ວັນທີ 3 ກໍລະກົດ 2026 ນີ້, ທີ່ກະຊວງປ້ອງກັນປະເທດ ແຫ່ງ ສປປ ລາວ, ສະຫາຍ ພົນໂທ ສາຍໃຈ ກົມມະສິດ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ສະຫາຍ ພົນຕີ ທະຫານເຮືອ ວິກເຕີ ກາວການົບ ຮອງຫົວໜ້າສູນບັນຊາປ້ອງກັນຊາດ ເເຫ່ງ ສ ຣັດເຊຍ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 30 ມິຖຸນາ ຫາ 4 ກໍລະກົດ 2026 ນີ້.
ສະຫາຍ ພົນໂທ ສາຍໃຈ ກົມມະສິດ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງ ຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້, ເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນດີງາມ ແລະ ການຮ່ວມມືຮອບດ້ານ ລະຫວ່າງ ສອງຊາດ, ສອງກອງທັບ ລາວ-ຣັດເຊຍ ໃຫ້ມີຄວາມແໜ້ນແຟ້ນຍິ່ງໆຂຶ້ນ, ທັງເປັນການປະກອບສ່ວນອັນສໍາຄັນປະກອບສ່ວນ ໃນການປົກປັກຮັກສາ ແລະ ສ້າງພັດທະນາປະເທດຊາດ.
ໂອກາດນີ້, ສະຫາຍ ພົນຕີ ທະຫານເຮືອ ວິກເຕີ ກາວການົບ ໄດ້ກ່າວສະແດງຄວາມຂອບໃຈ ຕໍ່ສະຫາຍ ພົນໂທ ສາຍໃຈ ກົມມະສິດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງ ສະເໜີຈຸດປະສົງການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ເພືີ່ອປຶກສາຫາລື ແລະ ເອກະພາບ ຮ່າງສັນຍາ ລະຫວ່າງ ລັດຖະບານ ແຫ່ງ ສ. ຣັດເຊຍ ແລະ ລັດຖະບານ ແຫ່ງ ສປປ ລາວ ວ່າດ້ວຍການຮ່ວມມືໃນການປະຕິບັດການຊ່ວຍເຫຼືອດ້ານມະນຸດສະທໍາ ໃນກໍລະນີເກີດເຫດສຸກເສີນ ແລະ ເພື່ອເປັນການສືບຕໍ່ເສີມຂະຫຍາຍ ແລະ ຮັດແໜ້ນການຮ່ວມມືຮອບດ້ານ ລະຫວ່າງ ສອງຊາດ, ສອງກອງທັບ ລາວ-ຣັດເຊຍ ກໍຄື ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສ.ຣັດເຊຍ ໃຫ້ນັບມື້ນັບຂະຫຍາຍຕົວຂຶ້ນເລື້ອຍໆ. ຈາກນັ້ນ, ກໍໄດ້ມີການແລກປ່ຽນ ຂອງທີ່ລະນຶກ ໃຫ້ເຊີ່ງກັນ ແລະ ກັນ ຕື່ມອີກ.
ໂດຍ: ວັນນະລັກ ວົງພົມ
