ຂປລ. ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ໃນວັນທີ 05 ສິງຫາ 2026 ເສັ້ນທາງພູຜາມ່ານ ເມືອງຄູນຄໍາ ແຂວງຄໍາມ່ວນ ໄດ້ຂາດ ເນື່ອງຈາກຝົນຕົກໜັກ ມີນໍ້າເຊາະເສັ້ນທາງເຮັດໃຫ້ທາງຂາດລົດທຸກປະເພດບໍ່ສາມມາດສັນຈອນໄດ້ ຍັງລໍຖ້າພາກສ່ວນກ່ຽວຂ້ອງມາແກ້ໄຂ.
ຈາກສະພາບຝົນຕົກໜັກຕິດຕໍ່ກັນຫລາຍວັນໃນໄລຍະນີ້ ໄດ້ສົ່ງຜົນກະທົບໂດຍກົງຕໍ່ເສັ້ນທາງຄົມມະນາຄົມໃນຫລາຍບ່ອນ. ຫລ້າສຸດ, ໄດ້ມີລາຍງານແຈ້ງເຕືອນຈາກພາກສ່ວນກ່ຽວຂ້ອງ ຫລັງຈາກກະແສນໍ້າໄດ້ເຊາະເຈື່ອນໜ້າດິນຢ່າງຮຸນແຮງ ຈົນເຮັດໃຫ້ເສັ້ນທາງພູຜາມ່ານ ຖືກນໍ້າເຊາະຈົນທາງຂາດ ແລະ ລົດທຸກປະເພດບໍ່ສາມາດສັນຈອນຜ່ານໄປ-ມາໄດ້.
ສຳລັບປະຊາຊົນ, ພໍ່ແມ່ພີ່ນ້ອງ ແລະ ຜູ້ປະກອບການຂົນສົ່ງ ທີ່ມີຄວາມຈຳເປັນຕ້ອງໄດ້ເດີນທາງຜ່ານເສັ້ນທາງດັ່ງກ່າວ ຕ້ອງສຶກສາ ແລະ ວາງແຜນລ່ວງໜ້າ ໂດຍກວດສອບຂໍ້ມູນເສັ້ນທາງຫລີກລ້ຽງ ຫລື ຊອກຫາເສັ້ນທາງທາງເລືອກອື່ນໃຫ້ລະອຽດ ກ່ອນການອອກເດີນທາງ ທັງນີ້ກໍເພື່ອປ້ອງກັນບໍ່ໃຫ້ເສຍເວລາ ແລະ ຕິດຄ້າງກາງທາງ ພ້ອມທັງຕິດຕາມຂ່າວສານທາງການ: ຕິດຕາມເຝົ້າລະວັງສະຖານະການ ແລະ ຄວາມຄືບໜ້າ ໃນການສ້ອມແປງເສັ້ນທາງຈາກເຈົ້າໜ້າທີ່ທ້ອງຖິ່ນຢ່າງໃກ້ຊິດ; ເພີ່ມສະຕິລະມັດລະວັງ ເນື່ອງຈາກໃນໄລຍະລະດູຝົນນີ້ ຫລາຍເສັ້ນທາງອາດມີຄວາມສ່ຽງຈາກດິນເຈື່ອນ ແລະ ນໍ້າໄຫລຊຸ.
