ສະຫະລັດອາເມລິກາ ຍັງຄົງມຸ່ງໝັ້ນໃນການຊ່ວຍເຫຼືອ ສປປ ລາວ ໃນການກຳຈັດລະເບີດບໍ່ທັນແຕກ ທີ່ເປັນອຸປະສັກຕໍ່ການພັດທະນາປະເທດ ພ້ອມທັງສົ່ງເສີມການເພິ່ງພາຕົນເອງ ແລະ ສະຖຽນລະພາບຂອງ ສປປ ລາວ ຢູ່ແຂວງສະຫວັນນະເຂດ.
ທ່ານອຸປະທູດມິແຊລ ເອົ້າລໍ ໄດ້ເຂົ້າຮ່ວມພິທີເປີດໂຄງການໄລຍະໃໝ່ ສຳລັບການສຳຫຼວດ ແລະ ເກັບກູ້ລະເບີດບໍ່ທັນແຕກ ທີ່ໄດ້ຮັບທຶນສະໜັບສະໜູນຈາກສະຫະລັດອາເມລິກາ ແລະ ດຳເນີນງານໂດຍອົງການ The HALO Trust, ເຊິ່ງຈະສືບຕໍ່ດຳເນີນງານຈົນເຖິງເດືອນກັນຍາ ປີ 2027.
ແຂວງສະຫວັນນະເຂດ ເປັນໜຶ່ງໃນບັນດາແຂວງທີ່ໄດ້ຮັບຜົນກະທົບຈາກລະເບີດບໍ່ທັນແຕກຫຼາຍທີ່ສຸດໃນລາວ ແລະ ໄດ້ຮັບສັດສ່ວນການຊ່ວຍເຫຼືອຈາກອາເມລິກາ ຫຼາຍທີ່ສຸດພາຍໃນປະເທດ, ລວມທັງການສະໜັບສະໜູນພະນັກງານຫຼາຍກວ່າ 1,000 ຄົນ ທີ່ໄດ້ຮັບທຶນຈາກອາເມລິກາເພື່ອດຳເນີນການເກັບກູ້ພື້ນທີ່ໄດ້ຮັບຜົນກະທົບລະເບີດບໍ່ທັນແຕກ.
ການຊ່ວຍເຫຼືອນີ້ ຊ່ວຍສົ່ງເສີມການເພິ່ງພາຕົນເອງຂອງ ສປປ ລາວ, ປົກປ້ອງປະຊາຊົນໃນທ້ອງຖິ່ນ ແລະ ຊ່ວຍສ້າງເງື່ອນໄຂທີ່ປອດໄພຍິ່ງຂຶ້ນສຳລັບກິດຈະກຳທາງເສດຖະກິດ ເຊິ່ງເປັນປະໂຫຍດທັງຕໍ່ ສປປ ລາວ ແລະ ຕໍ່ທຸລະກິດ, ບຸກຄົນ ແລະ ປະຊາຊົນຄົນອາເມລິກາທີ່ດຳເນີນງານ ຫຼື ເດີນທາງພາຍໃນລາວ.
ສະຫະລັດອາເມລິກາ ຍັງສືບຕໍ່ສະໜັບສະໜູນການດຳເນີນງານຂອງ The HALO Trust ແລະບັນດາອົງການກວດກູ້ອື່ນໆ ໃນ 9 ແຂວງທົ່ວ ສປປ ລາວ, ເພື່ອຮັບປະກັນວ່າຄວາມພະຍາ ຍາມເຫຼົ່ານີ້ ມີເປົ້າໝາຍທີ່ຊັດເຈນ, ມີຄວາມໂປ່ງໃສ ແລະ ສາມາດກວດສອບໄດ້, ພ້ອມທັງເປັນຜົນປະໂຫຍດຂອງທັງ ສປປ ລາວ ແລະ ສະຫະລັດອາເມລິກາ.
ທີ່ມາຂ່າວ: ສະຖານທູດ ອາເມຣິກາ ປະຈຳລາວ (U.S. Embassy Vientiane)
