ຂປລ ໃນວັນທີ 22 ກັນຍາ 2026, ທີ່ນະຄອນນິວຢອກ, ສ ອາເມລິກາ, ທ່ານ ທອງສະຫວັນ ພົມວິຫານ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ນໍາພາຄະນະຜູ້ເເທນຂັ້ນສູງຂອງ ສປປ ລາວ ເຂົ້າຮ່ວມພິທີໄຂກອງປະຊຸມ ສະມັດຊາໃຫຍ່ອົງການສະຫະປະຊາຊາດ ສະໄໝທີ 81 ພາຍໃຕ້ຫົວຂໍ້: “ຟື້ນຟູຄວາມເຊື່ອໝັ້ນ, ບໍລິຫານການຫັນປ່ຽນໃຫ້ກາຍເປັນ ອົງການສະຫະປະຊາຊາດ ທີ່ໃຫ້ຜົນປະໂຫຍດແກ່ທຸກຄົນ”. ພ້ອມທັງເຂົ້າຮ່ວມກອງປະຊຸມພາກອະພິປາຍທົ່ວໄປ, ບັນດາກອງປະຊຸມປິ່ນອ້ອມ ແລະ ກິດຈະກໍາຕ່າງໆ ໃນໄລຍະກອງປະຊຸມດັ່ງກ່າວ.
ໃນພາກເປີດກອງປະຊຸມປະກອບມີບັນດາປະມຸກລັດ, ຫົວໜ້າລັດຖະບານ ແລະ ຜູ້ຕາງໜ້າລະດັບສູງຂອງປະເທດຕ່າງໆໃນທົ່ວໂລກ ເຂົ້າຮ່ວມ. ໃນນັ້ນ, ທ່ານ ອັນໂຕນີໂອ ກູເຕເຣັສ ເລຂາທິການໃຫຍ່ອົງການ ສປຊ ໄດ້ກ່າວປາໄສໂດຍໄດ້ຕີລາຄາສະພາບການໂລກ ແລະ ເນັ້ນໜັກໃຫ້ເຫັນ 4 ບົດທົດສອບອໍານາດຂອງໂລກ ຄື: ບົດທົດສອບດ້ານສັນຕິພາບແລະຄວາມປອດໄພ ໂດຍຮຽກຮ້ອງໃຫ້ບັນ ດາປະເທດເຄົາລົບກົດບັດ ສປຊ, ກົດໝາຍສາກົນ, ປົກປ້ອງພົນລະເຮືອນ ແລະ ຮັບປະກັນການຊ່ວຍ ເຫລືອດ້ານມະນຸດສະທຳ; ດ້ານຄວາມບໍ່ສະເໝີພາບ ໄດ້ເນັ້ນຍໍ້າເຖິງການແກ້ໄຂບັນຫາໂຄງສ້າງການເງິນສາກົນ, ສະໜັບສະໜູນການຜ່ອນຜັນໜີ້ສິນ ແລະ ເສີມສ້າງໂອກາດທີ່ເທົ່າທຽມ ໂດຍສະເພາະໃຫ້ແກ່ແມ່ຍິງ; ດ້ານວິກິດການ ການປ່ຽນແປງດິນຟ້າອາກາດ ໄດ້ຮຽກຮ້ອງໃຫ້ເລັ່ງລັດການຫັນປ່ຽນອອກຈາກການນໍາໃຊ້ເຊື້ອໄຟຟອດຊິນ, ເພີ່ມການສະໜອງທາງການເງິນ ເພື່ອການປັບຕົວຕໍ່ສະພາບດິນຟ້າອາກາດຢ່າງເປັນທໍາ; ດ້ານ AI ໄດ້ຍົກໃຫ້ເຫັນວ່າ ເປັນອໍານາດຮູບແບບໃໝ່ທີ່ມີການພັດທະນາຢ່າງວ່ອງໄວ ແລະ ອາດສ້າງຄວາມສ່ຽງຖ້າຫາກຂາດການຄຸ້ມຄອງທີ່ດີ ແລະ ຂາດຄວາມໂປ່ງໃສ. ສະນັ້ນ,ຈຶ່ງຮຽກຮ້ອງໃຫ້ວົງຄະນາຍາດສາກົນ ຮ່ວມກັນສ້າງແຜນການຄຸ້ມຄອງຄວາມສ່ຽງດ້ານ AI ແລະ ຮັບ ປະກັນໃຫ້ AI ສາມາດຮັບໃຊ້ມວນມະນຸດ ເພື່ອສ້າງອະນາຄົດໃຫ້ມີສັນຕິພາບ, ຄວາມຍຸຕິທຳ ແລະ ເປັນປະໂຫຍດແກ່ທຸກຄົນ.
