ຖືເປັນຂ່າວທີ່ສ້າງຄວາມພາກພູມໃຈຢ່າງຍິ່ງໃຫ້ກັບວົງການບານເຕະເຍົາວະຊົນລາວ ແລະ ສະໂມສອນ ວິໄລກຸນນາຄາ (W.I.G NAGA) ເມື່ອ ນ້ອງ ອານຸສັກ ວິໄລກຸນ ຫຼື ທີ່ຮູ້ຈັກກັນໃນນາມ “ບິວເກດ” (ເມສຊີ້ລາວ) ໄດ້ສ້າງຜົນງານອັນໂດດເດັ່ນໃນເວທີສາກົນ.
ໃນການແຂ່ງຂັນບານເຕະເຍົາວະຊົນລາຍການ TAR U11 PROMISES 2026 ທີ່ປະເທດສະເປນ ທີ່ຜ່ານມາ, ນ້ອງ ອານຸສັກ ສາມາດຍາດໄດ້ລາງວັນອັນຊົງກຽດ ໂດຍຖືກຄັດເລືອກໃຫ້ຕິດໃນ “THE IDEAL 7” ຫຼື 1 ໃນ 7 ນັກເຕະດີເດັ່ນປະຈຳທົວຣ໌ນາເມັ້ນ ເຊິ່ງເປັນນັກເຕະລາວພຽງຄົນດຽວທີ່ໄດ້ຮັບການຄັດເລືອກໃນຄັ້ງນີ້ ແລະ ຍອມຮັບໃຫ້ເປັນນັກເຕະທີ່ດີທີ່ສຸດໃນຕຳແໜ່ງ ກອງກາງ ເວທີລະດັບໂລກ ຜົນງານດັ່ງກ່າວເກີດຂຶ້ນທ່າມກາງການແຂ່ງຂັນກັບນັກເຕະເຍົາວະຊົນຈາກສະໂມສອນຊັ້ນນຳລະດັບໂລກທີ່ເຂົ້າຮ່ວມ.
ການໄດ້ຮັບລາງວັນໃນຄັ້ງນີ້ ບໍ່ພຽງແຕ່ເປັນການພິສູດໃຫ້ເຫັນເຖິງພອນສະຫວັນ ແລະ ຄວາມມຸ່ງໝັ້ນຂອງນ້ອງ ອານຸສັກ ເທົ່ານັ້ນ, ແຕ່ຍັງເປັນການຢືນຢັນເຖິງສັກກະຍະພາບຂອງເຍົາວະຊົນລາວໃນເວທີສາກົນ. ນັບເປັນຂອງຂວັນອັນລ້ຳຄ່າທີ່ມອບໃຫ້ແກ່ແຟນບານ ແລະ ພີ່ນ້ອງຊາວລາວທົ່ວປະເທດ.
ຂໍຮ່ວມສະແດງຄວາມຍິນດີ ແລະ ເປັນກຳລັງໃຈໃຫ້ນ້ອງ “ບິວເກດ” ກ້າວຕໍ່ໄປຢ່າງໝັ້ນຄົງ ເພື່ອອະນາຄົດທີ່ສົດໃສຂອງວົງການບານເຕະລາວ!
ທີ່ມາ:W.I.G NAGA
