ປກສ ແຂວງຊຽງຂວາງ ລາຍງານວ່າ: ວັນທີ 3 ມິຖຸນາ 2026 ຜ່ານມານີ້, ເຈົ້າໜ້າທີ່ກອງບັນຊາການ ປ້ອງກັນຄວາມສະຫງົບ ເມືອງແປກ ໄດ້ມ້າງກຸ່ມແກ້ງເຄື່ອນໄຫວລັກລົດຈັກ ຢູ່ຂອບເຂດເທດສະບານ. ສາມາດກັກຕົວຜູ້ຖືກຫາໄດ້ 3 ຄົນ ຄື: ທ້າວ ຄຳຫລ້າ ອາຍຸ 19 ປີ ແລະ ທ້າວ ສິນທະນູ ອາຍຸ 16 ປີ ທັງສອງຢູ່ບ້ານສາຍລົມ ເມືອງແປກ ແຂວງຊຽງຂວາງ. ທ້າວ ບຸນຖົມ ອາຍຸ 19 ປີ, ຢູ່ບ້ານໂງ້ຍ ເມືອງແປກ ແຂວງຊຽງຂວາງ. ພ້ອມທັງຂອງກາງລົດຈັກ ທີ່ພວກກ່ຽວຮ່ວມກັນລັກ ທັງໝົດ 17 ຄັນ ມາດຳເນີນການສອບສວນ.
ຜ່ານການສືບສວນ-ສອບສວນຂອງເຈົ້າໜ້າທີ່, ພວກກ່ຽວທັງ 3 ຄົນ ໄດ້ຮັບສາລະພາບວ່າ ຮ່ວມກັນລັກລົດຈັກຈຳນວນດັ່ງກ່າວແທ້, ໃນນີ້: ທ້າວ ຄຳລ້າ ໄດ້ຮ່ວມກັບ ທ້າວ ສິນທະນູ ລັກໄດ້ຈຳນວນ 6 ຄັນ, ຈາກນັ້ນ ທ້າວ ຄຳຫລ້າ ໄດ້ຮ່ວມກັບ ທ້າວ ບຸນຖົມ ລັກໄດ້ຈຳນວນ 4 ຄັນ. ສ່ວນທ້າວ ຄຳຫລ້າ ລັກຄົນດຽວ ໄດ້ຈຳນວນ 7 ຄັນ. ພາຍຫລັງລັກແລ້ວ ກໍໄດ້ເອົາລົດຈັກດັ່ງກ່າວ ໄປເລາະຂາຍໃຫ້ປະຊາຊົນຢູ່ພາຍໃນແຂວງຊຽງຂວາງ ເພື່ອເອົາເງິນໄປຫລິ້ນກິນຟຸມເຟືອຍຈົນໝົດ.
ປັດຈຸບັນ, ເຈົ້າໜ້າທີ່ກອງບັນຊາການ ປ້ອງກັນຄວາມສະຫງົບ ເມືອງແປກ ສາມາດເກັບກູ້ເອົາເຄື່ອງຂອງກາງລົດຈັກມາໄດ້ຈຳນວນ 17 ຄັນ. ພ້ອມນີ້ ເຈົ້າໜ້າທີ່ຍັງເລັ່ງສືບຕໍ່ດຳເນີນການສືບສວນ-ສອບສວນ ພວກກ່ຽວທັງ 3 ຄົນ ໃຫ້ຈະແຈ້ງ ເພື່ອດຳເນີນຄະດີຕາມລະບຽບກົດໝາຍ. ສຳລັບລົດຈັກທີ່ເຈົ້າໜ້າທີ່ເກັບກູ້ໄດ້ໃນຄັ້ງນີ້ ແມ່ນຈະແຈ້ງໃຫ້ຜູ້ເສຍຫາຍ ນຳເອົາເອກະສານທີ່ຖືກຕ້ອງ ມາຍັ້ງຢືນເອົານຳເຈົ້າໜ້າທີ່ ຕາມລະບຽບຫລັກການ.