ໃນໂອກາດດຽວກັນ, ທ່ານ ຄາລີເລີ ຣາມານ (Khalilur Rahman) ປະທານກອງປະຊຸມສະມັດຊາໃຫຍ່ອົງການ ສປຊ ສະໄໝທີ 81 ກໍໄດ້ເນັ້ນໃສ່ 7 ເນື້ອໃນສໍາຄັນຄື: ການຟື້ນຟູຄວາມເຊື່ອໝັ້ນຕໍ່ອົງການ ສປຊ; ການຮັກສາສັນຕິພາບ ແລະ ຄວາມປອດໄພ; ການປະຕິຮູບສະພາຄວາມໝັ້ນຄົງ ສປຊ; ເລັ່ງລັດການພັດທະນາ; ສິດທິມະນຸດ ແລະ AI; ການປັບປຸງການດຳເນີນງານຂອງສປຊ; ການສົ່ງເສີມຄວາມຮ່ວມມືແບບຮອບດ້ານ ໂດຍການມີສ່ວນຮ່ວມຈາກຫລາຍພາກສ່ວນ.
ພ້ອມນັ້ນ, ທ່ານຮອງນາຍົກລັດຖະມົນຕີ ທອງສະຫວັນ ພົມວິຫານ ຍັງໄດ້ເຄື່ອນໄຫວພົບປະນອກຮອບ ກັບບັນດາຄູ່ຮ່ວມຕໍາແໜ່ງ ກໍຄື ລັດຖະມົນຕີຕ່າງປະເທດຣູມານີ, ອິນໂດເນເຊຍ, ຕີມໍເລັດສະເຕ, ມົງໂກລີ ແລະ ກຽກກິດສະຖານ ຊຶ່ງການພົບປະດັ່ງກ່າວ, ໄດ້ຕີລາຄາສູງຕໍ່ສາຍພົວພັນມິດຕະ ພາບ ແລະ ປຶກສາຫາລືກ່ຽວກັບທິດທາງແຜນການຮ່ວມມືໃນຕໍ່ໜ້າ.
ໃນວັນດຽວກັນ, ຕາມການມອບໝາຍຂອງ ທ່ານຮອງນາຍົກລັດຖະມົນຕີ, ທ່ານ ອານຸພາບ ວົງໜໍ່ແກ້ວ ຮອງລັດຖະມົນຕີກະຊວງການຕ່າງປະເທດ ໄດ້ສືບຕໍ່ເຂົ້າຮ່ວມກອງປະຊຸມລັດຖະມົນຕີຕ່າງ ປະເທດ ອາຊຽນ-ພັນທະມິດພາກພື້ນປາຊີຟິກ(ASEAN-Pacific Alliance Foreign Minister Meeting) ຄັ້ງທໍາອິດ, ຖືເປັນບາດກ້າວສໍາຄັນປະຫວັດສາດ ໃນການຊຸກຍູ້ການຮ່ວມມືລະຫວ່າງສອງອົງການຈັດຕັ້ງພາກພື້ນ. ກອງປະຊຸມໄດ້ຕົກລົງເພີ່ມທະວີການຮ່ວມມືໃນຂົງເຂດຕ່າງໆ ເຊັ່ນ: ການພັດ ທະນາແບບຍືນຍົງ, ການເຊື່ອມຈອດ, ເສດຖະກິດດີຈິຕອນ ແລະ ວັດທະນະທຳ. ພ້ອມດຽວກັນ, ການເຂົ້າຮ່ວມຂອງຄະນະຜູ້ແທນ ສປປ ລາວ ໃນຄັ້ງນີ້ ຍັງໄດ້ສະແດງເຖິງການປະຕິບັດຕາມບົດບາດຢ່າງຕັ້ງໜ້າ ແລະ ການປະກອບສ່ວນສຳຄັນ ເຂົ້າໃນການເພີ່ມທະວີສາຍພົວພັນຮ່ວມມື ອາຊຽນ-ພັນທະມິດພາກພື້ນປາຊີຟິກ.
ສຳລັບ ສປປ ລາວ, ທ່ານ ຮອງນາຍົກລັດຖະມົນຕີ ທອງສະຫວັນ ພົມວິຫານ ມີແຜນຈະຂຶ້ນກ່າວປາໄສໃນກອງປະຊຸມພາກອະພິປາຍທົ່ວໄປຂອງ ສະມັດຊາໃຫຍ່ ອົງການ ສປຊ ສະໄໝທີ 81 ໃນວັນທີ 26 ກັນຍາ 2026. ກອງປະຊຸມດັ່ງກ່າວ, ຈະສືບຕໍ່ດຳເນີນໄປຈົນຮອດວັນທີ 28 ກັນຍາ 2026.
