ຜູ້ນຳສູງສຸດອີຣານໄວ້ອາໄລຫົວໜ້າຂ່າວກອງ IRGC ຢືນຢັນບໍ່ຮັບດີລຢຸດຍິງ ຂະນະທີ່ກອງກຳລັງພິທັກສ໌ການປະຕິວັດອີຣານ ປະກາດຈະຕອບໂຕ້
ວັນທີ 7 ເມສາ 2026 ໂມຈຕາບາ ຄາເມເນອີ ຜູ້ນຳສູງສຸດອີຣານ ໄດ້ສະແດງຄວາມເສຍໃຈຕໍ່ການເສຍຊີວິດຂອງ ພົນຕີ ມາຈິດ ຄາເດມີ ຫົວໜ້າໜ່ວຍຂ່າວກອງຂອງກອງກຳລັງພິທັກສ໌ການປະຕິວັດອີຣານ (IRGC) ຈາກການໂຈມຕີຂອງອິດສະຣາເອັນ. ໃນຖະແຫຼງການທີ່ເຜີຍແຜ່ຜ່ານໂທລະທັດຂອງລັດ ຜູ້ນຳອີຣານໄດ້ກ່າວວ່າ ພົນຕີຄາເດມີໄດ້ເຂົ້າຮ່ວມ ແຖວໜ້າຂອງນັກລົບຜູ້ເສຍສະລະ ສະທ້ອນໃຫ້ເຫັນເຖິງການສູນເສຍຜູ້ນຳລະດັບສູງຂອງອີຣານທີ່ຖືກສັງຫານຈາກການໂຈມຕີຕໍ່ເນື່ອງ.
ບົດລາຍງານລະບຸວ່າ ຜູ້ນຳອີຣານບໍ່ໄດ້ປາກົດໂຕຫຼືກ່າວຕໍ່ສາທາລະນະນັບຕັ້ງແຕ່ຂຶ້ນດຳລົງຕຳແໜ່ງຕໍ່ຈາກບິດາ. ໃນຂະນະດຽວກັນ ສຳນັກຂ່າວ IRNA ຂອງທາງການອີຣານຢືນຢັນວ່າ ອີຣານປະຕິເສດຂໍ້ສະເໜີຢຸດຍິງຫຼ້າສຸດ ແລະ ຍັງຄົງຢືນຢັດຈຸດຢືນຕ້ອງການຢຸດຕິສົງຄາມຢ່າງຖາວອນ.
ທາງດ້ານກອງກຳລັງພິທັກສ໌ການປະຕິວັດອີຣານ ໄດ້ປະກາດຈະຕອບໂຕ້ຫຼັງຈາກຫົວໜ້າໜ່ວຍຂ່າວກອງຂອງອົງກອນ ເສຍຊີວິດຈາກການໂຈມຕີຂອງອິດສະຣາເອັນໃນວັນທີ 7 ເມສາທີ່ຜ່ານມາ. ຖະແຫຼງການຂອງໜ່ວຍຂ່າວກອງລະບຸວ່າ ຝ່າຍທີ່ຢູ່ເບື້ອງຫຼັງການໂຈມຕີຈະຕ້ອງໄດ້ປະເຊີນໜ້າກັບການຕອບໂຕ້ຄັ້ງໃຫຍ່ ພາຍໃຕ້ປະຕິບັດການທີ່ໃຊ້ຊື່ວ່າ “Crushing Revenge” ໂດຍເຕືອນວ່າການຕອບໂຕ້ຈະເກີດຂຶ້ນກັບຜູ້ວາງແຜນ ແລະ ຜູ້ລົງມືກໍ່ເຫດ.
