ບໍລິສັດໂຊເຊຍມີເດຍຍັກໃຫຍ່ “ເມຕາ” ກຳລັງກຽມປົດພະນັກງານຄັ້ງໃຫຍ່ 10% ຫຼື ປະມານ 8,000 ຄົນໃນເດືອນໜ້າ ພ້ອມທັງລະງັບການຮັບສະໝັກຕຳແໜ່ງວ່າງຈຳນວນຫຼາຍ ຫຼັງຈາກ ມາກ ຊັກເຄີເບີກ ຫັນໄປທຸ່ມງົບລົງທຶນດ້ານ AI ສູງເຖິງ 135 ພັນລ້ານໂດລາໃນປີດຽວ ເພື່ອຫວັງໃຊ້ເທັກໂນໂລຊີເພີ່ມປະສິດທິພາບແທນແຮງງານມະນຸດ
ບໍລິສັດເມຕາໄດ້ແຈ້ງພະນັກງານຜ່ານບັນທຶກພາຍໃນວ່າ ມີແຜນຈະປົດພະນັກງານປະມານ 10% ຫຼື ປະມານ 8,000 ຕຳແໜ່ງ ນອກຈາກນັ້ນຍັງຍົກເລີກການບັນຈຸຕຳແໜ່ງວ່າງອີກຫຼາຍພັນອັດຕາທີ່ເຄີຍເປີດຮັບສະໝັກ
ສາເຫດຫຼັກຂອງການປົດຄັ້ງນີ້ເກີດຈາກການປັບໂຄງສ້າງການໃຊ້ຈ່າຍ ໂດຍໃນປີ 2026 ນີ້ ເມຕາວາງແຜນທຸ່ມງົບດ້ານ AI ສູງເຖິງ 135 ພັນລ້ານໂດລາ (ປະມານ 4.39 ລ້ານລ້ານບາດ) ເຊິ່ງເກືອບເທົ່າກັບງົບລວມ 3 ປີຜ່ານມາ
ມາກ ຊັກເຄີເບີກ ຜູ້ຮ່ວມກໍ່ຕັ້ງແລະ CEO ຂອງເມຕາ ເຄີຍສົ່ງສັນຍານການຫຼຸດພະນັກງານມາແຕ່ຕົ້ນປີ ໂດຍລາວລະບຸວ່າ ພະນັກງານທີ່ໃຊ້ AI ຊ່ວຍເຮັດວຽກມີປະສິດທິພາບສູງຂຶ້ນຫຼາຍ ຈົນຄົນດຽວສາມາດເຮັດໂປເຈັກທີ່ເຄີຍຕ້ອງໃຊ້ທີມໃຫຍ່ໄດ້ ລາວຍັງເນັ້ນວ່າ “ປີ 2026 ຈະເປັນປີທີ່ AI ປ່ຽນແປງວິທີເຮັດວຽກຢ່າງສິ້ນເຊີງ”
ນອກຈາກນີ້ ເມຕາຍັງແຈ້ງວ່າຈະເລີ່ມຕິດຕາມແລະບັນທຶກການໃຊ້ຄອມພິວເຕີໃນທີ່ເຮັດວຽກ ເພື່ອນຳຂໍ້ມູນໄປຝຶກ AI ຂອງບໍລິສັດ ຊຶ່ງພະນັກງານບາງຄົນມອງວ່າເປັນເລື່ອງນ່າຫົດຫູ່ ໂດຍສະເພາະໃນສະຖານະການທີ່ຄວາມມັ່ນຄົງອາຊີບກຳລັງສັ່ນຄອນ
ການປົດພະນັກງານ 8,000 ຕຳແໜ່ງໃນຄັ້ງນີ້ ເປັນຄັ້ງໃຫຍ່ທີ່ສຸດນັບຕັ້ງແຕ່ປີ 2023 ແມ່ນວ່າປີກ່ອນບໍລິສັດຈະເລີ່ມກັບມາຮັບພະນັກງານໃໝ່ອີກຄັ້ງ
ຢ່າງໃດກໍຕາມ ເມຕາບໍ່ແມ່ນບໍລິສັດດຽວ ເພາະຫຼາຍບໍລິສັດເທັກໂນໂລຊີລະດັບໂລກກໍກຳລັງຫຼຸດພະນັກງານເພື່ອນຳເງິນໄປລົງທຶນ AI ເຊັ່ນ Amazon ປົດຫຼາຍກວ່າ 30,000 ຄົນ, Oracle ຫຼາຍກວ່າ 10,000 ຄົນ, Block ປັບຫຼຸດເກືອບຄື່ງບໍລິສັດ ຫຼື ປະມານ 4,000 ຄົນ ແລະ Microsoft ກໍມີໂຄງການໃຫ້ລາອອກໂດຍສະໝັກໃຈ
ເກືອບທຸກບໍລິສັດໃຫ້ເຫດຜົນຄ້າຍກັນວ່າ ຄວາມສາມາດຂອງ AI ທີ່ເພີ່ມຂຶ້ນ ແລະ ການລົງທຶນມະຫາສານ ທຳໃຫ້ຄວາມຕ້ອງການແຮງງານມະນຸດຫຼຸດລົງ.
ທີ່ມາ: BBC
