ໂດຍປະຕິບັດຕາມແຈ້ງການ ຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 624/ຫສນຍ, ລົງວັນທີ 24 ພຶດສະພາ 2026. ໃນຄັ້ງວັນທີ 18 ພຶດສະພາ 2026 ຜ່ານມາ ເຈົ້າໜ້າທີ່ ເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ-ສັດປ່າ ແລະ ກົດໝາຍວ່າດ້ວຍປ່າໄມ້ (LAO-WEN) ໄດ້ລົງເຄື່ອນໄຫວກວດກາຮ້ານອາຫານແຫ່ງໜຶ່ງ ຢູ່ເຂດບ້ານຈອມມະນີ, ເມືອງໄຊເສດຖາ, ນະຄອນຫຼວງວຽງຈັນ. ຜ່ານການລົງກວດກາຕົວຈິງ, ເຈົ້າໜ້າທີ່ ໄດ້ພົບເຫັນຊາກ, ຊິ້ນສ່ວນ ແລະ ສັດປ່າທີ່ມີຊີວິດ ປະເພດຫວງຫ້າມ ຖືກນໍາມາປຸງແຕ່ງ, ຊື້-ຂາຍ ເປັນອາຫານ ໃຫ້ກຸ່ມນັກທ່ອງທ່ຽວຄົນຕ່າງປະເທດ ຢ່າງຜິດກົດໝາຍ, ຂອງກາງທີ່ກວດພົບ ແລະ ໄດ້ກັກຍຶດເບື້ອງຕົ້ນ ປະກອບມີ:
1. ງູຍັງມີຊີວິດ ຈຳນວນ 1 ໂຕ, ມີນໍ້າໜັກ 1.42 ກິໂລ; 2. ຊາກໂຕລິ່ນ ຖອນເກັດແລ້ວ ຈຳນວນ 4 ໂຕ ມີນໍ້າໜັກ 4.8 ກິໂລ; 3. ເກັດລີ່ນ ຈໍານວນ 1 ຖົງ, ນໍ້າໜັກ 3,2 ກິໂລກຼາມ; 4. ຊິ້ນສ່ວນຊີ້ນ ແລະ ເຄື່ອງໃນລິ່ນ (ດິບ) ນ້ຳໜັກ 2.1 ກິໂລ; 5. ຊິ້ນສ່ວນຊີ້ນໂຕລິ່ນ (ສຸກ) ນໍ້າໜັກ 3.8 ກິໂລ; 6. ຊິ້ນສ່ວນຕີນໝີ ຈໍານວນ 4 ຊິ້ນ, ນໍ້າໜັກ 2.1 ກິໂລ; 7. ເຫຼົ້າບອງສັດ ຈໍານວນ 1 ໂຖ; ລວມນໍ້າໜັກທັງໝົດ ຂອງ ຊາກສັດ, ຊິ້ນສ່ວນ ແລະ ສັດປ່າທີ່ມີຊີວິດ 25.52 ກິໂລ.
ດັ່ງນັ້ນ, ເຈົ້າໜ້າທີ່ ເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ-ສັດປ່າ ແລະ ກົດໝາຍວ່າດ້ວຍປ່າໄມ້ (LAO-WEN) ໄດ້ນໍາເອົາຕົວຜູ້ຖືກຫາ ເພດຊາຍ (ສັນຊາດຈີນ) ມາດໍາເນີນຄະດີ ຕາມກົດໝາຍ.
(ແຫຼ່ງຂ່າວ: ຂ່າວສານກະສິກຳ ແລະ ສິ່ງແວດລ້ອມ)
