ເຈວຽນໃນຍີ່ປຸ່ນເພີ່ມເປັນຢ່າງໜ້ອຍ 6 ຄົນ ແລະມີຜູ້ສູນຫາຍ 6 ຄົນ.
ທີ່ມາ: NHK
