ໃນວັນທີ 15 ກໍລະກົດ 2026, ຢູ່ທີ່ດ່ານສາກົນບໍ່ເຕນ ສປປ ລາວ – ບໍ່ຫານ ສປ ຈີນ, ໄດ້ມີພິທີມອບ-ຮັບ ຜູ້ຖືກຫາສັນຊາດຈີນ ທີ່ກະທຳຜິດກົດໝາຍ ຢູ່ ສປປ ລາວ ລະຫວ່າງ ກອງບັນຊາການ ປກສ ແຂວງບໍ່ແກ້ວ ສປປ ລາວ ແລະ ເຈົ້າໜ້າທີ່ວິຊາສະເພາະ ສປ ຈີນ ເພື່ອນໍາສົງຕົວໄປດໍາເນີນຄະດີຕາມຂັ້ນຕອນກົດໝາຍ.
ຕາງໜ້າຝ່າຍລາວມີ ພັຕ ສີສະຫວາດ ໄຊຍະແສງ ຮອງຫົວໜ້າພະແນກຕຳຫຼວດຄຸ້ມຄອງຄົນຕ່າງປະເທດ, ທ່ານ ພັຕ ສຸທິພາບ ແຊ່ຜານ ຮອງຫົວໜ້າພະແນກຕຳຫຼວດຄຸ້ມຄອງການທ່ອງທ່ຽວ ແລະ ຕິດຕາມເປົ້າໝາຍ ພ້ອມດ້ວຍຄະນະ ແລະ ເຈົ້າໜ້າທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ຜູ້ຖືກຫາສັນຊາດຈີນທີ່ຖືກສົ່ງຕົວໃນຄັ້ງນີ້ ມີຈຳນວນທັງໝົດ 71 ຄົນ, ຍິງ 06 ໃນນັ້ນມີ: ຜູ້ຖືກຫາຄະດີສໍ້ໂກງຊັບທາງໂທລະຄົມ ແລະ ການສື່ສານ ຫຼື ສະແກມເມີ ຈໍານວນ 66 ຄົນ, ຍິງ 4 ຄົນ, ຜູ້ຖືກຫາຂໍ້ຫາເຂົ້າເມືອງຜິດກົດໝາຍ 5 ຄົນ, ຍິງ 2 ຄົນ.
ການມອບ-ຮັບ ຜູ້ຖືກຫາໃນຄັ້ງນີ້ ແມ່ນປະຕິບັດຕາມທິດຊີ້ນໍາຂອງຂັ້ນເທິງ ກໍຄືການຮ່ວມມືລະຫວ່າງ ເຈົ້າໜ້າທີ່ປ້ອງກັນຄວາມສະຫງົບ ຂອງ ສປປ ລາວ ແລະ ສປ ຈີນ ໃນການສະກັດກັ້ນ ແລະ ຕ້ານອາດຊະຍາກຳຂ້າມຊາດ, ໂດຍສະເພາະແມ່ນບັນຫາການສໍ້ໂກງຊັບທາງໂທລະຄົມ ແລະ ການລັກລອບເຂົ້າເມືອງໂດຍບໍ່ຖືກຕ້ອງ ທີ່ສ້າງຄວາມບໍ່ສະຫງົບໃຫ້ແກ່ສັງຄົມ.
ຂ່າວ: ປກສ ແຂວງບໍ່ແກ້ວ
