ໃນວັນທີ 24 ກໍລະກົດ 2026, ກົມຕຳຫຼວດເສດຖະ ກິດ ກົມໃຫຍ່ຕຳຫຼວດ ໄດ້ປະສານສົມທົບກັບ ກົມພົວພັນຕ່າງປະເທດ ຫ້ອງວ່າການ ກະຊວງປ້ອງກັນຄວາມສະ ຫງົບ ໃນການມອບຜູ້ຖືກຫາເປີດເວັບຫຼິ້ນການພະນັນອອນລາຍ ສັນຊາດໄທ ຈໍານວນ 67 ຄົນ ຍິງ 36 ຄົນ ໃຫ້ທາງການໄທ ກັບໄປດຳເນີນຄະດີຕາມລະບຽບກົດໝາຍ ຢູ່ຣາຊະອານາຈັກໄທ.
ພິທີມອບ-ຮັບ ໄດ້ຈັດຂຶ້ນຢູ່ທີ່ດ່ານສາກົນຂົວມິດຕະ ພາບລາວ-ໄທ 1 ນະຄອນຫຼວງວຽງຈັນ-ໜອງຄາຍ; ໂດຍທັງສອງຝ່າຍ ໄດ້ເຊັນບົດບັນທຶກມອບ-ຮັບຕົວຜູ້ຖືກຫາ ຈໍານວນດັ່ງກ່າວ ຢ່າງເປັນທາງການ ເຊັນມອບຝ່າຍລາວໂດຍ ພັທ ຄໍາໄພທູນ ລໍວັນຫງຽນ ຮອງຫົວໜ້າກົມຕຳຫຼວດເສດຖະກິດ ແລະ ເຊັນຮັບ ຝ່າຍໄທໂດຍ ພັທ ຕີຢາຊາພັດ ຣຸງສີບຣູມານະກູນ ( Teeyarchapath Rungsibhrumanarkul ) ຮອງຜູ້ບັງຄັບການ ກວດຄົນເຂົ້າ-ອອກເມືອງ 4 ປະເທດໄທ ເຊິ່ງມີຄະນະຮັບຜິດຊອບທັງສອງຝ່າຍເຂົ້າຮ່ວມເປັນສັກຂີພະຍານ.
ເຈົ້າໜ້າທີ່ຕຳຫຼວດກົມຕຳຫຼວດເສດຖະກິດ ໃຫ້ຮູ້ວ່າ: ຜູ້ຖືກຫາ ສັນຊາດໄທ ທີ່ມອບໃຫ້ເຈົ້າໜ້າຕຳຫຼວດໄທ ໃນມື້ນີ້ແມ່ນຖືກກັກຕົວໃນວັນທີ 21 ກໍລະກົດ 2026, ໂດຍເຈົ້າ ໜ້າທີ່ກົມຕຳຫຼວດເສດຖະກິດ ກົມໃຫຍ່ຕຳຫຼວດ ສົມທົບກັບພາກສ່ວນທີ່ກ່ຽວຂ້ອງ ເຂົ້າມ້າງກຸ່ມແກ້ງຕອບແຊັດ ເວັບພະນັນອອນລາຍ ຢູ່ 2 ຈຸດ ຄື: ຢູ່ຕຶກ 4 ຊັ້ນຕັ້ງຢູ່ບ້ານໂພນພະເນົາ ເມືອງໄຊເສດຖາ ເຈົ້າຂອງຊື່ ນາງ ສຸສະດາ ໄຊຍະບຸນຊູ ປະຊາຊົນຢູ່ບ້ານສະພານທອງເໜືອ ເມືອງສີສັດຕະນາກ ນະຄອນຫຼວງວຽງຈັນ ໂດຍກຸ່ມຜູ້ຖືກຫາ ໄດ້ເຊົ່າເປັນບ່ອນເຄື່ອນໄຫວຕອບແຊັດເວັບພະນັນອອນລາຍ ແລະ ຢູ່ໂຮງແຮມໂງ່ນຊັບ ຕັ້ງຢູ່ບ້ານດອນໜູນ ເມືອງໄຊທາ ນີ ນະຄອນຫຼວງວຽງຈັນ ແມ່ນໃຊ້ເປັນບ່ອນພັກເຊົາ; ພ້ອມຂອງກາງອຸປະກອນທີ່ໃຊ້ເຂົ້າໃນການເຄື່ອນໄຫວຕອບແຊັດເວັບພະນັນອອນລາຍ ມີຄອມພິວເຕີຕັ້ງໂຕະ ຈໍານວນ 46 ຊຸດ, ໂທລະສັບມືຖື 133 ໜ່ວຍ, ຊຸດໂຕະ 4 ໜ່ວຍຕິດ ກັນ ຈໍານວນ 8 ຊຸດ ແລະ ເຄື່ອງຂອງກາງອື່ນໆອີກຈຳນວນໜຶ່ງ.
ໂອກາດນີ້, ຂໍສະແດງຄວາມຂອບໃຈຕໍ່ພໍ່ແມ່ປະຊາຊົນ ພົນລະເມືອງດີ ທີ່ໄດ້ແຈ້ງຂໍ້ມູນທີ່ເປັນປະໂຫຍດໃຫ້ເຈົ້າ ໜ້າທີ່ ຈົນນຳໄປສູ່ການບຸກມ້າງຂະບວນການດັ່ງກ່າວ ແລະ ຫວັງຢ່າງຍິ່ງວ່າພໍ່ແມ່ປະຊາຊົນທຸກທົ່ວໜ້າຈະຊ່ວຍເປັນຫູເປັນຕາຊ່ວຍເຈົ້າໜ້າທີ່,ຫາກທ່ານພົບເຫັນບຸກຄົນ, ກຸ່ມຄົນ ແລະ ສະຖານທີ່ ທີ່ສົງໄສເຄື່ອນໄຫວກະຜິດຕໍ່ກົດໝາຍ ໃຫ້ຮີບຮ້ອນແຈ້ງຕໍ່ເຈົ້າໜ້າທີ່ໂດຍດ່ວນ, ແຈ້ງເຂົ້າມາທາງເພຈຂອງພວກເຮົາ ຫຼື ເພຈກົມຕຳຫຼວດເສດຖະກິດ ຫຼື ແຈ້ງເຂົ້າສາຍດ່ວນ 1533 ໄດ້ຕະຫຼອດເວລາ.
