ຂ່າວສານອຸດສາຫະກຳ ແລະ ການຄ້າ ລາຍງານວັນທີ 14 ກໍລະກົດ 2026 ວ່າ: ຕໍ່ກັບເຫດການດິນຍຸບທີ່ ບ້ານໜອງກະແດ້ງ, ເມືອງວິລະບູລີ, ແຂວງສະຫວັນນະເຂດ ໄດ້ສ້າງຄວາມສົນໃຈ ໃຫ້ແກ່ສັງຄົມໃນປັດຈຸບັນ, ກະຊວງ ອຄ ໄດ້ສົມທົບກັບພາກສ່ວນກ່ຽວຂ້ອງ ທັງພາກລັດ ແລະ ເອກະຊົນ ແລະ ອົງການປົກຄອງທ້ອງຖິ່ານ ຕິດຕາມສະຖານະການດັ່ງກ່າວຢ່າງໃກ້ຊິດ ເພື່ອຊອກຮູ້ສາເຫດ ຂອງເຫດການ.
ຫລ້າສຸດ, ໜ່ວຍງານ ກົມທໍລະນີສາດ ແລະ ບໍ່ແຮ່ (ກທບ) ໄດ້ປະສານງານຮ່ວມກັບ ບໍລິສັດ ລ້ານຊ້າງ ມີເນໂຣນ ຈຳກັດ ເພື່ອສະເໜີໃຫ້ ບໍລິສັດ ຊ່ວຍດຳເນີນການສຳຫລວດທາງທໍລະນີຟີຊິກຢ່າງລະອຽດ ຢູ່ເຂດບ້ານໜອງກະແດ້ງ. ເຖິງແມ່ນວ່າທາງຊ່ຽວຊານຈະຮູ້ສາເຫດເບື້ອງຕົ້ນແລ້ວວ່າ ປາກົດການດັ່ງກ່າວແມ່ນເກີດຈາກ ໂຄງສ້າງຫີນປູນຕາມທຳມະຊາດກໍຕາມ, ແຕ່ການລົງສຳຫລວດໃນຄັ້ງນີ້ ແມ່ນເພື່ອເກັບກຳຂໍ້ມູນທາງວິຊາການຢ່າງຄົບຖ້ວນ ເພື່ອນຳມາອະທິບາຍ ແລະ ຊີ້ແຈງໃຫ້ສັງຄົມໄດ້ຮັບຊາບຢ່າງຈະແຈ້ງ ດ້ວຍຫລັກຖານອ້າງອີງທີ່ໜ້າເຊື່ອຖື.
ຂໍ້ມູນເບື້ອງຕົ້ນ ທີ່ທາງການຂອງແຂວງ ໄດ້ລົງກວດສອບພື້ນທີ່ຕົວຈິງ ພົບວ່າ: ຈຸດເກີດເຫດຕົວຈິງ ແມ່ນຢູ່ ນອກເຂດສຳປະທານສຳຫລວດແຮ່ທາດ ປະມານ 3 ກິໂລແມັດ. ແນວໃດກໍຕາມ, ທາງກະຊວງ ອຄ ຍັງຈະໄດ້ສືບຕໍ່ສົມທົບ ກັບທຸກພາກສ່ວນກ່ຽວຂ້ອງ ເພື່ອກວດກາໃນລາຍລະອຽດ ເພື່ອຊອກຫາສາເຫດທີ່ແທ້ຈິງ ແລະ ຈະລາຍງານຄວາມຄືບໜ້າ ໃຫ້ສັງຄົມຮັບຊາບເປັນແຕ່ລະໄລຍະ.
ພ້ອມນັ້ນ, ກໍຮຽກຮ້ອງມາຍັງສັງຄົມ ຈົ່ງບໍລິໂພກ ຮັບຊົມຂ່າວຢ່າງມີສະຕິ ແລະ ໃຫ້ຕິດຕາມຂ່າວສານ ຈາກແຫລ່ງຂ່າວຂອງພາກລັດ ແລະ ແຫລ່ງຂ່າວ ທີ່ໜ້າເຊື່ອຖື. ຂໍຮຽກຮ້ອງ ຢ່າຟ້າວແຕກຕື່ນ ຫລື ແຊຣ໌ຂ່າວທີ່ບໍ່ມີແຫລ່ງທີ່ມາຊັດເຈນ ເຊື່ອຖືໄດ້ ເຊິ່ງອາດສ້າງຄວາມສັບສົນໃນສັງຄົມ.
ທາງກະຊວງ ອຄ ແລະ ໜ່ວຍງານທີ່ກ່ຽວຂ້ອງ ໃຫ້ຄໍາໝັ້ນສັນຍາ ຈະສືບຕໍ່ຕິດຕາມເຝົ້າລະວັງສະຖານະການດັ່ງກ່າວຢ່າງໃກ້ຊິດ ແລະ ຈະແຈ້ງຄວາມຄືບໜ້າໃຫ້ສັງຄົມຮັບຊາບເປັນໄລຍະ ຜ່ານຊ່ອງທາງຂ່າວສານຂອງທາງການເທົ່ານັ້ນ.
