ເລຂາທິການສະຫະປະຊາຊາດເຕືອນ ຄວາມຮຸນແຮງທີ່ຍືດເຍື້ອ ແລະ ກັບມາຮ້ອນແຮງລະຫວ່າງສະຫະລັດ ກັບ ອີຣ່ານ ກຳລັງສ້າງຜົນກະທົບເກີນຂອບເຂດພາກພື້ນ ພ້ອມເຕືອນວ່າ ການຢຸດຍິງທີ່ມີຢູ່ເປັນພຽງການຫຼຸດລະດັບຄວາມຮຸນແຮງຊົ່ວຄາວ ແລະ ອາດລຸກລາມເປັນຄວາມຂັດແຍ່ງຄັ້ງໃຫຍ່ຮອບໃໝ່.
ສຳນັກຂ່າວຕ່າງປະເທດລາຍງານຈາກນະຄອນນິວຢອກ ສະຫະລັດອາເມລິກາ ໃນວັນທີ 11 ມິຖຸນາ ວ່າ ທ່ານ ອັນໂຕນິໂອ ກູເຕຣີດ ເລຂາທິການສະຫະປະຊາຊາດ (ສປຊ.) ໄດ້ກ່າວເຖິງການທີ່ສະຫະລັດ ແລະ ອີຣ່ານກັບມາປະທະກັນຕໍ່ເນື່ອງເປັນວັນທີສອງ ວ່າ ພາກພື້ນຕາເວັນອອກກາງກຳລັງຖືກດຶງໃຫ້ດິ່ງລຶກເຂົ້າສູ່ວິກິດການທີ່ຮຸນແຮງຍິ່ງຂຶ້ນ ຊຶ່ງຈະສ້າງຜົນກະທົບໃນວົງກວ້າງຢ່າງຍາກຈະຫຼີກລ່ຽງ ເພາະມີທ່າໂນ້ມຂະຫຍາຍອອກໄປໄກກວ່າພາກພື້ນຕາເວັນອອກກາງ.
ທ່ານ ກູເຕຣີດ ກ່າວຕື່ມອີກວ່າ ຂໍ້ຕົກລົງຢຸດຍິງລະຫວ່າງສະຫະລັດ ກັບ ອີຣ່ານໃນຕອນນີ້ ສາມາດເອີ້ນໄດ້ວ່າເປັນພຽງ “ການຫຼຸດລະດັບຄວາມຮຸນແຮງລົງໜ້ອຍໜຶ່ງ” ເທົ່ານັ້ນ ແລະ ຍ້ຳວ່າທຸກຝ່າຍ “ບໍ່ຄວນປະເມີນສະຖານະການຕ່ຳເກີນໄປ” ພ້ອມຮຽກຮ້ອງທຸກພາກສ່ວນເພີ່ມຄວາມຮ່ວມມື ເພື່ອມຸ່ງສູ່ການຊອກຫາທາງອອກດ້ານການທູດຮ່ວມກັນ.
ຂ່າວຈາກ: REUTERS…
