ຂ່າວເມືອງຊະນະຄາມ ແຂວງວຽງຈັນ ລາຍງານວ່າ: ວັນທີ 8 ມິຖຸນາ 2026 ທີ່ກອງບັນຊາການ ປກສ ເມືອງ ຈັດພິທີ ຈູດທໍາລາຍໃບກະທ່ອມ ໂດຍການເຂົ້າຮ່ວມ ຂອງທ່ານ ພອນເພັດ ອຸດົມມີໄຊ ຮອງປະທານຄະນະກຳມະການປົກຄອງເມືອງ, ທ່ານ ພັທ ບົວຂາວ ກຸດແກ້ວ ສະມາຊິກສະພາປະຊາຊົນແຂວງວຽງຈັນ ປະຈໍາເຂດເລືອກຕັ້ງເມືອງຊະນະຄາມ, ຫົວຫນ້າກອງບັນຊາການ ປກສ ເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໃບກະທ່ອມ ທີ່ນໍາມາຈູດທໍາລາຍໃນຄັ້ງນີ້, ມີທັງໝົດ 2 ກະສອບ, ລວມນໍ້າໜັກ 60 ກິໂລກຣາມ, ເຊິ່ງໄດ້ມາຈາກການເຄື່ອນໄຫວວຽກງານວິຊາສະເພາະຂອງກຳລັງ ປກສ ເມືອງ ສົມທົບຮ່ວມກັບກຳລັງກອງຮ້ອຍຊາຍແດນ 321ຕາມລໍາແມ່ນໍ້າຂອງ ໃນຄັ້ງວັນທີ 14 ພຶດສະພາ 2026 ທີ່ຜ່ານມາ ກວດພົບສິ່ງຜິດກົດໝາຍ ຢູ່ບໍລິເວນແຄມຂອງ ເໜືອບ້ານຜາລາດ ເມືອງຊະນະຄາມ, ຈາກການສັນນິຖານເບື້ອງຕົ້ນຄາດວ່າ ມີກຸ່ມຄົນບໍ່ດີພາຍໃນໄດ້ລັກນໍາເຂົ້າຈາກຕ່າງປະເທດ ໂດຍນໍາໃຊ້ເຮືອຈັກລໍາລຽງຂ້າມຕາມລໍາແມ່ນໍ້າຂອງ ເພື່ອນໍາມາຈໍາໜ່າຍຢູ່ພາຍໃນເມືອງ ແຕ່ພົບການເຄື່ອນ ໄຫວຂອງເຈົ້າໜ້າທີ່ ຈຶ່ງໄດ້ເອົາໂຕລົບໜີໄປ ຈຶ່ງບໍ່ສາມາດນໍາຜູ້ກະທໍາຜິດມາດຳເນີນຄະດີ.
