ວັນທີ 10-11 ພຶດສະພາ 2026ນີ້ ທ່ານ ເຫລັກໄຫລ ສີວິໄລ ລັດຖະມົນຕີກະຊວງ ໂຍທາທິການ ແລະ ຂົນສົ່ງ ພ້ອມຄະນະ ລວມມີຫົວໜ້າຫ້ອງການກະຊວງ, ຫົວໜ້າກົມ, ຮອງຫົວໜ້າກົມ ແລະ ພະນັກງານວິຊາການ ກະຊວງ ຍທຂ ລົງຕິດຕາມການພັດທະນາພື້ນຖານໂຄງລ່າງ ຢູ່ແຂວງໄຊຍະບູລີ ໂດຍສະເພາະແມ່ນໂຄງການກໍ່ສ້າງຕ້ານຕາຝັ່ງເຈື່ອນ ຕາມສາຍແມ່ນໍ້າຂອງ ລຽບຕາມຊາຍແດນ ລາວ-ໄທ ແລະ ໂຄງການກໍ່ສ້າງຕ້ານເຈື່ອນ ລຽບສາຍນໍ້າເຫືອງ ເມືອງບໍ່ແຕນ ແລະ ເມືອງແກ່ນທ້າວ. ມີທ່ານ ເພັງນິລັນ ຄຳພັນເພັງ ເລຂາພັກແຂວງ ປະທານປ້ອງກັນຊາດ-ປ້ອງກັນຄວາມສະຫງົບ ແຂວງໄຊຍະບູລີ, ທ່ານ ແພງຊ້ອຍ ແພງເມືອງ ຫົວໜ້າພະແນກ ຍທຂ ແຂວງໄຊຍະບູລີ ແລະ ພາກສ່ວນກ່ຽວຂ້ອງໃຫ້ການຕ້ອນຮັບ.
ທ່ານ ແພງຊ້ອຍ ແພງເມືອງ ຫົວໜ້າພະແນກ ໂຍທາທິການ ແລະ ຂົນສົ່ງ ແຂວງໄຊຍະບູລີ ໄດ້ລານງານວ່າ: ວຽກງານປ້ອງກັນຕ້ານເຈື່ອນ ແລະ ນໍ້າຖ້ວມໄດ້ສໍາເລັດການສໍາຫລວດ-ອອກແບບປ້ອງກັນຕາຝັ່ງເຈື່ອນນໍ້າເຫືອງ ແລະ ນໍ້າຂອງໄດ້ທັງໝົດ 14 ຈຸດ 11 ໂຄງການ, ເມືອງບໍ່ແຕນ 3 ໂຄງການ, ເມືອງແກ່ນທ້າວ 5 ໂຄງການ ແລະ ເມືອງປາກລາຍມີ 3 ໂຄງການ ລວງຍາວ 19,216 ແມັດ, ມູນຄ່າກໍ່ສ້າງແມ່ນ 1,20 ຕື້ກວ່າກີບ.
ສ່ວນໂຄງການກໍ່ສ້າງປ້ອງກັນເຈື່ອນ ທີ່ພວມຈັດຕັ້ງປະຕິບັດ ມີຈໍານວນ 9 ໂຄງການຄື: ເມືອງປາກລາຍ 2 ໂຄງການ, ເມືອງແກ່ນທ້າວ 5 ໂຄງການ ແລະ ເມືອງບໍ່ແຕນ 2 ໂຄງການ, ລວງຍາວທັງໝົດ 15,102 ແມັດ, ມູນຄ່າການກໍ່ສ້າງ 465,40 ຕື້ກີບ, ທັງໝົດນີ້ສາມາດປ້ອງກັນການເຊາະເຈື່ອນໄດ້ແລ້ວ 9,410 ແມັດ ແລະ ພວມຈັດຕັ້ງການປ້ອງກັນການກັດເຊາະເຈື່ອນ 5,692 ແມັດ.
ການລົງມາຕິດຕາມຄັ້ງນີ້ ໄດ້ຕິດຕາມສະພາບ ຂົວຂ້າມນ້ຳຂອງເມືອງປາກລາຍ, ເບິ່ງກໍ່ສ້າງຕ້ານເຈື່ອນເທສະບານເມືອງປາກລາຍ, ຂົວມິດຕະພາບຢູ່ດ່ານນໍ້າເຫືອງ ແລະ ບັນດາໂຄງການກໍ່ສ້າງຕ້ານຕາຝັ່ງເຈື່ອນ ເມືອງແກ່ນທ້າວ, ໂຄງການຕ້ານເຈື່ອນ ເມືອງບໍ່ແຕນ. ເຊິ່ງທ່ານລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ເນັ້ນ ໃຫ້ພະແນກ ຍທຂ ໃນນາມເຈົ້າຂອງໂຄງການເອົາໃຈໃສ່ ຕິດຕາມຊຸກຍູ້ ບໍລິສັດໃຫ້ກໍ່ສ້າງໂຄງການດັ່ງກ່າວສໍາເລັດຕາມແຜນການທີ່ກໍານົດໄວ້.
ສຳລັບເສັ້ນທາງບາງຊ່ວງທີ່ເປ່ເພໄດ້ເນັ້ນ ໃຫ້ການນໍາ ພະແນກ ໂຍທາທິການ ແລະ ຂົນສົ່ງແຂວງໄຊຍະບູລີ ເອົາໃຈໃສ່ ສືບຕໍ່ກໍານົດເຂົ້າແຜນ, ຈັດສັນແຫລ່ງທຶນເພື່ອ ປັບປຸງສ້ອມແປງໃຫ້ສາມາດທຽວໄດ້ສະດວກໃນການຄົມມະນາຄົມຂອງປະຊາຊົນ ຕິດພັນກັບວຽກງານປ້ອງກັນຊາດປ້ອງກັນຄວາມສະຫງົບ ແລະ ວຽກງານ ຕິດພັນກັບເສດຖະກິດພາຍໃນ ເມືອງສູ່ເມືອງ ແລະ ບັນດາແຂວງອ້ອມຂ້າງ.
