ຕາມການລາຍງານຂອງກອງເລຂາຄະນະກຳມະການຄູມຄອງໄພພິບັດຂັ້ນແຂວງ ໃນຕອນເຊົ້າວັນທີ 16 ກໍລະກົດ 2026 ໄດ້ໃຫ້ຮູ້ວ່າ: ເນື່ອງຈາກຝົນຕົກຕິດຕໍ່ກັນມາເປັນເວລາຫຼາຍວັນ ໄດ້ເຮັດໃຫ້ດິນບໍ່ສາມາດຮັບປະລິມານນ້ຳຝົນນັ້ນໄດ້ ຈື່ງເປັນຕົ້ນເຫດພາໃຫ້ດິນເຊາະເຈື່ອນໃນເຂດທີ່ມີພູຜາສູງຊັນ ໂດຍສະສະເພາະເຂດພູໄຮຕາມເສັ້ນທາງ ເລກ 8 A ຊ່ວງໄລຍະພູໄຮ ເມືອງຄູນຄຳ ແຂວງຄຳມ່ວນ ຫາ ບ້ານໜອງກອກ, ເຂດບ້ານທ່າບັກ ຂອງເມືອງຄຳເກີດ ແຂວງບໍລິຄຳໄຊ ແລະ ເສັ້ນທາງ 1 D ເຂດພູໃກ້ກັບບ້ານນາດີ ເມືອງວຽງທອງ ໄດ້ມີດິນເຈື່ອນລົງທັບເສັ້ນທາງບໍສາມາດສັນຈອນໄປມາໄດ້ ສະເພາະເສັ້ນທາງເລກ 8 A ການສັນຈອນໄດ້ຖືກຕັດຂາດ ພາຫະນະບໍ່ສາມາດໄປມາໄດ້.
ນອກນັ້ນເກີດມີນ້ຳຖ້ວມເສັ້ນທາງ, ບ້ານເຮືອນປະຊາຊົນ ເຂດບ້ານໂພນຕານ ເມືອງຄຳເກີດ, ຮ້າຍແຮງໄປກົ່ວນັ້ນ ໃນເວລາ 2,00 ໂມງ ຂອງວັນທີ 16 ກໍລະກົດ 2026 ໄດ້ມີດິນເຊາະເຈື່ອນລົງທັບໃສ່ເຮືອນປະຊາຊົນຢຸ່ບ້ານທ່າບັກ ເມືອງຄຳເກີດ ໃນຂະນະຜູ້ຄົນກຳລັງນອນຫຼັບຢູ່ ເຮັດໃຫ້ມີຜຸ້ເສຍຊີວິດ 3 ຄົນ ໃນນັ້ນມີແມ່ ແລະ ລູກ 2 ຄົນ ຕໍ່ສະພາບການດັ່ງກ່າວ ທາງຄະນະກຳມະການຄູ້ມໄພພິບັດຂອງແຂວງບໍລິຄຳໄຊ ແລະ ເມືອງຄຳເກີດ, ເມືອງວຽງທອງ ໄດ້ເລັ່ງໃສ່ການແກ້ໄຂເສັ້ນທາງທີ່ຖືກດິນເຈື່ອນທັບ ເຮັດໃຫ້ການສັນຈອນໄປມາໄດ້ປົກກະຕິ, ເຂົ້າຊ່ວຍເຫຼືອຄອບຄົວຂອງປະຊາຊົນທີ່ຖືກຜົນກະທົບດິນເຈື່ອນລົງທັບເຮືອນ ແລະ ຊ່ວຍເຫຼືອຜູ້ເສຍຊີວິດ, ຕໍ່ສະພາບການເສຍຫາຍນັ້ນທາງກອງເລຂາຄະນະກຳມະການຄູ້ມຄອງໄພພິບັດ ຂັ້ນແຂວງ ແລະ ເມືອງ ຍັງຈະສືບຕໍ່ລົງຕິດຕາມພ້ອມທັງປະເມີນຄວາມເສຍເປັນໄລຍະ, ສ່ວນການຄືບໜ້າໃນການແກ້ໄຂໄພພິບັດຄັ້ງນີ້ທາງທີມງານຂ່າວພວກເຮົາຈະນຳສະເໜີຂ່າວ ໃຫ້ສັງຄົມຮັບຮູ້ເປັນໄລຍະ.
ພາບ, ຂ່າວ: ກອງເລຂາຄະນະກຳມະການຄວບຄູມໄພພິບັດ
