ໃນວັນທີ 23 ກໍລະກົດຜ່ານມານີ້, ທ່ານ ຄໍາມອນ ຈັນທະຈິດ ກໍາມະການສໍາຮອງສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ໄດ້ປາຖະກະຖາເນື່ອງໃນໂອກາດວັນເກີດປະທານ ສຸພານຸວົງ ຄົບຮອບ 117 ປີ, ວັນສົນທິສັນຍາມິດຕະພາບ ແລະ ການຮອບມື ຄົບຮອບ 49 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 64 ປີ ທີ່ກະຊວງອຸດສາຫະກໍາ ແລະ ການຄ້າ (ອຄ)ໂດຍມີຄະນະພັກ, ຄະນະນໍາ, ບັນດາໜ່ວຍພັກຮາກຖານ, ສະມາຊິກພັກ-ພະນັກງານຫຼັກແຫຼ່ງເຂົ້າຮ່ວມ 200 ກວ່າທ່ານ.
ໃນໂອກາດດັ່ງກ່າວ, ທ່ານ ນາງ ແສງເດືອນ ວົງອິນ ຄະນະປະຈໍາພັກ ຫົວໜ້າກົມຈັດຕັ້ງ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບ ແລະ ກ່າວຈຸດປະສົງໃນພິທີປາຖະກະຖາໃນຄັ້ງນີ້ວ່າ: ເພື່ອໂຄສະນາ-ສຶກສາອົບຮົມ ໃຫ້ສະນາຊິກພັກ-ພະນັກງານໃນທົ່ວອົງຄະນະພັກກະຊວງ ມີຄວາມຮັບຮູ້, ເຂົ້າໃຈຢ່າງເລິກເຊິ່ງ ຕໍ່ຜົນງານອັນຍິ່ງໃຫຍ່ ແລະ ຄຸນງາມຄວາມດີອັນລໍ້າເລີດ ຂອງປະທານ ສຸພານຸວົງໃນພາລະກິດປະຕິວັດປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ; ສືບຕໍ່ເພີ່ມພູນຄູນສ້າງສາຍພົວພັນມິດຕະພາບ ແລະ ຄວາມສາມັກຄີພິເສດລະຫວ່າງ ລາວ-ຫວຽດນາມ ນັບມື້ໝັ້ນຄົງຂະໜົງແກ່ນຂຶ້ນເລື້ອຍໆ. ອີກດ້ານໜຶ່ງ ກໍເພື່ອປະຕິບັດຕາມເນື້ອໃນຈິດໃຈຄໍາສັ່ງຂອງກົມການເມືອງສູນກາງພັກ ສະບັບເລກທີ 02/ກມສພ ວ່າດ້ວຍການເພີ່ມທະວີການນໍາພາ ແລະ ປ່ຽນແປງໃໝ່ວຽກງານໂຄສະນາດ້ວຍປາກ.
ໃນພິທີປາຖະກະຖາ ທ່ານ ຄໍາມອນ ຈັນທະຈິດ ໄດ້ຍົກໃຫ້ເຫັນຄວາມໝາຍສໍາຄັນຂອງການຈັດຕັ້ງປາຖະກະຖາວັນສໍາຄັນທາງປະຫວັດສາດຂອງພັກ, ຂອງຊາດ ຊຶ່ງເປັນການປຸກລະດົມຈິດໃຈຮັກຊາດ ແລະ ເສີມຂະຫຍາຍມູນເຊື້ອ, ຄວາມດີງາມຂອງການນໍາຮຸ່ນກໍ່ຕັ້ງ ແລະ ນໍາພາຂອງພັກປະຊາຊົນ ປະຕິວັດລາວ ດໍາເນີນພາລະກິດປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ, ທັງເພີ່ມທະວີສາຍພົວພັນຮ່ວມມືກັບບັນດາປະເທດເພື່ອນມິດໃນພາກພື້ນ ແລະ ສາກົນໃຫ້ແໜ້ນແຟ້ນ ເພື່ອເປົ້າໝາຍແຫ່ງການພັດທະນາເສດຖະກິດ-ສັງຄົມໃນໄລຍະໃໝ່.
ພ້ອມກັນນັ້ນ, ທ່ານ ຄໍາມອນ ຈັນທະຈິດ ຍັງໄດ້ຮຽກຮ້ອງ ໃຫ້ສະມາຊິກພັກ-ພະນັກງານຫຼັກແຫຼ່ງ ທີ່ຮ່ວມຮັບຟັງປາຖະກະຖາ ຕ້ອງໄດ້ຮໍ່າຮຽນເອົາແບບຢ່າງຄຸນສົມບັດສິນທໍາປະຕິວັດ ຂອງປະທານ ສຸພານຸວົງ ທີ່ເພິ່ນສ້າງໄວ້ ເປັນຕົ້ນຕ້ອງຢຶດໝັ້ນຕໍ່ການນໍາພັກຂອງພັກຢ່າງໜັກແໜ້ນ; ອອກແຮງສຶກສາຄົ້ນຄວ້າຮໍ່າຮຽນລັດທິມາກ-ເລນິນ, ແນວຄິດ ໄກສອນ ພົມວິຫານ, ມູນເຊື້ອອັນດີງາມ ຂອງພັກ, ຂອງຊາດ; ດໍາລົງຊີວິດດ້ວຍຄວາມປອດໃສຂາວສະອາດ, ປະຢັດມັດທະຍັດ, ມີສະຕິລະວັງຕົວຕໍ່ກົນອຸບາຍມ້າງເພທໍາລາຍຂອງອິດທິກໍາລັງປໍລະປັກ; ເຕົ້າໂຮມຄວາມສາມັກຄີ, ປົກປັກຮັກສາ ແລະ ສ້າງສາພັດທະນາປະເທດຊາດ ແລະ ພ້ອມກັນສືບຕໍ່ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດແລະ ການຮ່ວມມືຮອບດ້ານ, ຮຸ້ນສ່ວນຍຸດທະສາດ ລະຫວ່າງ ສປປ ລາວ ແລະ ສສ ຫວຽດນາມ ໃຫ້ເຂົ້າສູ່ລວງເລິກ.
(ຂ່າວ: ພະແນກປາຖະກະຖາ, ຄອສພ)
