ວັນທີ 26 ສິງຫາ 2026, ພົທ ວັນທອງ ກອງມະນີ ຄະນະເລຂາທິການສູນກາງພັກ ລັດຖະມົນຕີກະຊວງ ປກສ ລົງເຄື່ອນໄຫວຕິດຕາມ-ກວດກາ ແລະ ຊີ້ນຳການປະຕິບັດໜ້າທີ່ວຽກງານຂອງເຈົ້າໜ້າທີ່ຄະນະສະເພາະກິດແກ້ໄຂອາຊະຍາກຳທາງອິນເຕີເນັດ, ການພະນັນອອນລາຍ ຂັ້ນກະຊວງ ປກສ ທີ່ໄດ້ລົງມ້າງກຸ່ມແກ້ງກໍ່ອາຊະຍາກຳດັ່ງກ່າວຢູ່ 2 ຈຸດເປົ້າໝາຍຄື: ຈຸດ ບ້ານຫລັກຫີນ ແລະ ຈຸດ ບ້ານຫ້ວຍຫ້ອມ ເມືອງສີໂຄຕະບອງ ນະຄອງຫລວງວຽງຈັນ.
ການລົງຕິດຕາມ-ກວດກາຂອງທ່ານ ລັດຖະມົນຕີກະຊວງ ປກສ ໃນຄັ້ງນີ້ ແມ່ນພາຍຫລັງທີ່ເຈົ້າໜ້າທີ່ຄະນະສະເພາະກິດ ສົມທົບກັບເຈົ້າໜ້າທີ່ທີ່ກ່ຽວຂ້ອງ ໄດ້ລົງມ້າງ ແລະ ເຂົ້າກວດຄົ້ນຈຸດກໍ່ອາຊະຍາກຳທາງອິນເຕີເນັດທັງ 2 ຈຸດ ໄດ້ຢ່າງທັນການ, ເຊິ່ງສາມາດຈັບກຸມຕົວຜູ້ຕ້ອງຫາໄດ້ 2 ຄົນ ພ້ອມຢຶດເຄື່ອງຂອງກາງ: ໂນດບຸກ, ຊິມມືຖື, ບັອກຊິມ, ເຄື່ອງຮັບ-ສົ່ງສັນຍານອິນເຕີເນັດ, ໝໍ້ເກັບໄຟ ແລະ ອຸປະກອນອື່ນອີກຈຳນວນໜຶ່ງ.
ທ່ານ ລັດຖະມົນຕີ ກະຊວງ ປກສ ໄດ້ສະແດງຄວາມຍ້ອງຍໍຊົມເຊີຍມາຍັງເຈົ້າໜ້າທີ່ຄະນະສະເພາະກິດ ແລະ ເຈົ້າໜ້າທີ່ທຸກພາກສ່ວນ ທີ່ໄດ້ສຸມສະຕິປັນຍາ, ຄວາມພະຍາຍາມ ແລະ ຄວາມຮັບຜິດຊອບສູງ ເຂົ້າໃນການປະຕິບັດໜ້າທີ່ສືບຊອກຫາຂໍ້ມູນ, ເກັບກຳເປົ້າໝາຍ ຈົນສາມາດມ້າງກຸ່ມກໍ່ອາຊະຍາກຳດັ່ງກ່າວໄດ້ຢ່າງມີຜົນສຳເລັດ, ພ້ອມທັງໄດ້ເນັ້ນໃຫ້ເຈົ້າໜ້າທີ່ຄະນະສະເພາະກິດ ແລະ ເຈົ້າໜ້າທີ່ ທີ່ກ່ຽວຂ້ອງ ເອົາໃຈໃສ່ຄຸ້ມຄອງ ແລະ ຮັກສາເຄື່ອງຂອງກາງທັງໝົດທີ່ຢຶດມາໄດ້ໃຫ້ມີຄວາມປອດໄພ ແລະ ຖືກຕ້ອງຕາມລະບຽບການ ເພື່ອໃຊ້ເປັນຫລັກຖານໃນການດຳເນີນຄະດີຕາມຂັ້ນຕອນຂອງກົດ ໝາຍຢ່າງເຂັ້ມງວດ.
ພ້ອມດຽວກັນນີ້, ທ່ານ ຍັງໄດ້ຊີ້ນຳເຈົ້າໜ້າທີ່ຄະນະສະເພາະກິດ ແລະ ກຳລັງເຈົ້າໜ້າທີ່ທຸກພາກສ່ວນ ສືບຕໍ່ເພີ່ມຄວາມເອົາໃຈໃສ່, ເຄື່ອນໄຫວ ເກັບກຳຂໍ້ມູນ ແລະ ຊອກຫາກວາດລ້າງກຸ່ມກໍ່ອາຊະຍາກຳທາງອິນເຕີເນັດ, ພະນັນອອນລາຍ ແລະ ປະກົດການຫຍໍ້ທໍ້ຕ່າງໆ ທີ່ຍັງຫຼົບຊ່ອນຢູ່ ສປປ ລາວ ເພື່ອປົກປ້ອງຜົນປະໂຫຍດຂອງປະຊາຊົນ, ສ້າງຄວາມໄວ້ເນື້ອເຊື່ອໃຈ, ຮັບປະກັນໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ມີຄວາມປອດໄພຢ່າງແທ້ຈິງ.
