ໃນວັນທີ 28 ສິງຫາ 2026, ເຈົ້າໜ້າທີ່ຕຳຫຼວດ ປກສ ເມືອງຫຼວງນ້ຳທາ ແຂວງຫຼວງນ້ຳທາ ໄດ້ນຳຕົວ ທ້າວ ພອນໄຊ ອາຍຸ 27 ປີ ຢູ່ບ້ານຕາຫວານ ເມືອງຫຼວງນ້ຳທາ ແຂວງຫຼວງນ້ຳທາ ມາສຶກສາອົບຮົມ ແລະ ກ່າວເຕືອນ. ຫຼັງຈາກທີ່ຜູ້ກ່ຽວມີພຶດຕິກຳແອບອ້າງສ້າງບັນຊີ ແລ້ວລົງສື່ສັງຄົມອອນລາຍ ເພື່ອຫຼອກລວງເອົາເງິນບໍລິຈາກ ຈາກສັງຄົມ.
ເຈົ້າໜ້າທີ່ຕຳຫຼວດ ໃຫ້ຮູ້ວ່າ: ທ້າວ ພອນໄຊ ໄດ້ມີເຈດຕະນາບໍ່ດີ ໂດຍການສ້າງເພຈເຟສບຸກ ຂຶ້ນມາ ໂພສຂໍເຊີນຊວນແຜ່ປັດໄຈຈາກຜູ້ມີຈິດໃຈເຫຼື້ອມສັດທາຮ່ວມ (ບໍລິຈາກເງິນ).
ພຶດຕິກໍາດັ່ງກ່າວແມ່ນການແອບອ້າງເອົາຊື່ ວັດນໍ້າທຸງ ມາເປັນສາກບັງ ໜ້າ ເພື່ອສ້າງຄວາມໜ້າເຊື່ອຖື, ໂດຍຜູ້ກ່ຽວໄດ້ໃຊ້ບັນຊີສ່ວນຕົວໃນທະນາຄານອອກຊື່: ທ້າວ ພອນໄຊ ສຸລິຍະພອນ ລົງຊ່ອງທາງຮັບການໂອນເງິນ, ເຊິ່ງເງິນທັງໝົດບໍ່ໄດ້ສົ່ງເຂົ້າວັດຕາມທີ່ແອບອ້າງແຕ່ຢ່າງໃດ.
ດັ່ງນັ້ນ, ເຈົ້າໜ້າທີ່ ຈຶ່ງສັ່ງໃຫ້ຢຸດເຊົາພຶດຕິກຳດັ່ງກ່າວຢ່າງເດັດຂາດ ເພາະເປັນການກະທຳທີ່ຜິດຕໍ່ລະບຽບກົດໝາຍ ແລະ ທຳລາຍຄວາມເຊື່ອຖືໃນພຸດທະສາສະໜາ; ເຊິ່ງທ້າວ ພອນໄຊ ໄດ້ຍອມຮັບສາລະພາບ ຕໍ່ການກຳທະຜິດຂອງຜູ້ກ່ຽວທຸກປະການ ພ້ອມທັງໄດ້ກ່າວຄຳຂໍໂທດຕໍ່ສັງຄົມ ທີ່ຜູ້ກ່ຽວໄດ້ກະທຳສິ່ງທີ່ບໍ່ຖືກຕ້ອງ ແລະ ໃຫ້ຄຳໝັ້ນສັນຍາວ່າ ເຫດການກະທຳຜິດຄັ້ງນີ້ຈະເປັນບົດຮຽນ ແລະ ຈະບໍ່ຫວນຄືນໄປເຮັດສິ່ງຜິດກົດໝາຍອີກຕໍ່ໄປ.
ເຈົ້າໜ້າທີ່ ຍັງໄດ້ຝາກເຕືອນມາຍັງພໍ່-ແມ່ປະຊາຊົນ ແລະ ຜູ້ໃຊ້ສື່ສັງຄົມອອນລາຍທຸກທ່ານ ໃຫ້ມີສະຕິລະວັງຕົວໃນການໂອນເງິນບໍລິຈາກຕ່າງໆ ຄວນກວດສອບແຫຼ່ງທີ່ມາ ແລະ ບັນຊີປາຍທາງໃຫ້ຊັດເຈນ ເພື່ອບໍ່ໃຫ້ຕົກເປັນເຫຍື່ອຂອງກຸ່ມຄົນບໍ່ຫວັງດີ.
