ເກົາຫຼີເໜືອເຜີຍການປຶກສາຫາລືລະຫວ່າງຜູ້ນຳເກົາຫຼີເໜືອ ແລະ ຈີນ ໄດ້ບັນລຸແຜນຍຸດທະສາດໄລຍະຍາວເພື່ອພັດທະນາຄວາມສຳພັນລະຫວ່າງສອງປະເທດ ທ່າມກາງການຈັບຕາວ່າຈີນກຳລັງກັບມາເພີ່ມບົດບາດຕໍ່ພັນທະມິດເກົ່າຢ່າງຊຽງຢາງ.
ເກົາຫຼີເໜືອເປີດເຜີຍວ່າ ການປຶກສາຫາລືລະຫວ່າງຜູ້ນຳເກົາຫຼີເໜືອ ແລະ ຈີນ ນຳໄປສູ່ການກຳນົດແຜນຍຸດທະສາດໄລຍະຍາວ ເພື່ອພັດທະນາຄວາມສຳພັນລະຫວ່າງສອງປະເທດ ທ່າມກາງສະຖານະການພູມິລັດຖະສາດໂລກທີ່ກຳລັງປ່ຽນແປງ ແລະ ການແຂ່ງຂັນອິດທິພົນລະຫວ່າງມະຫາອຳນາດ.
ໂດຍສຳນັກຂ່າວກາງເກົາຫຼີ ຫຼື ເຄຊີເອັນເອ ລາຍງານໃນວັນທີ 10 ມິຖຸນາວ່າ ຜູ້ນຳເກົາຫຼີເໜືອ ທ່ານ ຄິມ ຈອງອຶນ ແລະ ປະທານາທິບໍດີຈີນ ທ່ານ ສີ ຈິ້ນຜິງ ສະແດງຄວາມພໍໃຈຕໍ່ຜົນການປຶກສາຫາລືລະຫວ່າງກັນ ພ້ອມລະບຸວ່າ ທັງສອງຝ່າຍໄດ້ວາງແນວທາງສຳຄັນສຳລັບການພັດທະນາຄວາມສຳພັນໃນອະນາຄົດ.
ການເປີດເຜີຍດັ່ງກ່າວມີຂຶ້ນຫຼັງ ທ່ານ ສີ ຈິ້ນຜິງ ເດີນທາງຢ້ຽມຢາມກຸງຊຽງຢາງໃນວັນຈັນທີ່ຜ່ານມາ ຖືເປັນການຢ້ຽມຢາມເກົາຫຼີເໜືອຄັ້ງສຳຄັນຂອງຜູ້ນຳຈີນ ຫຼັງຈາກກ່ອນໜ້ານີ້ ທ່ານ ສີ ຈິ້ນຜິງ ຫາກໍ່ຕ້ອນຮັບຜູ້ນຳຫຼາຍປະເທດຢູ່ກຸ່ງປັກກິ່ງ ລວມທັງ ທ່ານ ດໍໂນລ ທຣຳ ປະທານາທິບໍດີສະຫະລັດ ແລະ ທ່ານ ວລາດິເມຍ ປູຕິນ ປະທານາທິບໍດີລັດເຊຍ.
ໃນລະຫວ່າງການຢ້ຽມຢາມ 2 ວັນ ຜູ້ນຳຈີນ ແລະ ເກົາຫຼີເໜືອຢືນຢັນຄວາມຕັ້ງໃຈທີ່ຈະກະຊັບມິດຕະພາບແຫ່ງການປະຕິວັດ ແລະ ຄວາມສຳພັນແບບສະຫາຍ ພ້ອມຊຸກຍູ້ຄວາມສຳພັນຈີນ-ເກົາຫຼີເໜືອໃຫ້ເປັນຄວາມຮ່ວມມືໃນທາງຍຸດທະສາດທີ່ເຂັ້ມແຂງຂຶ້ນ.
ນອກຈາກການປຶກສາຫາລືທາງການເມືອງແລ້ວ ທ່ານ ສີ ຈິ້ນຜິງ ແລະ ທ່ານ ຄິມ ຈອງອຶນ ຍັງໄດ້ໄປຢ້ຽມຊົມໂຮງຮຽນຝຶກອົບຮົມເຈົ້າໜ້າທີ່ລະດັບສູງຂອງພັກກຳມາກອນເກົາຫຼີເໜືອ ຊຶ່ງທັງສອງຝ່າຍໄດ້ລົມກັນກ່ຽວກັບການພັດທະນາບຸກຄະລາກອນຂອງພັກ ກ່ອນຮ່ວມກັນປູກຕົ້ນໄມ້ລະລຶກ ແລະ ເດີນທາງໄປຍັງຫໍສູງມິດຕະພາບ ຊຶ່ງສ້າງຂຶ້ນເພື່ອລະລຶກເຖິງທະຫານຈີນທີ່ເຂົ້າຮ່ວມສົງຄາມເກົາຫຼີ.
ຫຼັງສຳເລັດການຢ້ຽມຢາມ ທ່ານ ສີ ຈິ້ນຜິງ ໄດ້ສົ່ງຈົດໝາຍຂອບໃຈຫາ ທ່ານ ຄິມ ຈອງອຶນ ໂດຍລະບຸວ່າ ທັງສອງຝ່າຍໄດ້ແລກປ່ຽນຄວາມຄິດເຫັນຢ່າງເລິກເຊິ່ງໃນປະເດັນທີ່ມີຜົນປະໂຫຍດຮ່ວມກັນ ແລະ ບັນລຸຄວາມເຂົ້າໃຈຮ່ວມກັນຫຼາຍດ້ານ.
ຄວາມເຄື່ອນໄຫວຄັ້ງນີ້ເກີດຂຶ້ນໃນຊ່ວງທີ່ເກົາຫຼີເໜືອກຳລັງເພີ່ມຄວາມຮ່ວມມືກັບລັດເຊຍຫຼາຍຂຶ້ນ ໂດຍລັດຖະບານຊຽງຢາງໄດ້ສົ່ງທະຫານໄປຊ່ວຍລັດເຊຍໃນສົງຄາມຢູເຄຣນ ແລະ ຍັງສືບຕໍ່ດຳເນີນການພັດທະນາໂຄງການອາວຸດນິວເຄຼຍຂອງຕົນເອງ.
ຂ່າວຈາກ: channelnewsasia
