ເຊົ້າວັນທີ 27 ສິງຫາ 2026 ຍີ່ປຸ່ນໄດ້ປະກາດຄຳເຕືອນພິເສດຝົນຕົກໜັກລະດັບ 5 ໃນແຂວງອິຊິກາວະ ແລະ ໂທຍາມະ ຫຼັງຈາກຝນຕົກຕໍ່ເນື່ອງຕັ້ງແຕ່ຄືນວັນທີ 26 ສິງຫາ ສົ່ງຜົນໃຫ້ບາງພື້ນທີ່ຂອງເມືອງຮາຄຸິ, ເມືອງຊິກະ ແລະ ເມືອງໂຮດັດສຶຊິມິຊຸ ຖືກຕັດຂາດ ຂະນະທີ່ແມ່ນ້ຳຢ່າງນ້ອຍ 3 ສາຍໃນອິຊິກາວະລົ້ນຕາຝັ່ງ. ປະຊາຊົນປະມານ 180,000 ຄົນ ຫຼື 77,000 ຄົວເຮືອນ ໄດ້ຮັບຄຳສັ່ງເຕືອນໃຫ້ຮັກສາຄວາມປອດໄພສຸກເສີນ ສ່ວນທີ່ເມືອງຮິມິ ແຂວງໂທຍາມະ ມີລາຍງານວ່າມີປະຊາຊົນຕິດຢູ່ພາຍໃນເຮືອນ ແລະ ລົດຍົນ ເຈົ້າໜ້າທີ່ກຳລັງເລັ່ງໃຫ້ການຊ່ວຍເຫຼືອ ເບື້ອງຕົ້ນຍັງບໍ່ມີລາຍງານຜູ້ໄດ້ຮັບບາດເຈັບ
ສຳນັກງານອຸຕຸນິຍົມວິທະຍາຍີ່ປຸ່ນ ຮຽກຮ້ອງໃຫ້ປະຊາຊົນດຳເນີນການເພື່ອຮັກສາຊີວິດໃນທັນທີ ແລະ ເຄື່ອນຍ້າຍໄປສູ່ພື້ນທີ່ປອດໄພ ຫາກການເດີນທາງໄປສູ່ສູນອົບພະຍົບທີ່ກຳນົດໄວ້ມີຄວາມສ່ຽງ ໂດຍເຈົ້າໜ້າທີ່ລະບຸວ່າ ພື້ນທີ່ທີ່ໄດ້ຮັບການເຕືອນໄພມີຄວາມເປັນໄປໄດ້ຢ່າງຍິ່ງວ່າອາດເກີດໄພພິບັດຮຸນແຮງຈາກຝົນຕົກໜັກແລ້ວ ທັງນ້ຳໃນແມ່ນ້ຳລົ້ນຕາຝັ່ງເຂົ້າຖ້ວມພື້ນທີ່ ແລະ ນ້ຳຖ້ວມໃນພື້ນທີ່ລຸ່ມຕ່ຳ ຫຼື ບໍລິເວນເວນໃຕ້ດິນ
ເຈົ້າໜ້າທີ່ລະບຸວ່າ ສໍາລັບຜູ້ທີ່ບໍ່ສາມາດອົບພະຍົບອອກຈາກອາຄານໄດ້ຢ່າງປອດໄພ ເຈົ້າໜ້າທີ່ແນະນຳໃຫ້ຍ້າຍຂຶ້ນໄປຊັ້ນທີ່ສູງຂຶ້ນ ເພື່ອຫຼີກລ່ຽງກະແສນ້ຳ ແລະ ພື້ນທີ່ສ່ຽງໄພ ໂດຍຂໍໃຫ້ປະຊາຊົນຕິດຕາມປະກາດເຕືອນໄພ ແລະ ປະຕິບັດຕາມຄຳແນະນຳຂອງເຈົ້າໜ້າທີ່ຢ່າງເຂັ້ມງວດ
ທີ່ມາ: NHK
