ເພື່ອປະຕິບັດຕາມລະບຽບກົດໝາຍ ແລະ ກົນໄກການຮ່ວມມືວຽກງານຕໍາຫຼວດລະຫວ່າງສອງ ປະເທດ, ໃນວັນທີ 17 ກໍລະກົດ 2026 ທີ່ດ່ານສາກົນຂົວມິດຕະພາບລາວ-ໄທ 1 ນະຄອນຫຼວງວຽງຈັນ-ໜອງຄາຍ, ກົມຕຳຫຼວດເສດຖະກິດ ກົມໃຫຍ່ຕຳຫຼວດ ໂດຍການປະສານສົມທົບກັບ ກົມ ຕຳຫຼວດພົວພັນຕ່າງປະເທດ ຫ້ອງວ່າການ ກະຊວງປ້ອງກັນຄວາມສະຫງົບ ໄດ້ມອບຜູ້ຖືກຫາຕອບແຊັດເວັບພະນັນອອນລາຍສັນຊາດໄທ ຈໍານວນ 20 ຄົນ, ຍິງ 8 ຄົນ ໃຫ້ທາງການໄທ ກັບໄປດຳເນີນຄະດີຕາມລະບຽບກົດໝາຍຢູ່ຣາຊະອານາຈັກໄທ.
ໂອກາດນີ້, ທັງສອງຝ່າຍໄດ້ເຊັນບົດບັນທຶກມອບ-ຮັບ ຕົວຜູ້ຖືກຫາຈໍານວນດັ່ງກ່າວ ເຊັນມອບຝ່າຍລາວແມ່ນ ພັທ ຄໍາໄພທູນ ລໍວັນຫງຽນ ຮອງຫົວໜ້າກົມຕຳຫຼວດເສດຖະກິດ ແລະ ເຊັນຮັບຝ່າຍໄທແມ່ນ ພັທ ຕີຢາຊາພັດ ຣຸ່ງສີບຣູມານະກູນ ຮອງຜູ້ບັງຄັບ ການກວດຄົນເຂົ້າ-ອອກເມືອງ 4 ປະເທດໄທ, ມີຄະນະຮັບຜິດຊອບທັງສອງຝ່າຍເຂົ້າຮ່ວມເປັນສັກຂີພະຍານ.
ຜູ້ຖືກຫາດັ່ງກ່າວ, ຖືກເຈົ້າໜ້າທີ່ກົມຕຳຫຼວດເສດຖະກິດ ກົມໃຫຍ່ຕຳຫຼວດ ກັກຕົວໄດ້ໃນຂະນະທີ່ເຈົ້າໜ້າທີ່ ສົມທົບກັບພາກສ່ວນທີ່ກ່ຽວຂ້ອງ ເຂົ້າກວດຄົ້ນ ຊັ້ນ 18, 21 ແລະ ຊັ້ນ 22 ຂອງອາພັດເມັນ ວຽງຈັນ ໄລເຊັນເຕີ ຕັ້ງຢູ່ບ້ານໜອງຈັນ ເມືອງສີສັດຕະນາກ ນະຄອນຫຼວງວຽງຈັນ ພົບເຫັນກຸ່ມແກ້ງໃຫ້ບໍລິການຕອບແຊັດເວັບພະນັນອອນລາຍ 24 ຄົນ, ໃນນີ້ ມີຄົນໄທ ຈໍານວນ 20 ຄົນ ຍິງ 8 ຄົນ ແລະ ຄົນລາວ 4 ຄົນ ຍິງ 3 ຄົນ ແລະ ອຸປະກອນ ທີ່ນໍາໃຊ້ເຂົ້າໃນການເຄື່ອນໄຫວກະທຳຜິດມີ: ຄອມພິວເຕີຕັ້ງໂຕະ ຈໍານວນ 7 ຊຸດ, ຄອມພິວເຕີໂນດບຸກ 9 ເຄື່ອງ, ຈໍຄອມພິວເຕີ ຈໍານວນ 9 ຈໍ, ໂທລະສັບມືຖື ຈໍານວນ 42 ໜ່ວຍ, ເຊິ່ງການກະທໍາຂອງພວກກ່ຽວແມ່ນ ຜິດຕໍ່ລະບຽບກົດໝາຍຂອງ ສປປ ລາວ ເປັນຕົ້ນແມ່ນຜິດຕໍ່ປະມວນກົດໝາຍອາຍາມາດຕາ 141 ໃນ ສະຖານ: ການຫຼິ້ນການພະນັນທີ່ຕ້ອງຫ້າມ.
ໃນໂອກາດນີ້, ຂໍຝາກເຕືອນມາຍັງທຸກຄົນໃນທົ່ວສັງຄົມຈົ່ງມີສະຕິຕໍ່ເລ່ຫຼ່ຽມກົນອຸບາຍຂອງ ພວກກຸ່ມຄົນບໍ່ດີ ແລະ ຫ້າມຫຼິ້ນການພະນັນທາງອອນລາຍທຸກປະເພດ; ເຈົ້າຂອງເຄຫະສະຖານ, ຜູ້ຫຼິ້ນການພະນັນ, ເຈົ້າຂອງເວັບ ຫຼື ເຈົ້າຂອງກິດຈະການ ບໍ່ວ່າຄົນລາວ ຫຼື ຄົນຕ່າງປະເທດ ທີ່ມີເຄື່ອນໄຫວຢູ່ ສປປ ລາວ ກໍມີຄວາມຜິດຕໍ່ປະມວນກົດໝາຍອາຍາ ແລະ ຝາກເຖິງພໍ່ແມ່ປະຊາຊົນ, ພໍ່ຄ້າຊາວຂາຍ ນັບເຖິງພະນັກງານທຸກຄົນຫາກພົບເຫັນບຸກຄົນ ຫຼື ກຸ່ມຄົນທີ່ໜ້າສົງໄສ ແມ່ນໃຫ້ແຈ້ງຕໍ່ເຈົ້າໜ້າທີ່ຢ່າງຮີບດ່ວນ ຫຼື ສາມາດ ແຈ້ງມາຍັງເພຈ໌ເຟສບຸກຂອງພວກເຮົາໄດ້ ເພື່ອເປັນການປະກອບສ່ວນສະກັດກັ້ນປະກົດການຫຍໍ້ທໍ້ໃນ ສັງຄົມໃຫ້ນັບມື້ຫຼຸດໜ້ອຍຖອຍລົງ.
ພາບ-ຂ່າວ: ແກ້ວ ອຸເພັດ
