ແຫລ່ງຂ່າວຈາກ ແຂວງຫລວງນ້ຳທາ ໃຫ້ຮູ້ວ່າ: ຫ້ອງການອຸດສະຫະກໍາ ແລະ ການຄ້າ ເມືອງສິງ ແຂວງຫລວງນໍ້າທາ ຈັດພິທີທໍາລາຍສິນຄ້ານໍາເຂົ້າບໍ່ຖືກຕ້ອງ (ປະເພດເບຍ) ແລະ ສິນຄ້າໝົດອາຍຸ (ເສື່ອມຄຸນນະພາບ) ໃນວັນທີ 10 ກັນຍາ 2026 ໂດຍມີທ່ານ ສົມລິດ ພອນປະເສີດ ປະທານຄະນະກໍາມະການປົກຄອງເມືອງ ພ້ອມດ້ວຍຫ້ອງການອ້ອມຂ້າງເມືອງ, 2 ກໍາລັງ ປກຊ-ປກສ, ຄະນະກໍາມະການປົກຄອງຕາແສງ, ນາຍບ້ານ ແລະ ວິຊາການຫ້ອງການທີ່ກ່ຽວຂ້ອງເຂົ້າຮ່ວມ.
ທ່ານ ຈັນສຸກ ຈັນທະໄຊ ກໍາມະການພັກເມືອງສິງ ໄດ້ລາຍງານກ່ຽວກັບການທໍາລາຍສິນຄ້ານໍາເຂົ້າບໍ່ຖືກຕ້ອງ ແລະ ສິນຄ້າເສື່ອມຄຸນນະພາບ ຊຶ່ງມີເບຍຈີນ ປ່ອງສີຂຽວ 42 ແກັດ, ເບຍຈີນແກັດສີແດງ 30 ແກັດ, ເບຍປ່ອງ V6 ຈໍານວນ 10 ແພັກ, ເຄື່ອງດື່ມປະເພດ ໂຄຄາໂຄລາ 1 ແພັກ, ລວມເບຍທີ່ກວດ ແລະ ຢຶດໄດ້ 88 ແກັດ ແລະ ລວມມູນຄ່າ 7,1 ລ້ານກວ່າກີບ.
ຈຸດປະສົງຂອງການທໍາລາຍສິນຄ້າໃນຄັ້ງນີ້ ກໍເພື່ອສະກັດກັ້ນການລັກລອບນໍາເຂົ້າສິນຄ້າ ທີ່ບໍ່ໄດ້ເສຍພາສີອາກອນນໍາເຂົ້າບໍ່ຖືກຕ້ອງ ຕາມຂັ້ນຕອນຂອງລະບຽບການ ແລະ ກົດໝາຍ ທັງເປັນການສົ່ງເສີມການຊົມໃຊ້ສິນຄ້າທີ່ຜະລິດຢູ່ພາຍໃນ ເພື່ອປົກປ້ອງສິດ ແລະ ຜົນປະໂຫຍດຂອງຜູ້ຊົມໃຊ້ ໂດຍສະເພາະ ທາງດ້ານຄຸນະພາບຂອງສິນຄ້າ ໃຫ້ນັບມື້ນັບດີຂຶ້ນເທື່ອລະກ້າວ.
ຂ່າວ: ກີ່ງແກ້ວ ເສົາຈັນຖາ
