ວັນທີ 9 ກັນຍາຜ່ານມາ ທີ່ສະຖານນີຄ່ຽນຖ່າຍສິນຄ້າວຽງຈັນໃຕ້ ບ້ານນາຄວາຍໃຕ້ ເມືອງໄຊເສດຖາ ນະຄອນຫຼວງວຽງຈັນ, ສະຫາຍ ພົນຕີ ຈັນດີ ສຸລິວົງສັກ ຫົວໜ້າກົມໃຫຍ່ພະລາທິການກອງທັບ ຫົວໜ້າຄະນະຊີ້ນໍາການຝຶກຊ້ອມຮ່ວມສອງກອງທັບ ລາວ-ຈີນ ພາຍໃຕ້ລະຫັດ “ຂະບວນລົດໄຟສັນຕິພາບ-2026” ພ້ອມດ້ວຍບັນດາຄະນະອະນຸກຳມະການ ໄດ້ເຄື່ອນໄຫວຕິດຕາມ ກວດກາຄວາມພ້ອມຂອງຄະນະຮັບຜິດຊອບ, ກຳລັງພົນ ແລະ ພາກສ່ວນຕ່າງໆ ກ່ອນການຝຶກຊ້ອມຕົວຈິງ.
ການເຄື່ອນໄຫວຄັ້ງນີ້, ໄດ້ເນັ້ນໜັກໃສ່ການກວດກາຄວາມພ້ອມໂດຍລວມ, ການກະກຽມບັນດາເນື້ອໃນການຝຶກຊ້ອມ, ການຈັດວາງໜ້າທີ່ຂອງແຕ່ລະພາກສ່ວນ, ການປະສານງານ ແລະ ການກະກຽມດ້ານວັດຖຸອຸປະ ກອນການແພດ.
ພ້ອມນີ້, ຍັງໄດ້ເນັ້ນໜັກໃຫ້ບັນດາຄະນະຄູຝຶກ ແລະ ກຳລັງພົນມີຄວາມພ້ອມທາງດ້ານຮ່າງກາຍຮັກສາລະບຽບວິໄນ, ປະຕິບັດຕາມແຜນການ ແລະ ປະສານງານກັນຢ່າງເປັນເອກະພາບ.
ຂ່າວ: ໂຊເລ້ ບຸນເຮືອງ
